EU yijeje u Rwanda ubufatanye mu kwigobotora inkunga z’amahanga

6 10-05-2018 - saa 11:23, Ferdinand Maniraguha

Umuryango w’Ubumwe bw’Ibihugu by’i Burayi (EU) wijeje u Rwanda ubufatanye mu kwiteza imbere no kwishakamo ibisubizo hagamijwe ko narwo rugira ubushobozi rugahagarika kubeshwaho n’inkunga z’amahanga.

Ubwo bufasha Ambasaderi wa EU mu Rwanda, Nicola Bellomo, yabuvuzeho ku mugoroba wo kuri uyu wa Gatatu mu birori byo kwizihiza umunsi wahariwe ubumwe bw’u Burayi (Europe Day), wizihirijwe mu rugo rwe i Kigali.

Tariki ya 9 Gicurasi buri mwaka, ibihugu bigize EU byizihiza uyu munsi nk’intangiriro z’ukwihuza kwabyo mu 1950 ubwo uwari Minisitiri w’Ububanyi n’amahanga w’u Bufaransa, Robert Schuman, yasabaga ko ibihugu by’i Burayi byakwihuriza hamwe mu kongera umusaruro w’amakara (Caol) n’ibyuma. Uko kwihuza niko kwaje kuvamo EU.

Muri ibi birori byitabiriwe n’abanyaburayi, abadipolomate n’abandi bayobozi batandukanye, Bellomo yavuze ko akurikije ubushake n’intego z’u Rwanda rufite hari igihe ruzagira ubushobozi rukareka kurambiriza ku nkunga z’amahanga.

Bellomo yavuze ko ashingiye aho u Burayi bwaturutse nta kabuza ko n’ibindi bihugu bikoranye byakwiteza imbere.

Yagize ati “Mu gihe cya Schuman, u Burayi bwari ahandi hantu. Wari umugabane wasenyutse nyuma y’Intambara ya Kabiri y’Isi yose. Umugabane wari wuzuye urwango, nta cyizere, ubukene n’inzego zijegajega. Ibyo Schuman yakoze aduhuriza hamwe ngo tugire akarere karimo amahoro, ubwigenge n’uburumbuke, hari ababonaga ari inzozi zidashoboka.”

Yakomeje avuga ko mu mezi hafi ane amaze mu Rwanda, asanga narwo ari igihugu kizigobotora inkunga z’amahanga.

Ati “Intego yacu y’igihe kirekire ni ugufasha u Rwanda kuzigobotora inkunga zacu […] Ntabwo abaterankunga nabo bahejwe ariko ntushobora kugendera ku nkunga ubuzima bwawe bwose kuko ibyo ntibiramba […]Hari igihe igihugu nk’u Rwanda kizaba igifite amikoro ahagije ndetse kinaharenga wenda kibe cyanafasha ibindi bihugu ariko igikomeye ni ukubaka ubufatanye bwungukira twembi, kandi ubucuruzi ni kimwe mu byatuma twese twunguka.”

Muri miliyari 2,443.5 Frw yagaragajwe mu mbanzirizamushinga y’ingengo y’imari u Rwanda ruzakoresha mu mwaka wa 2018/2019, bigaragara ko 62 % ari amafaranga azaturuka imbere mu gihugu.

Bellomo yavuze ko ubu bari gushaka uko ibikomoka mu Rwanda byakwigaragaza ku masoko y’i Burayi ari nako bashishikariza abashoramari b’i Burayi kurushorama imari yabo.

Minisitiri w’Imari n’Igenamigambi, Dr Uzziel Ndagijimana, yavuze ibibazo u Burayi bwanyuzemo ngo bugere aho bugeze ari ikimenyetso cy’uko iyo ufite intego ntacyo utageraho nubwo wanyura mu bikomeye.

Ati “EU yagiye ihura n’ibibazo ubwo yari mu nzira zo kwihuza ariko ibibazo ni ibisanzwe iyo ibihugu bigerageza kubaka umubano ku nyungu za bose. Niyo mpamvu aha mu Rwanda no muri Afurika tukizeye umubano mwiza na EU kuko iyo umubano uhari uko inzira yaba igoye kose, tugomba guhora dufunguye mu mutwe tureba ibyakunze n’ibyanze ariko tugaharanira ko tudacika intege ku cyo twifuza kugeraho.”

