Gasabo:Umwana upima abantu ibiro asubiramo n’amasomo akomeje gutangaza abantu

43 12-01-2018 - saa 10:54, Emma-Marie Umurerwa

Imaniriho Muhamad w’imyaka 16 y’amavuko, mu biruhuko akora akazi ko gupima abantu ibiro ku munzani kugira ngo abone amafaranga yo kugura ibikoresho by’ishuri, ariko kandi iyo ari kuri ako kazi aba afashe n’ikayi asubiramo amasomo bigatangaza abamunyuraho.

Uyu mwana w’umuhungu abana na nyina hamwe n’abavandimwe be batanu mu Murenge wa Kigali mu Karere ka Nyarugenge. Se yitabye Imana.

Mu gitondo cya kare aturuka ku Giticyinyoni akajya gukora akazi ko gufasha abantu kumenya ibiro bafite imbere y’Ibiro by’Akarere ka Gasabo aho bita mu Kanserege.

Mu kiganiro yagiranye na IGIHE, yavuze ko nubwo akora urugendo rurerure kugira ngo agere aho yita ku iseta (aho akorera), izuba rikamurengeraho, imvura na yo ngo hari igihe imunyangira, ibi byose ntibimuca intege kuko intego afite ni iyo gukora uko ashoboye kugira ngo ajye abona ibikoresho by’ishuri adasabirije.

Yagize ati “Ubu ngeze mu mwaka wa gatanu w’amashuri yisumbuye ku ishuri rya Rusumo High School mu ishami rya Physique, chimie na Biologie. Maze imyaka myinshi nkora akazi ko gupima abantu ibiro ku munzani mu biruhuko, nkagafatanya no gusubiramo amasomo kugira ngo ninsubira ku ishuri ntazaba naribagiwe ibyo nize.”

Imaniriho avuga ko nyina acuruza imboga i Nyabugogo, akaba adafite ubushobozi bwo kumwishyurira amashuri ndetse no kumubonera ibikoresho.

Yagize ati “Mama nta bushobozi afite bwo kunyishyurira amashuri ni abantu b’abagiraneza bateranya bakanyishyurira, biba bigoye ariko ndashima Imana ko ngeze mu mwaka wa gatanu. Nanjye rero mu biruhuko nkora uko nshoboye ngakora aka kazi ko gupima abantu ibiro kugira ngo nzabone ibikoresho by’ishuri ntasabirije”.

Akomeza agira ati “Icyifuzo cyanjye ni uko nabona abantu bamfasha bakanyishyurira amashuri nkiga nkarangiza, kuko ibindi byose ntafite uyu munsi nazabyiha”.

Hari inama agira abanyeshuri bari mu biruhuko n’abandi bafite ubushobozi buke nk’ubwo afite. Ati “Abana bari mu biruhuko nabagira inama yo kujya bibuka gusubiramo amasomo bakirinda kwirirwa bazerera. Abafite ubushobozi buke na bo nabagira inama yo kujya bashaka imirimo bashoboye bakayikora ariko ntibave mu ishuri”.

Inzozi za Imaniriho ni uko yazarangiza amashuri yisumbuye agakomeza muri kaminuza, akaba yifuza kuzaba umuganga.

Ubwo twamusuraga aho akorera, abantu batandukanye bamunyuragaho bakamutangarira abandi bakimyoza.

Umwe mu bo twaganiriye yagize ati “Uyu mwana maze imyaka myinshi mubona hano mu biruhuko acuruza umunzani, aba yambaye imyenda imeshe, afashe ikayi asubiramo amasomo. Agaragara nk’umwana wababaye ariko ubona ko afite icyerekezo”.

Undi yagize ati “Hari umwana ubona ukabona ko azagera kure. Uyu muhungu nkunda kumubona hano mu gitondo cya kare, ninjoro nabwo aba ahari afashe ikayi, iyo abonye butangiye kwira yisunga amatara yo ku bipangu kugira ngo abashe gusoma ibyanditse mu ikayi. Uyu mwana aratangaje”.

Uyu mwana akora akazi ko gupima abantu asubiramo n'amasomo
Imaniriho iyo ategereje umukiliya umwanya we ntawupfusha ubusa, aba asubiramo amasomo
Imaniriho akora aka kazi afite intego yo kwishakira ibikoresho by'ishuri

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2 | 3 | 4 | 5  

1
Sylvere 2018-01-20 08:21:54

Igitekerezo nuko mampa contact z’uwo muhungu nkazivuganira nawe azanyandikire kuri email anyibwire nzabyibuka haricyo namufasha uko cyangana kose

2
Udahemuka 2018-01-15 02:59:56

yoo bibaye byiza mwaduha namba ye.

3
uwamariya beatrice 2018-01-14 08:12:43

Andika hanoinkuru yawe yari nziza ariko urigutinda Gutanga contact zuwo mwana. kugirango umuntu amenye uko yasaranganya n abandi, kdi hageze

4
Maniraguha Jean de Dieu 2018-01-14 07:23:02

Maniriho, ihangane wige murubwo buzima nanjye nitwa Maniraguha Jean de Dieu nize mubuzima bugoranye nkubwo bwawe, naje kugira amahirwe njya muri kaminuza, ndangiza ntuwa mbere mugihugu mu mibare, nubwo ntarabona akazi, cg scholarchip, ko meza ushyiremo imbaraga. nanjye nize mathematics, physics and chemistry muri secondaire.

5
Nshimye emmy 2018-01-13 05:08:53

Ndabona nta numero ze mwashyizeho ninza kuhanyura ndazimwaka nzibahe

6
Bebe 2018-01-13 03:20:57

mfite ibitabo bya physique nakoreshaga cyera nkiga, mwampa numero ye nkazabimugezaho kobyazamufasha.

7
Batigole 2018-01-13 00:01:24

Ndasaba Abanyamakuru b’igihe gushaka uburyo twafasha uyu mwana nawe Ni uwacu. Muduhereze contact cg mudufashe gushyiraho Foundation yo gufasha nabandi Bana bameze gutyo! Gusa duhere kuri Maniriho. Muduhuze kuko iyi nkuru yanyu yarangiye ntakintu mumufashije, mumushake muduhuze vuba amashuli ataratangira! Icyo tugiye gukora Ni ugu sharing iyi nkuru Ku mbuga nkoranya mbaga kd nziko bitanga umusaruro.

8
Chulo 2018-01-12 23:55:38

Oh God!
Uyu mwana ni urugero rwiza mu buzima, umuntu wese yamwigiraho!
Muduhe contact ye!

9
Ntihemuka 2018-01-12 20:49:59

Mwangezaho you mwana nkaganira nawe. Akwiriye gufashwa.

10
Nizeyinana philemon 2018-01-12 17:03:32

nakomeze yige aduteye inkunga yokugira intego ikomeye yokwirwanaho ugamije kugira ahowigeza ntagusabiriza

Paji: 1 | 2 | 3 | 4 | 5  

Kwamamaza