IGIHE

Gen Nyamvumba yavuze ku bituma ubutumwa bw’amahoro butagera ku nshingano uko bikwiye

1 15-05-2019 - saa 16:56, Ferdinand Maniraguha

Umugaba Mukuru w’Ingabo z’u Rwanda Gen Patrick Nyamvumba yavuze ko hari ibikwiriye gukosorwa mu mikorere y’ubutumwa bwo kugarura bw’amahoro kugira ngo burusheho gutanga umusaruro.

Hirya no hino ku Isi mu bihugu byugarijwe n’imvururu Loni ifiteyo ingabo zitangwa n’ibihugu biyigize, zishinzwe kugarura amahoro.

U Rwanda ni kimwe mu bihugu bitatu bya mbere ku Isi bifite ingabo nyinshi mu bikorwa byo kugarura amahoro, aho rufite izisaga ibihumbi birindwi.

Kuri uyu wa Gatatu ku munsi wa nyuma w’Inama yiga ku Mutekano (National Security Symposium 2019) yaberaga mu Ishuri Rikuru rya Gisirikare riherereye i Nyakinama mu Karere ka Musanze, Gen Nyamvumba yavuze ko hari bimwe mu bikwiriye gukosorwa mu buryo ubutumwa bw’amahoro bushyirwa mu bikorwa.

Gen Nyamvumba wari mu kiganiro cyibanze ku mbogamizi z’ibikorwa byo kugarura amahoro n’icyakorwa ngo zikemuke, yavuze ko ubundi akamaro k’ibikorwa byo kugarura amahoro gakwiriye kugaragarira mu buzima bw’abaturage batabawe.

Icyakora yavuze ko imikoranire ya Loni n’ubuyobozi bw’ingabo ziba zagiye kugarura amahoro itorohereza itabarwa ryihuse mu gihe hagize ahagaragara ikibazo.

Gen Nyamvumba wabaye umuyobozi w’ingabo za Loni zari mu butumwa bwo kugarura amahoro i Darfur muri Sudan hagati ya 2009 na 2013, yatanze urugero rw’igihe hari umusirikare wari washimuswe n’inyeshyamba bikaba ngombwa ko bategura uburyo bwo kujya kumutabara ariko bikabanza kugorana kuko byasabaga ko habanza kubaho ibiganiro hagati y’abashinzwe ibikoresho bya gisirikare nk’indege ndetse n’uruhushya ruva ku biro bikuru bya Loni.

Yavuze ko imikorere nk’iyo yatumaga ibikorwa bitinda, bigasaba ko umuyobozi w’ingabo rimwe na rimwe afata ibyemezo akoresheje umutimanama we aho gutegereza ibisubizo bishobora kuza ubuzima bw’abari mu kaga bwatikiye.

Yagize ati “Isomo nize nuko muri Loni, iyo udafashe ibyemezo ushingiye ku bwenge bwawe biroroshye guta umutwe. Dufiteyo bwa buryo bwo gukora ibintu mu buryo busanzwe bwo mu biro, budatanga ubushobozi bwo gutabara mu buryo bwihuse mu gusigasira ubuzima.”

Yavuze ko gukoresha ubwenge ari ryo banga abanyarwanda bakoresha mu butumwa bw’amahoro nyuma y’isomo bakuye mu gutsindwa gukomeye kw’ingabo za Loni zari zaje kugarura amahoro mu Rwanda mu 1994, bigatuma ubuzima bw’abatutsi basaga miliyoni buhatikirira.

Yavuze ko impinduka zikwiriye muri Loni ku bijyanye n’imikorere y’ubutumwa bw’amahoro harimo kubaza ingabo zagiye muri ubwo butumwa ibyo zishinzwe mu gihe zananiwe.

Ati “Abashinzwe kugarura amahoro bakwiriye kubazwa ibyo bakora kandi uko babazwa bigatandukana nuko byari mu myaka ya 1990. Ibibazo byinshi abayobora ingabo mu butumwa bw’amahoro bahura nabyo n’igihe bakoze amakosa kubera ubugwari cyangwa ubunararibonye buke Loni ikaba ariyo ifata icyo gisebo. Abayobozi b’ingabo baba bagomba gufata ibyemezo bitabaye ngombwa ko bahabwa uburenganzira n’icyicaro cya Loni.”

