Diplôme n’ibitabo, impamvu ebyiri zirukanishije abayobozi batanu ba REB

30 12-04-2018 - saa 10:33, Ndayishimye Jean Claude

Nyuma y’aho abayobozi batanu ba REB bahagaritswe n’Inama y’Abaminisitiri yayobowe na Perezida Kagame; Minisitiri w’Uburezi, Dr Eugène Mutimura, yatangaje ko ari umwanzuro wafashwe bitewe n’uko batubahirizaga inshingano zabo ziri muri gahunda yo guteza imbere uburezi mu Rwanda.

Inama y’Abaminisitiri yateranye kuri uyu wa Gatatu, yahagaritse ku kazi abayobozi bakuru batanu mu Kigo gishinzwe Guteza imbere Uburezi mu Rwanda (REB), barimo Dr. Musabe Joyce wari ukuriye Ishami ry’Integanyanyigisho n’Imfashanyigisho na Dr. Tusiime Rwibasira Michael wari ukuriye Ishami rishinzwe Ibizamini n’Isuzumabumenyi.

Minisitiri w’Uburezi, Dr Mutimura Eugène, yatangaje ko impamvu aba bayobozi birukanwe, zishingiye ku kuba impamyabumenyi z’abarangije amashuri zitinda kubageraho kandi zigakorerwa mu mahanga mu gihe leta yari yarihaye intego ko zigomba kujya zikorerwa mu gihugu.

Yagize ati “Impamyabumenyi z’abanyeshuri barangiza umwaka wa gatandatu w’amashuri y’isumbuye zigomba gukorwa ku gihe, aho byatwaraga imyaka ibiri cyangwa itatu kugira ngo zikorwe, kandi zigakorerwa hanze mu gihe politiki ya leta isaba ko zikorerwa mu gihugu.”

Yunzemo ati “Byatwaraga umwanya munini bigatuma abanyeshuri barangiza amashuri yisumbuye batabona amahirwe yo kujya muri za kaminuza hirya no hino ndetse ntibiteze imbere politiki ya leta igamije ko umutungo wa leta uhama mu gihugu muri gahunda ya Made in Rwanda.”

Mu mwiherero w’abayobozi bakuru b’igihugu wabaye mu 2017 iki kibazo cyaragaragajwe ndetse gifatwaho umwanzuro nkuko byatangajwe n’uwari Minisitiri w’Uburezi.

Muri Werurwe 2017, Dr Papias Malimba wayoboraga Minisiteri y’Uburezi yavuze ko Leta yamaze gufata ingamba ko itazongera gukoresha impamyabushobozi z’abarangije Kaminuza mu mahanga ahubwo ko mu rwego rwo kwimakaza ibikorerwa mu Rwanda nazo zigiye kujya zihakorerwa.

Ati “Twafashe ingamba zo guhagarika kujya gukoresha diplôme hanze ahubwo turi kugerageza gushyira hamwe ibigo byo mu Rwanda ngo bijye bitanga izi serivisi.”

MINEDUC iherutse kwemeza ko diplôme zizajya zigera ku banyeshuri mu gihe kitarenze amezi atandatu.

Indi mpamvu y’uku guhagarikwa kw’abayobozi ni ijyanye n’ibitabo bifasha abanyeshuri byamaraga amezi nk’umunani bitaragera ku bo bigenewe kandi bigomba kwifashishwa nk’imfashanyigisho.

Yagize ati “Hari ibitabo byinshi bitagera ku mashuri. Ibya porogaramu y’integanyanyigisho ishingiye ku bushobozi (CBC) usanga biri hirya no hino mu nzu z’abaturage, mu turere, aho kuba ku mashuri. Ibyo na byo ni ikibazo kubera ko byatumye iyo gahunda yo kugira ngo abanyeshuri bakore ibizamini nk’uko byari biteganyijwe itazashoboka uyu mwaka.”

Uyu muyobozi yanavuze ko ari abakozi ba REB cyangwa n’abandi bose bazajya babangamira politiki ya leta bazajya babibazwa.

Ibi biriyongera ku kuba hari ibyakorerwaga hanze y’igihugu kandi byari bikwiye gukorerwa mu Rwanda.

Mu masaha y’igitondo kuri uyu wa Kane, Mineduc n’ibigo biyishamikiyeho byaramukiye mu nama mu muhezo, isobanura impamvu y’uku guhagarikwa kw’abayobozi kugira ngo abandi barusheho kunoza imikorere yabo.

Usibye Dr. Musabe Joyce na Dr. Tusiime Rwibasira Michael, abandi bayobozi bahagaritswe harimo Mujiji Peter wari Umuyobozi Mukuru w’Ishami rishinzwe Imirimo Rusange; Karegesa Francis wayoboraga Ishami rishinzwe Imari na Bagaya Rutaha wari Umuyobozi w’Ishami rishinzwe Amasoko.

Minisitiri Mutimura yanavuze ko ibijyanye no kumenya niba hari icyihishe inyuma yo kutubahiriza inshingano kw’aba bayobozi, ngo inzego zishinzwe iperereza ni zo zizacukumbura kugira ngo zimenye ukuri kwabyo.

