IGIHE

Dutewe ishema no kwitwa abana banyu- Madamu Jeannette Kagame abwira ababyeyi b’Intwaza

8 9-06-2019 - saa 06:57, Habimana James

Madamu Jeannette Kagame yashimiye ababyeyi bagizwe incike na Jenoside yakorewe Abatutsi mu 1994, bahawe izina ry’Intwaza, uburyo bakomeje kwiremamo icyizere cyo kubaho, ababwira ko abanyarwanda batewe ishema no kwitwa abana babo kandi bazakomeza kubaba hafi.

Yabigarutseho kuri uyu wa Gatandatu mu Murenge wa Mukura mu Karere ka Huye, aho yifatanyije n’ababyeyi batujwe mu nzu yiswe ‘Impinganzima’ yatujwemo intwaza 100 barimo abasaza umunani, ikaba yarubatswe n’Umuryango Unity Club ‘Intwararumuri’ n’abafatanyabikorwa batandukanye.

Byari mu gikorwa cyo kwifatanya nabo kwibuka Jenoside yakorewe Abatutsi.

Madamu Jeannette Kagame akaba n’Umuyobozi w’Ikirenga wa Unity Club, yabwiye aba babyeyi ko ubwo uyu muryango uherukayo mu birori byo gusoza umwaka, babatumyeho kandi ubwo butumwa bwabagezeho, ibi bikaba biri mu byatumye baza kubasura uyu munsi no kwifatanyo na bo.

Ati "Nyuma y’ibikomere byinshi mwahuye nabyo byaba ibyo ku mubiri n’ibyo tutabona, mwiremyemo icyizere cyo kongera kubaho kandi mwabigezeho. Duhora tubashimira ko mwakomeje ubuzima mukabaho kandi tukongera kugira umuryango n’igihugu.”

Madamu Jeannette Kagame yabwiye aba babyeyi ko abanyarwanda bishimira kwitwa abana babo.

Ati "Dutewe ishema no kwitwa abana banyu mukomeze kutubera urugero rwiza, babyeyi bacu turabasabira iteka ryose, u Rwanda duhekeye rukomeze kugira Intwari zimwe zibasha kwirenga zikitangira u Rwanda ngo tutazongera kugira ibyago bihogoza ababyeyi beza nkamwe."

Yavuze ko aba babyeyi bibutsa igisobanuro cy’umubyeyi, ariyo mpamvu abanyarwanda bagombaga kubabera aho ababo batari, bakabaganiriza nk’uko ababo bari bubigenze.

Madamu Jeannette Kagame kandi yashimiye ababitaho umunsi ku munsi mu gukira ibikomere no kongera kwiyubaka, avuga ko bazakomeza kubaba hafi, avuga ko ubuzima bw’aba babyeyi bureba buri munyarwanda.

Umunyamabanga Nshingwabikorwa wa Komisiyo ishinzwe kurwanya Jenoside (CNLG), Dr. Bizimana Jean Damascène, yabanje kwihanganisha Intwaza ababwira ko nubwo bari mu bihe bikomeye bakwiye gukomera kuko igihugu bafite kibakunda.

Umuyobozi wa AVEGA-Agahozo, Mukabayire Valérie, yihanganishije ababyeyi b’Intwaza muri ibi bihe bikomeye byo kwibuka ku nshuro ya 25 Jenoside yakorewe Abatutsi, abasaba gukomeza kugaragaza ubutwari.

Yashimiye leta y’ubumwe bw’abanyarwanda yabashyirireho uburyo bwo kwibuka kuko bifasha gusubiza agaciro n’icyubahiro abishwe mu gihe cya Jenoside.

Ati “Iyo twibuka Jenoside, twibuka ubutwari bw’Inkotanyi zayihagaritse ziyobowe na Perezida Paul Kagame, wayoboye urwo rugamba agakomeza n’urugamba rwo gushakira abanyarwanda imibereho myiza muri rusange, n’abarokotse Jenoside by’umwihariko. Abanyamuryango ba AVEGA, barabashimira ko mwahagaritse Jenoside mukadusiza agaciro n’ubuzima.”

Perezida w’Umuryango uharanira inyungu z’abarokotse Jenoside yakorewe abatutsi mu 1994, IBUKA, Prof. Dusingizemungu Jean Pierre, yavuze ko kubera uburyo Ingabo zahoze ari iza RPF Inkotanyi zakoze akazi gakomeye zikabarokora, byatumye bagirana igihango badateze gutatira.

Umubyeyi Azela Nyirangirumwami, umwe mu ntwaza zituye mu rugo Impinganzima ya Huye yagejeje ku bitabiriye iki gikorwa cyo kwibuka, ubuhamya bwe. Umubyeyi Azela watujwe muri uru rugo aturutse mu karere ka Ruhango, yavuze ko mu gihe cya Jenoside yari afite umugabo n’abana bane ariko bose bishwe kandi kugeza uyu munsi akaba atazi nimba barashyinguwe mu cyubahiro.

Yavuze ko nubwo we na bagenzi bari babayeho mu buzima bubi, bakomeje gutwaza, anashimira Madamu Jeannette Kagame wabise izina ‘Intwaza, kuko yabise zina rijyanye n’uko bakomeje gutwaza nubwo bahuye n’ibibazo bikomeye.