Yavuze ko ikigomba kwitabwaho ari ubwenge n’ubushobozi by’abagiye mu bikorwa byo kugarura amahoro, kuko “iyo imyumvire yabo ari myiza bafite n’ubushobozi, mu byo bakora batanga umusaruro mwiza.”

Umujyanama, akaba n’Umuyobozi wa Komisiyo ishinzwe amahoro, umutekano n’imiyoborere mu muryango wa Afurika Yunze Ubumwe, Ambasaderi Hadiza Mustaffa yavuze ko ibibazo biri mu butumwa bw’amahoro muri iki gihe bikwiriye kuba umukoro ku mitegurire y’ibikorwa byo kugarura amahoro mu gihe kiri imbere.

Yagize ati “Reba nk’ibimaze iminsi biba muri Sudan, Algeria n’ahandi aho abaturage bajya ku ruhande rumwe, igisirikare ku rundi ruhande, amahugurwa uzaha abagiye kurindayo amahoro agomba kuba yihariye kubera ko abaturage ugiye kurinda ntibasanzwe.”

Yongeyeho ati “Ibi duhura nabyo uyu munsi, bigomba gutuma abazarinda amahoro mu gihe kizaza batangira kubitekerezaho kandi ntibagire uruhande babogamiraho. Tugomba gutegura abaturage tububakamo gushikama, tugomba kubashishikariza kwivanamo ubwoba no kubatoza kudahora ari inzirakarengane ahubwo hakagira uburyo bamenya kwirwanaho badakoresheje imbunda.”

Ambasaderi Mustaffa yavuze ko “Tugomba gucecekesha imbunda burundu, amafaranga yakabaye ajya mu bikorwa byo kugarura amahoro agakoreshwa mu guteza imbere ubukungu.”

Umuyobozi mu Muryango w’abibumbye ushinzwe ibikorwa byo kugarura amahoro, Ambasaderi Jean-Pierre François LaCroix, yemeye ko hari ibitagenda neza mu bikorwa byo kugarura amahoro kandi bikwiriye gukosorwa icyakora ashima ibimaze kugerwaho cyane cyane muri Afurika.

Yavuze ko hakwiriye kubaho gukomeza guhuza imbaraga hagati y’inzego za Loni n’ibihugu biyigize, hagashakishwa uburyo burambye bwo gukemura amakimbirane hatabayeho kohereza ingabo zo kugarura amahoro.

Ati “Iyo bigeze ku kohereza ingabo, bidusaba byinshi birimo kwitegura haba mu mutwe no mu bikoresho.”

Kugeza ubu hirya no hino ku Isi Loni ihafite ibikorwa 14 byo kugarura amahoro, bikagirwamo uruhare n’abantu basaga ibihumbi 110 baturuka mu bihugu 120 byo ku Isi.

Ibikorwa bya Loni byo kugarura amahoro bitwara nibura miliyari 7.3 z’amadolari buri mwaka.

Gen Nyamvumba wari mu kiganiro cyibanze ku mbogamizi z’ibikorwa byo kugarura amahoro n’icyakorwa ngo zikemuke
Nyamvumba wabaye umuyobozi w’ingabo za Loni zari mu butumwa bwo kugarura amahoro i Darfur muri Sudan yavuze ko hari aho bisaba ko umuyobozi w’ingabo rimwe na rimwe afata ibyemezo akoresheje umutimanama
Umugaba Mukuru w’Ingabo z’u Rwanda Gen Patrick Nyamvumba yavuze ko hari ibikwiriye gukosorwa mu mikorere y’ubutumwa bwo kugarura bw’amahoro
Umwe mu banyeshuri biga mu Ishuri Rikuru rya Gisirikare, Maj Mary Kazarwa atanga igitekerezo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Gatari j claude 2019-05-15 12:25:54

Uwomuyobozi uca amafaranga abaturage bacuruza amata nakurikiranwe kko uwo arikudindiza iterambere ry’igihugu

Kwamamaza