Dr Ndagijimana yavuze ko EU imaze gutera inkunga u Rwanda igera kuri miliyoni 500 z’amayero mu bijyanye n’ingufu, ibikorwaremezo, ubuhinzi n’ibindi.

Mu minsi ishize, Banki y’Ishoramari y’Abanyaburayi (European Investment Bank, EIB) yatanze inguzanyo ya miliyoni 45 z’amayero yo gutunganya imyanda muri Kigali; yanatanze miliyoni 87 z’amayero muri bimwe mu bigo by’imari mu Rwanda agamije guteza imbere imishinga mito n’iciriritse mu Rwanda.

Ambasaderi wa EU mu Rwanda, Nicola Bellomo
Ibirori bya Europe Day byabereye mu rugo rwa Ambasaderi wa EU mu Rwanda

<

Minisitiri w'Imari n'Igenamigambi, Dr Uzziel Ndagijimana
Minisitiri w'Ibikorwaremezo, Amb. Gatete Claver
Minisitiri w'Ubucuruzi n'Inganda, Vincent Munyeshyaka
Ambasaderi w'u Buyapani mu Rwanda, Takayuki Miyashita
Uhereye ibumoso: Umuyobozi wa EIB muri Afurika y'Uburasirazuba, Catherine Collin; Minisitiri w'Imari n'Igenamigambi, Dr Uzziel Ndagijimana na Ambasaderi wa EU mu Rwanda, Nicola Bellomo

Amafoto: Muhizi Serge

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Maso 2018-05-10 11:25:18

Ariko iby’abategetsi bacu bavuga birasetsa ngo abazungu bavuze ibanga ryo kubigobotora. Sinzi niba ibyo mwandika ari ibyavuzwe cyangwa muhimba. Nimwifotoze ubundi murye cash iby’ibanga byo mubireke kuko n’ubundi icyadukiza ntimukiyobewe. Akabyica kabizi karya imboga karitse

2
Mateka 2018-05-10 09:06:20

Mwagiye mureka ra,ni ryari abazungu bagufashije kubigobotora?abanyarwanda nitwe twenyine tuzifasha kubigobotora kandi nta gikomeye kirimo,dushyire hamwe ab inda nini bazigabanye maze urebe ko tutaba paradizo mu isi

3
degau 2018-05-10 07:31:25

Muzajye muba conséquents. Ni gute mwavuga "kwigobotora" inkunga y’amahanga ? Mu gihe na Leta Zunzwe Ubumwe bw’America ikenera inkunga nayo. Ahubwo twavuga kuzamura "arrogance level". Barashaka kugufasha, nawe uti ndifite. Byahehe ! Ahubwo ni twige ukuntu twabyaza umusaruro izo nkunga z’amahanga, byadukundira zikaza ari nyinshi. Cyari igitekerezo cyanje. Murakoze.

4
king 2018-05-10 07:05:43

Minister w’imari bado ntabwo arakamirika reba iyi photo yanyuma ntabwo kabisa yahagaze neza ngaho nawe reba photo ya EMB Gatete na Nyagahene muzurisaana

5
Yayely 2018-05-10 05:25:17

None se Niba EU iza fasha urwanda kure ka inkunga z amahanga .....haaaa EU yo se ni iya he? Ni Inyarwanda?
Kuki musetsa no mu bikomeye!!!

6
mmm 2018-05-10 05:17:01

abafaransa ni abahanga ,batangiye kwinjira neza muri afurika nyine ,niyo bafasha mukeka ko bo ari injiji zidakeneye inyungu.ni amareshya mugeni yo gufasha igihugu cyacu si urukundo ,kubera ko byanga bikunda batabigizemo uruhare turimo gutera imbere kandi igihugu cyacu,cyabahuza ni ibindi bihugu noneho inyungu bifuza bakazigeraho uko bashaka.ahubwo EAC ni isigasirwe neza itazacibwamo ibice kubw’inyungu z’abafaransa.nimureba nabi abafaransa ,bazigarurira EAC kuko bakize kuyirusha ni imbaraga barazifite kuburyo bashobora kuba impogamizi za EAC murwego rwokubasahura imitungo bakeneye.

Kwamamaza