IGIHE

Ese abashoramari b’Abanyarwanda biteguye gushyira miliyari y’amadorali mu mushinga wa Gari ya moshi?

4 13-06-2019 - saa 13:43, Habimana James

Ibihugu by’u Rwanda na Tanzania bifitanye umushinga ukomeye wo kubaka umuhanda wa Gari ya moshi uzaba ureshya n’ibilometero 532 ukazatwara akayabo ka miliyari 3.6 z’amadolari ya Amerika.

Uyu ni umushinga ibihugu byombi bihanze amaso cyane cyane ku ruhande rw’u Rwanda, rusanzwe rudakora ku Nyanja.

Umunyamabanga wa Leta muri Minisiteri y’Ibikorwa Remezo, ushinzwe gutwara abantu n’ibintu, Eng. Uwihanganye Jean de Dieu, aherutse kubwira abadepite ko uyu mushinga nuramuka urangiye uzafasha mu buryo bukomeye iterambere ry’u Rwanda.

Kimwe mu bibazo bikomeje kugaragara muri uyu mushinga ni uko uhenze kuko ufite kilometero 532 muri rusange, ku ruhande rw’u Rwanda uzava Rusumo ugere mu Mujyi wa Kigali ariko haziyongeraho agace kagera ku Kibuga cy’Indege cya Bugesera.

Ku ruhande rw’u Rwanda uyu muhanda uzaba ureshya na kilometero 138 mu gihe ku ruhande rwa Tanzania ari kilometero 394. Ku gice cya Tanzania uzatwara miliyari 2.3 naho ku Rwanda ni miliyari 1.3 z’amadorali.

Tanzania izajya ikoresha amadorali ya Amerika miliyoni 5 mu kubaka ikilometero kimwe mu gihe ku ruhande rw’u Rwanda ari miliyoni icyenda z’amadolari.

Mu Rwanda birahenze kubera ko aho uyu muhanda uzanyura hari imisozi kurenza Tanzania.

Uwihanganye yabwiye Abadepite ati “Nk’u Rwanda twamaze gukora inyigo, nk’uko kandi mubizi nk’u Rwanda duteza imbere abikorera niyo mpamvu twumva ko uyu mushinga wazakorwa hagati y’abikorera na leta ariko abo muri Tanzania bo bavuga ko igihugu aricyo kigomba gushaka amafaranga kikabyikorera, ibi nibyo biganiro bihari.”

Yakomeje agira ati “Byagaragaye neza ko uramutse uri nka leta ukajya gushaka amadeni byagora, urumva miliyari 3.6 cyangwa se miliyari 1.3 ku Rwanda kuyafata nk’ideni biragoye, keretse uhagaritse ibindi byose wakoraga. Igishoboka ni uko twazanamo abikorera kugira ngo bigabanye amadeni ku gihugu, ibyo nibyo tukiganiraho kugira ngo tubanze twumvikane.”

Abashoramari b’u Rwanda icyo bavuga kuri uyu mushinga

Aganira na IGIHE, Umuyobozi w’Urugaga rw’abikorera mu Rwanda, Robert Bapfakurera, yavuze ko bikiri umushinga ariko ibyo aribyo byose ko leta nimara kuwunononsora biteguye gufatanya.

Yagize ati “Nzi ko leta ikiga umushinga itarawunonosora neza kugira ngo abantu babe baganira turebe ni angahe akenewe, abashoramari bazashyiramo 100% cyangwa hari uburyo bazafatanya?. Igihe umushinga uzaba urangiye bamaze kuwunononsora abashoramari bo mu Rwanda ndetse n’abo hanze bazaganira barebe uko byakorwa.”

Tanzania yemeye ko ahazava amafaranga hose nta kibazo

Ambasaderi wa Tanzania mu Rwanda, Ernest Jumbe Mangu, yavuze ko nta kibazo gihari ku ho igihugu kizavana amafaranga kuko buri kimwe kizubaka agace kacyo.

Yabwiye IGIHE ati “Niba igihugu cyahitamo ubufatanye n’abikorera nta kibazo gihari, niba Tanzania nayo yahitamo gukoresha amafaranga yayo nta kibazo rwose, icya ngombwa ni uko igihugu kigomba kubaka igice cyacyo”.