Agira ati “Ubu aho turi turateteshwa, batwitaho, bamenya uko twaramutse, duhabwa ibitwubaka umubiri byose.”

Iyi nzu y’Impinganzima ya Huye, yatwaye arenga miliyoni 406 z’amafaranga y’u Rwanda kugira ngo yuzure.

Intwaza ijana nizo zatujwe mu rugo rwiswe Impinganzima mu Karere ka Huye
Madamu Jeannette Kagame yashimye uburyo Intwaza zikomeje kwiremamo icyizere cyo kubaho
Hafashwe umunota wo kwibuka inzirakarengane za Jenoside yakorewe Abatutsi
Abayobozi b’Ingabo na Polisi mu Ntara y’Amajyepfo bari bitabiriye iki gikorwa
Igisonga cya Musenyeri wa Diyosezi ya Butare, Musenyeri Gahizi Jean Marie Vianney
Madamu Jeannette Kagame ageza ijambo ku bitabiriye umuhango wo Kwibuka25 wabereye ku nyubako zatujwemo abagizwe incike na Jenoside biswe Intwaza i Nyanza na Huye
Umuhanzi Mariya Yohana yifatanyije n’Intwaza n’abandi bitabiriye umuhango wo kwibuka ku nshuro ya 25 Jenoside yakorewe Abatutsi
Umunyamabanga Nshingwabikorwa wa CNLG, Dr Bizimana yabwiye Intwaza ko bafite igihugu kibakunda
Umuyobozi wa AVEGA-Agahozo, Valerie Mukabayire yashimiye ubuyobozi burangajwe imbere na Perezida Kagame
Umwe mu Intwaza Azela Nyirangirumwami yasangije abitabiriye uyu muhango ubuhamya bw'ibyiza baboneye mu Impinganzima
Perezida wa IBUKA Prof Jean Pierre Dusingizemungu yashimiye Inkotanyi zahagaritse Jenoside yakorerwaga Abatutsi
Umuhuzabikorwa w'urugo rwa Impinganzima, Delphine Umuterambabazi, niwe wari umusangiza w'amagambo
Madamu Jeannette Kagame ubwo yaramutsaga umwe mu basaza umunani batujwe mu rugo 'Impinganzima'
Umuyobozi w'Akarere ka Huye, Ange Sebutege yifatanyije n'Intwaza mu muhango wo kwibuka ku nshuro ya 25 Jenoside yakorewe Abatutsi

Amafoto: Moise Niyonzima

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Titi 2019-06-11 12:51:13

Ariko hari ighe njya nibaza iyo FPR Inkotanyi idatsinda, abica bakica bakaruha wenda hakagira abahonoka nk’uko mu myaka yabanje za 59, 61, 73, 91 bica mu Bugesera ... bicaga bageraho bakaba baretse, nibaza uko izi ntwaza cg n’abandi twarokotse Genocide tuba tumeze! Tudafite uburenganzira bwo kwibuka abacu, abagizwe incike ntawubibuka, imfubyi ntizige, n’ibindi byinshi. Ibi byose nibyo bintera gushima Imana n’abo yakoresheje mu kuturokora, ariko by’umwihariko our First Lady nta magambo tuzigera tubona yo gushima umutima wa kibyeyi agira. Imana ibahe kurambwa ingoma igihumbi, kandi ntituzigera tubatetereza.

2
mahoro 2019-06-10 05:35:16

Uyu mubyeyi impuhwe agirira ababaye n’abaciye bugufi, Imana yo mu ijuru izajye ihora ibimwibukiraho, First Lady namugereranya na Tabita wo muri Bibiriya, wowe n’umuryango wawe Imana ijye ibarinda muri byose, kandi izabahe kuramba kugira ngo ubwoko bwayo bukomeze bunezezwe n’ineza, urukundo n’impuhwe byanyu. ni wowe mutima w’urugo ukwiye umukuru w’Igihugu rwose. Inama yaramuyoboye akurambagiza, mama nanjye ndagukunda cyane......

3
R.A 2019-06-09 10:17:11

Uwavuga iby’URWANDA ntiyarangiza...Twishimire ko Ruhumeka.

4
Albert 2019-06-09 07:12:39

wa Mubyeyi we Imana yo mwijuru izabahembe, kuva kuri H.E nu muryango we iyo mbona ukuntu mwitangira abanyarwanda mbura icyo mvuga gusa Imana yo mwijuru izabiture ibyiza mudukorera.

5
Rda 2019-06-09 05:35:41

Mubyeyi mwiza turagushimye ukuntu mwita ku ndushyi muziruhura. Imana ikubere byose.

6
zipompapompa 2019-06-09 03:35:18

iyo mbagwa gitumo nari kubavumba tu niriwe mukazi ka leta

7
khaliif 2019-06-09 03:21:21

THE MOTHER OF THE NATION.

8
Ndugu 2019-06-09 03:03:21

Mola alinde wale ambawo wamesayidiya hao wazee na awape kila la kheri na fanaka

Kwamamaza