Dufite ibibazo byiza - Minisitiri Shyaka avuga ku musaruro w’ubuhinzi n’ubworozi

3 8-11-2018 - saa 20:36, Ishimwe Israel

Ibiza byibasiye ibice bitandukanye by’igihugu byatumye imyaka yangirikira mu mirima ndetse umusaruro wari witezwe uragabanuka. Ibi byatumye abenshi bazamura ibiciro.

Ubushakashatsi bwakozwe na Sosiyete Sivile bwerekanye uko ubuhinzi bw’ibirayi, umuceri n’ibigori buhagaze mu Rwanda n’ibibazo biburimo.

Bwagaragaje ko abahinzi b’ibirayi 77.9%, bagurisha ku giciro bategetswe.

Iyi ngingo yagarutsweho kuri uyu wa 8 Ugushyingo 2018 mu kiganiro n’itangazamakuru cyahuje Minisitiri w’Ubucuruzi n’Inganda, Hakuziyaremye Soraya; uw’Ubuhinzi n’Ubworozi, Dr. Mukeshimana Gérardine n’uw’Ubutegetsi bw’Igihugu, Prof. Shyaka Anastase.

Ikibazo gikomeye cyavuzwe mu buhinzi bw’ibirayi ni ibyaboreye mu mirima mu Majyaruguru mu 2017, ba nyirabyo babujijwe kubisarura. Byaje kuba bike ku isoko, ababisigaranye bahanika ibiciro.

Minisitiri w’Ubucuruzi n’Inganda, Hakuziyaremye Soraya, yavuze ko gushyiraho ibiciro biba bigamije gufasha abahinzi kudahendwa.

Yagize ati “Mu myaka itatu ishize ikilo cy’ibirayi cyaguraga 50 Frw. Abantu bakwiye kumva ihindagurika ku isoko. Ni yo mpamvu ibiciro bihora bisuzumwa. Igenzura rikorwa mu makoperative ariko hari ikibazo cyo kutabamenyesha. Turashaka gukorana na bo ngo ayo makuru agere ku bo yagenewe ntihagire ababirenganiramo.”

Mu kurengera inyungu z’abahinzi hashyizweho itsinda ry’abantu 32 rigenzura uko cyubahirizwa. Ubu abarenga 145 batabyubahirije barahanwe.

Minisitiri Prof. Shyaka yavuze ko intego ihari ari ugusigasira inyungu z’umuturage.

Yagize ati “Uyu munsi dufite ibibazo byiza. Kera twagiraga ibibazo by’umusaruro, tukabura ibyo kurya bihagije. Ubu turavuga ibirayi, amata, umuceri ukavuga isoko. Bya bihingwa twitaga ngandurarugo byabaye ngengabukungu. Ubu umusaruro wabaye mwinshi udutera ibibazo.”

“Ibibazo byiza bidusunikira mu kindi cyerekezo aho abakora umwuga w’ubuhinzi baba bake ariko bakarushaho gukira. Tuzongera umusaruro, ubu turacyagerageza.”

Sosiyete Sivile yavuze ko u Rwanda rukeneye ikoranabuhanga mu guhunika ibirayi, ryagoboka umusaruro w’ibyangirika.

Minisitiri w’Ubuhinzi n’Ubworozi, Dr. Mukeshimana Gérardine, yavuze ko gushyiraho icyuma gikonjesha ibirayi atari ibanze kuko hari ubundi buryo bworoshye.

Ati “Ubu turi kubona ibibazo kandi bituma abantu bagira ibitekerezo. Ubu twavuga imbaraga zishyirwa mu kongerera umusaruro agaciro. Amakusanyirizo mu gucunga umusaruro w’ibirayi ni yo meza ugereranyije n’ubushobozi buhari. Icyo cyuma gishobora kubaho ariko koperative zikabura amashanyarazi atuma zikora.”

Yavuze ko imbogamizi zirimo igishoro, ubumenyi bwo kubikora zituma umusaruro utaba mwinshi nkuko byifuzwa.

Dr Mukeshimana yavuze ko ku musaruro w’amata, isoko rya Uganda na Kenya ryatakaye bikagira ingaruka ku bucuruzi.

Mu buhinzi bw’umuceri hashyizweho inganda 25 ziwutunganya mu guhaza isoko ry’u Rwanda.

Inganda zari zifite abahinzi amafaranga y’u Rwanda agera kuri miliyari n’igice zimaze kubishyura asaga miliyoni 480 Frw.

Izi minisiteri ziri gufatanya mu kunoza uruhererekane rw’uburyo umusaruro wongererwa agaciro.

Minisitiri w’Ubucuruzi n’Inganda, Hakuziyaremye Soraya, yavuze ko gushyiraho ibiciro biba bigamije gufasha abahinzi kudahendwa
Minisitiri w’Ubuhinzi n’Ubworozi, Dr. Mukeshimana Gérardine, yavuze ko gushyiraho icyuma gikonjesha ibirayi atari ibanze kuko hari ubundi buryo bworoshye
Prof Shyaka yavuze ko kuba umusaruro uboneka hakabura amasoko, ari ibibazo byiza

Amafoto: Niyonzima Moïse

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Uwineza Johnson 2018-11-09 15:36:10

Ndashaka guha inyongera abayobozi niba zabageraho ahari simbizi. Kuko ni byiza bafits ukuri kuko iyo umusaruro wabonetse hari ibyiza byinshi biba byahuye. 1. Harimo ko efforts MINAGRI ishyira mugutunganya imbuto ziboneye ziba zabyaye umusaruro. 2. Efforts Mukurinda ubutaka no gutera amashyamba zabyaye umusaruro kurwego rwo hejuru kuko ubu Urwanda rubona imvura kurwego rwiza kdi rwari rugiye kuba ubutayu. Amshyi menshi kuri leta yacu nziza. 3. Imyumvire y’Abaturage iri kwiyongera kuko bahagurukiye kwikorera no gushora Imari mubuhinzi n’Ubworozi. Icyitonderwa. Inama natangaga irareba cyane ibirayi. Ikibazo abahinzi bafite gikomeye ni imbuto. Kuko niba 1kg y’imbuto y’ibirayi iri kugura 400frw cg 380Rwf ndavuga for exmple nkahitwa Shaba muri Nyabihu, Umufuka w’ifumbire ukajya hejuru ya 26000frw wongereho ectra costs umuti uterwa ibirayi 1time/week nko mu gihe kingana na 2mounth. Ukongeraho cost ya Man power ndavuga abakozi. Noneho ukagurisha ikiro 120rwf umuturage ahita ahomba ntacyo akuramo wongereyeho imisoro ihabwa amakusanyirizo. So bikamuca intege agashakishiriza muzindi business. Niko njye numva iki kibazo gushyiraho igiciro nibyiza ariko kigomba kujyana na research iri impartial ntiyumve abakuriye amacooperative gusa bari kuri level y’ubucuruzi ahubwo bakagereranya igiciro ku isoko na Input cost isabwa ngo ikirayi kiboneke. Ibi bivuze ko niyo ibirayi byagurwa 50rwf ariko igishoro nacyo cyabaye gito ntacyo byatwara umuturage. 120frw ni make cyane ugereranije ko imbuto iba igurwa 400frw yikubye icuro nyinahi cyane. Murakoze kandi crge kuko byose mubikora ngonumunyarwanda abeho neza.

2
Emmy Nziza 2018-11-08 23:35:04

Birumvikana ko nari Isoko twari duaanganywe mu baturanyi nkuko Minister-MINAGRI yabivuze, ariko bikwiye guha imbaraga Private Sector/Abikorera n’Abashoramari kubonako hari andi mahirwe meza yo gushora Imari. Habonetse Uruganda rutsya ibirayi hajagurishwa ifu imeze nka ya yindi yatangwagamo imfashanyo kubanyatwanda nyuma ya Jenoside, iki kibazo cyakongera kuboneka kweri? Ahubwo mbona byatanga andi mahirwe yo kongera umusaruro w’Ibirayi kubahinzi, kandi twashaka n’Isoko rigura ya fu twavuze, amadovize akiyongera.

3
Gisa 2018-11-08 17:45:33

Dufite ibibazo byiza byo kugwingira kw’ abana, imishahara ku bakozi bato itajyanye n’ isoko, abarwaye batabona omiti cg ababavura, ubutabera bwaboze, inzego z’ umutekano zihohotera abaturage, abakozi bamburwa imishahara yabo, abana basambanywa bagaterwa inda,.....

Kwamamaza