“Ikiriho ni ugushaka abashoramari bashobora gushyira amafaranga yabo muri iki gikorwa, icya kabiri ku gice cya Tanzania nayo igiye kwiguriza amafaranga ahari ho hose.”

Izi Gari ya Moshi zizaba zifite umuvuduko udasanzwe kuko itwara abagenzi izajya igenda ibilometero 120 ku isaha, mu gihe itwara imizigo yo izajya igenda ibilometero 80 ku isaha kandi zikoresha amashanyarazi.

U Rwanda rwavuze ko nitangira gukora bizagabanya igiciro ho 40% cy’ubwikorezi bigire ingaruka nziza ku byo u Rwanda rwohereza mu mahanga n’ibyo ruvanayo.

U Rwanda ruvuga ko mu 2019/20 ari umwaka wo gushaka amafaranga azakoreshwa naho mu 2020/21 bikaba gushaka rwiyemezamirimo.

Gari ya moshi itwara abantu izajya ikoresha umuvuduko wa kilometero 120 ku isaha
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
nkundimana 2019-06-13 23:50:20

Amajyambere arambye ku Rwanda n’akarere ntibishoboka nta transport. Uyu ni umushinga mwiza kandi wagirira akamaro cyane u Rwanda ndetse na Tanzania ku buryo bw’umwihariko.

Tanzania ifite potential ya industrialisation ikomeye kandi na investisseurs étrangers barabibona, Darisalamu ishobora kuba kimwe mu byambu bikomeye kandi hakaba n’inganda zo mu rwego rw;Abashinwa. Ikibazo gikomeye ni uko Abatanzaniya ari abanebwe cyane. bakeneye abaza kubafasha gusa ntibakunda abanyamahanga. Inzozi rero mfite kuzishyira mu bikorwa ntibyoroshye.
U rwanda narwo rwa kagura inganda zicishirije, ariko rwaba na transit hagati ya congo na Tanzania. Tanzania ikeneye rero isoko mu Rwanda, Congo, u burundi na Uganda y’epfo.
Ntibikomeye kuko Abanyamerika, abashinwa n’abanyabura biteguye delocalisation muri Africa.Ni wo mugabane usigaye aho labour cost ikiri hasi.Tanzania rero ikuyeho imbogamizi byatugirira akamaro twese.

Ariko mbere ya byose...AMAHORO,AMAHORO,AMAHORO. Sinzi niba ikibazo u Rwanda rwagiranye na Tanzania cyararangiye. Ese u Rwanda n’abanyekongo twariyunze maze birarangira? Ese tumeranyeanye dute n’Abarundi? Iby’Abaganda byo siniriwe mbivuga!

Biragoye ariko nibyiza kurota kandi ukabyuka ushyira mu bikorwa ibyo warose.

Imana iduhe amahoro, twunge ubumwe ibindi bizizana.
Vive, le Rwanda, vive la région, vive l’Afrique!

2
rk 2019-06-13 09:18:10

ni byiza cyane! ibi byose bigendane n’amahoro mukarere kacu ubundi urebe ngo africa irazamuka rwose! Imana ibidukorere

3
Richard 2019-06-13 07:43:15

Iki gitekerezo nicyiza numushinga ugaragara ko watanga igisubizo kirabye cyubwikorezi cyabaye ingutu mu Rwanda ndetse no muri kigali wenda naho ikibazo cya transport cyakemuka niramuka ihageze!!psf rwose mugerageze uwo mushinga ntuzadindire

4
john 2019-06-13 07:40:33

amafranga ni menshi, biragoye pe...u Rwanda ntirufite ubushobozi bwo kuwigondera bitarugoye. N’abikorera ku giti cyabo b’abanyarwanda simbona ubushobozi bwakwegeranya miliyari na miliyoni maganatatu y’amadorari. Leta niyo yafata umwenda w’igihe kirerekire ngo ibigereho. Ikindi isoko ryacu ni rito gari ya moshi isutse ibicuruzwa kabiri mu cyumweru yahaza isoko ry’u Rwanda byibura ukwezi. abagenzi nabo si benshi bakuzura train inshuro nyinshi ku cyumweru. Ibyiza leta yake umwenda muremure bibe igikorwa k’igihugu. Ni nako Tanzania igiye kubigenza.

Kwamamaza