IGIHE

Gen. Kabarebe yatanze ubuhamya bw’uburyo yari aguye mu gico cy’abakoresha ikoranabuhanga mu bikorwa bibi

0 14-06-2019 - saa 10:06, Evariste Nsengimana

Umujyanama wa Perezida wa Repubulika mu by’umutekano, Gen. James Kabarebe, yavuze ko uko Isi ikomeza kwihuta mu iterambere ry’ikoranabuhanga cyane cyane mu itumanaho, ari nako imitwe y’iterabwoba, inyeshyamba n’abanyabyaha babikoresha.

Gen. Kabarebe yavuze ko imitwe y’iterabwoba, inyeshyamba n’abanyabyaha bakoresha ikoranabuhanga mu buryo bw’itumanaho, akomoza ku buryo ‘yisanze bitunguranye aganira mu buryo bw’amashusho n’umwe mu mitwe y’iterabwoba hifashishijwe Video Conference’.

Gen. Kabarebe yabikomojeho ubwo hafungurwaga inama ngarukamwaka yiga ku mahoro, umutekano n’ubutabera, imwe mu zigize amasomo ahabwa abapolisi bakuru baturuka muri Afurika.

Iyi nama y’umunsi umwe yabereye mu Ishuri Rikuru rya Polisi riherereye mu Karere ka Musanze kuri uyu wa 13 Kamena, ifite insanganyamatsiko igira iti ‘Dushimangire umutekano ku mugabane wa Afurika dushingiye ku bufatanye bw’uturere’.

Gen. Kabarebe watangaga ikiganiro ku busesenguzi ku mihindagurikire y’umutekano ku mugabane wa Afurika, yavuze ko iterabwoba ari kimwe mu bibangamira umutekano w’ibihugu, abantu n’amahame mpuzamahanga.

Yavuze ko ‘ibikorwa by’iterabwaho akenshi bidakumirwa n’imipaka’ akaba ariyo mpamvu bitagira ingaruka ku gihugu kimwe, ahubwo bizigira mu karere kose bibereyemo.

Gen. Kabarebe yavuze ko afite ubuhamya bw’ibyamubayeho, ubwo yageragezaga kureba uburyo bw’itumanaho bwizewe yakoresha, agakura kuri internet porogaramu imwe ngo ayishyire muri telefone ye, agashiduka ari kuvugana na bamwe mu bagize umitwe w’iterabwoba.

Ati “Ntabwo mfite ubumenyi buhambaye mu gukoresha telefone zigezweho, nisanze nahuye mu buryo butaziguye, ngirana n’ibiganiro n’umutwe w’iterabwoba mu buryo bw’amashusho [Video Conference], birashoboka ko ari IS [Islamic State] cyangwa n’undi.”

Yakomeje agira ati “Ikibazo nasigaranye kwari ukubivamo. Icyo nakoze, nafunze telefone nshaka indi.”

Gen. Kabarebe yavuze ko rimwe na rimwe ibikorwa by’imitwe y’iterabwoba bibera inyuma y’umugabane wa Afurika ariko bikarangira ingaruka zigarutse ku banyafurika.

Umuyobozi w’Ishuri rikuru rya Polisi rya Musanze, CP Bizimungu Christopher, yavuze ko guhuriza hamwe abashinzwe umutekano bo mu bihugu bitandukanye byo muri Afurika ari umwanya mwiza bungurana ibitekerezo ku mikoranire myiza y’inzego z’umutekano muri Afurika mu gukemura ibibazo by’umutekano harimo n’ibyaha byambukiranya imipaka.

Umunyamabanga wa Leta muri Minisiteri y’Ubutabera, ushinzwe Itegeko Nshinga n’andi mategeko, Uwizeyimana Evode, yavuze ko inama zikorwa zigamije gukumira no kurwanya abagizi ba nabi nabo bazikurikirana, bityo hakwiye gushyirwaho ingamba zihariye.

Ati “Abanyabyaha nabo ibi turimo baba babikurikira, bagenda bahindura amayeri yabo. Uko bayahindura, birasaba ko abantu b’inzego z’umutekano zacu bazamura ubumenyi kandi bakarushaho gukorana neza ibikorwa by’ubufatanye.”

Uwizeyimana yavuze ko hakenewe ubufatanya bwa politiki kuko inzego z’umutekano zikora munsi y’amabwiriza ya politiki zihabwa.

Ati “Niba hari nk’ibihugu bifitanye ibibazo bya politiki cyangwa by’umutekano byagorana kugira ngo inzego z’umutekano zishobore gukorana, niyo mpamvu bamwe bakora ibyaha hamwe bakagira indiri ikindi gihugu kuko bazi ko igihugu bakozemo ibyaha kitari bubakureyo.”

Umuyobozi Mukuru wa Polisi, IGP Dan Munyuza, yavuze ko nta gihugu cyakwikemurira ibibazo by’iterabwoba cyonyine ahubwo ko ‘ubufatanye ari ngombwa mu gukemura ibibazo by’umutekano nk’ibyaha by’ikoranabuhanga, icuruzwa ry’abantu ndetse n’icuruzwa ry’ibiyobyabwenge’.

Aya masomo ahabwa abagize inzego z’umutekano baturutse mu bihugu bitandukanye. Kuri iyi nshuro hitabiriye abapolisi n’abacungagereza 30 bo mu Rwanda, Sudani, Sudani y’Epfo, Liberie, Kenya, Namibie, Nigerie, Somalie na Centrafrique.

Gen. Kabarebe James yavuze ko hakwiye gukoreshwa imbaraga nyinshi mu kurwanya ibikorwa bibi byifashisha ikoranabuhanga
Gen. James Kabarebe yavuze ko uko Isi ikomeza kwihuta mu iterambere ry’ikoranabuhanga cyane mu itumanaho, ari nako imitwe y’iterabwoba iryifashisha
Umuyobozi Mukuru wa Polisi, IGP Dan Munyuza, yavuze ko nta gihugu cyakwikemurira ibibazo by'iterabwoba cyonyine
Impuguke mu bijyanye n'umutekano ziturutse mu bihugu bitandukanye bya Afurika nizo zitabiriye iyi nama
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza