Gen Karamba yakomoje ku igenamigambi rikwiye mu butumwa bw’amahoro

1 12-06-2018 - saa 19:18, N.Kubwimana Janvière

Umugaba w’Ingabo zirwanira mu Kirere, Gen Maj Karamba Charles, yagaragaje ko iyo abagiye mu butumwa bw’amahoro badakoze igenamigambi rinoze, bigira ingaruka ku bagiye muri ubu butumwa ndetse zikagera no ku basivili kandi ari bo baba bagiye kurindira umutekano.

Uyu muyobozi mukuru mu Ngabo zu Rwanda yabigarutseho ubwo yatangizaga amahugurwa y’abasirikare, abapolisi n’abasivile 27, arebana no gutegura igenamigambi rihamye mu gihe bagiye mu butumwa bw’amahoro.

Ni amahugurwa yatangiye kuri uyu wa Mbere tariki ya 11 Nyakanga 2018 mu Kigo cy’Igihugu cy’amahoro, Rwanda Peace Academy, giherereye i Nyakinama mu Karere ka Musanze, akazasozwa ku wa 23 Nyakanga 2018.

Gen. Karamba yavuze ko iyo igenamigambi mu butumwa bw’amahoro ryateguwe nabi biteza ibibazo byinshi kandi bikagira ingaruka no ku basivile.

Yakomeje agira ati “Ni ngombwa ko habanza kumenywa imiterere y’aho batabaye nyuma hagakorwa igenamigambi rinoze kandi rijyanye naho bagashyira hamwe. Ndasaba abaje muri aya mahugurwa kwita ku masomo bazahabwa mu gihe cy’ibyumweru bibiri, azabafasha kunoza akazi kabo neza igihe bari mu butumwa bw’amahoro”

Umwe mu bitabiriye aya mahugurwa waturutse muri Botswana, Aliet Magogo, yavuze ko aya mahugurwa ari ingirakamaro kuko hari byinshi baba bakeneye kumenya cyane nko gutegura igenamigambi.

Yakomeje agira ati “Birazwi ko iyo uriteguye nabi ibyo wakora byose biba bipfuye. Mu gihe nzamara aha ndizera ko nzahungukira byinshi nkazanabishyira mu bikorwa igihe nzaba ndi mu kazi k’ubutumwa bw’amahoro.”

Umuyobozi w’Ikigo cy’igihugu cy’amahoro (RPA), Col. Jill Rutaremara, avuga ko aya mahugurwa ategurwa kugira ngo azafashe abagiye mu butumwa bw’amahoro kunoza akazi kabo neza.

Yagize ati “Aya mahugurwa afite icyo avuze ku bayagiyemo kuko azabafasha kumenya neza imiterere y’aho bazaba bagiye mu butumwa bw’amahoro bityo bamenye uko bategura igenamigambi rijyanye naho kugira ngo banoze akazi kabo. Iyi niyo mpamvu nyamukuru y’aya mahugurwa.”

Aya mahugurwa yitabiriwe n’abaturutse mu bihugu n’imiryango itandukanye, bagera kuri 27. Yateguwe ku bufatanye bw’Iikigo cy’igihugu cy’amahoro cy’Abongereza (BPST-A) na Komisiyo y’Umuryango wa Afurika Yunze Ubumwe.

Gen. Karamba Charles avuga ko iyo igenamigambi mu butumwa bw’amahoro ryateguwe nabi biteza ibibazo byinshi kandi bikagira ingaruka no ku basivile
Bamwe mu bitabiriye aya mahugurwa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
RUKEMANGANIZI Patrick 2018-06-13 07:10:21

Ndashimira ingabo zacu RDF uburyo zidahwema kuducungira umutekano .none nomumahanga barakataje kuhashakira umutekano Gen.KARAMBA Ibyo avuga ni ukuri iyo igenamigambi ridakozwe neza bigira ingaruka kubasivile umutekano wabo ntucungwe neza hakavamo ubuhunzi,kuvanwa mubyabo,urupfu rutunguranye rw’inzirakarengane.

Kwamamaza