Gicumbi: RRA yahaye miliyoni 12 Frw amakoperative y’abahoze ari abarembetsi

3 6-12-2018 - saa 14:36, Thamimu Hakizimana

Ikigo cy’Igihugu gishinzwe Imisoro n’Amahoro (RRA) cyahaye miliyoni 12 amakoperative atatu y’urubyiruko rwo mu mirenge yo mu Karere ka Gicumbi ,rwahoze ari abarembetsi, kugira ngo babashe kwiteza imbere nyuma y’aho baretse umuco wo kwinjiza magendu mu gihugu.

Kuri uyu wa Gatatu, nibwo aya makoperative yasinyanye amasezerano n’inzego z’ubuyobozi na RRA mu bijyanye n’ubufatanye mu guhangana na magendu no guca ibiyobyabwenge birimo kanyanga n’inzoga zo mu mashashi, bikigaragara muri aka karere.

Mu minsi yashize muri aka Karere ka Gicumbi, hagiye humvikana ibibazo by’umutekano muke watezwaga n’abarembetsi bakubitaga abaturage batangaga amakuru y’uburyo binjiza ibiyobyabwenge mu gihugu, babikuye muri Uganda ku buryo hari n’uwo bishe.

Buri koperative muri izi eshatu yagiye ihabwa miliyoni enye z’amafaranga y’u Rwanda.

RRA ivuga ko yahisemo gutera inkunga aya makoperative kuko byamaze kugaragara ko magendu n’ibiyobyabwenge byinjizwa mu gihugu ababigiramo uruhare cyane ari urubyiruko.

Umuyobozi wungirije w’ishami rishinzwe kurwanya magendu muri RRA, Niyigaba Faustin yagize ati “ Twahisemo gutera inkunga izi koperative kuko byamaze kugaragara ko magendu ikorwa n’ibiyobyabwenge byinjizwa mu gihugu ababigiramo uruhare ari urubyiruko, kandi nirwo rwari rwiganje mu bafasha b’abantu bakora magendu, nirwo wasangaga rurimo koroshya ibikorwa byo kuyikorera, kuyambariraho no kuyikorera ku magare ndetse no ku mitwe.”

Guverineri w’Intara y’Amajyaruguru Gatabazi, avuga ko biyemeje kurwanya ibiyobyabwenge ku buryo biba amateka.

Yagize ati “Turifuza ko magendu n’ibiyobyabenge tubirwanya bikavaho burundu ku buryo icyo mwakwitega n’uko twiyemeje kubirwanya kandi tuzabigeraho. Ikindi cya kabiri n’uko kubigeraho bisaba ubufatanye bwa buri wese.”

Yongeyeho ko kuba babonye uru rubyiruko rwari rusanzwe mu bintu by’uburembetsi, bafite icyizere ko magendu n’ibiyobyabwenge bazabirwanya bakaranduka burundu muri aka Karere.

Ntambara Emmanuel wo mu Murenge wa Kaniga, winjizaga magendu mu gihugu, avuga ko iyi nkunga bahawe izabafasha kurushaho kwiteza imbere.

Yagize ati “Mbere twakoraga imirimo yo gucuruza mu buryo butemewe n’amategeko ibintu twakuye muri Uganda, ariko bitewe n’uburyo Leta yagiye itwigisha twabivuyemo ku buryo twizeye ko iyi nkunga twahawe tuzayishora mu mushinga w’ubworozi bw’inkoko kugira ngo buduteze imbere tutarinze gusubira muri buriya bucuruzi butemewe kuko buhombya igihugu.”

Yongeyeho ko bagiye no gushishikariza abandi kuva mu burembetsi kuko nta cyiza cyabwo cyane cyane ko kunyereza imisoro bidindiza iterambere ry’Igihugu.

Aya makoperative y’abahoze ari abarembetsi atewe inkunga mu gihe mu mwaka wa 2016-2017 magendu yabashije gufatwa yageraga ku gaciro ka miliyoni zirenga 590 z’amafaranga y’u Rwanda.

Ubwo hasinywaga amasezerao yo kurwanya magendu n'ibiyobyabwenge
Abayobozi bashyira umukono ku masezerano
Umuyobozi wungirije w’ishami rishinzwe kurwanya magendu muri RRA, Niyigaba Faustin avuga ko bahisemo gukorana n'urubyiruko kuko ari rwo rwishora cyane mu biyobyabwenge
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Cyusa 2018-12-06 11:59:56

Yeweweeeeee, ngo babivuyemo?!!!!ahubwo mubahaye igishoro ubwo koko ntambara akababeshya atyo?tubitege amaso.

2
Cyusa 2018-12-06 11:46:42

Yeweweeeeee, ngo babivuyemo?!!!!ahubwo mubahaye igishoro ubwo koko ntambara akababeshya atyo?tubitege amaso.

3
Manzi 2018-12-06 09:25:54

Guhemberwa gukora ubucuruzi butemewe?

Kwamamaza