Minisitiri w'Uburezi, Dr Mutimura Eugène, yaburiye abacunga nabi ibikoresho by’ikoranabuhanga mu mashuri ko bashobora guhagarikwa mu kazi

[email protected]

Kwamamaza
Kwamamaza

Izindi nkuru wasoma

19 3 20-08-2018
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2 | 3  

1
nyandwi Dative 2018-04-14 23:31:48

nbakwiye gufatirwa ibyemezo.kuko uburezi si akarima ko gufata uko bishskiye.abana si inkuta z,inzu kuko zouribeshya ugasenya ukazikosora. turerere u Rwanda neza kuko turera abayobozi bejo hazaza

2
Umuhanuzi 2018-04-14 10:17:27

Birakwiye ko inzego zo hejuru zajya zikurikirana imikorere ya za Minisiteri b’ibigo bizishamikiyeho. Hari hashize igihe kirekire Minisiteri y’Uburezi irebera imikorere mibi yo muri REB ntigire ikiyikoraho. Turashima Minister Eugene ubushishosi afite. Akoze igikorwa gikomeye cyo gukuraho bariya bayobozi. Nyuma y’iyi mpinduka REB ishobora kuzatanga service nziza, ariko igomba guhambwa abakozi bashoboye kugira ngo ibyo yitezweho bizagerweho.

3
Alpha 2018-04-14 03:53:37

Michael yari umurezi mwiza cyane , niyigarukire arere abana b’u Rwanda

Welcome back Dr

4
kayonga Denis 2018-04-13 17:11:35

Nyakubahwa Umukuru w’Igihugu cyacu nkuko tubimenyereye twabasabaga ko mukurikirana nikibazo cyabantu batsindiye imyanya ya kazi muri REB yarangiza ifatanyije na Mifotra bakabima uburenganzira bwabo bwo kuyijyamo.Wagirango Minisitiri nabayobozi ba REB ikigo nicyabo .Akarengane kagomba gucika Murwagasabo.

5
Mutirabura John 2018-04-13 04:57:48

Ariko ubundi ko bavuga ibizamini bijyanye niyo nteganyanyigisho nsha izaba 2019, abana bazaba bamaze kuyigezwaho kuburyo bazaba bamaze kuyisobanukirwa bagakkora ikizamini nta mbogamizi bafite? Ese hazaba harakoze isuzumwa ko n,abarimu ubwabo bamaze kubisobanukirwa? Dore rero aho ireme ry,uburezi ripfira. Mwakagombye kubona ko abarimu babizi mbere yo kubaza abanyeshuli, kandi ibintu byo guhora bahindagura ibintu bya hato na hato bidindiza abana bacu

6
MUKAMA 2018-04-13 03:19:02

Gahunda z’ibitabo byo mu mashuri zibangamirwa n’abandi bayobozi banyuranye. Nk’ubu Umuyobozi mukuru wa REB na ba Minister of education bombi bafasha indi gahunda yo kwandika ibitabo byandikwa n’aAbanyarwanda. Ariko hari abayobozi b’amashuri bima impusa abarimu baba basabwe kujya kubyandika. None se ko baba batoranijwe kubera uruhare basanzwe baragize muri curriculum, umuyobozi ubimana aba agira ngo bigende bite? Bene uwo muyobozi nawe akwiye kuvanwa mu mwanya we kuko ibitabo bitabonetse ntiyabona ibyo yigisha abanyeshuri! turasaba minisitiri ko yazakurikirana icyo kibazo. Abayobozi bagatanga impushya. Kuko ni abayobozi muri Minisiteri y’uburezi kandi n’abarimu baba batumiwe na minisiteri y’uburezi.

7
Kazina 2018-04-13 03:12:00

Turashimira ubuyobozi bwiza bukomeje kutwereka ko abagenerwabikorwa twitaweho Ku rwego ntagereranywa! Mutubarize n’abashinzwe U-R college of education impamvu diplome zacu zibitswe mu buhinde bakomeza batubeshya ngo babirimo amezi 6 yose arashize twagobye kuba turimo kuzibyaza umusaruro. Murakoze

8
Theotime 2018-04-13 02:47:55

REB ikeneye ivugurura. Hitabwe kukimenyane na ruswa mu itangwa ry’amasoko n’akazi.

9
didi 2018-04-13 02:06:12

Bwana ministre rwose urebe namahugurwa REB igenda itanga bivugururwe nayo mazi bajijisha batubwira aveho batange amafranga?? kandi reb ikemure ikibazo cyimyishyurire yaba amahugurwa cg gukosora exetat batahane amafranga yabo kuko biba byaratenganyijwe mungengo yimali.

10
Munyeshuri Protais 2018-04-13 00:54:10

Uvuga ngo barenganye niko abyumva ariko igihe cy,abantu bakora nabi cyarashize. Inzibacyuho yarashize, n,abagiye bakora amakosa benshi ntibahanwe barababariwe ariko ubu byararangiye. Reba nawe ukuntu ireme ry,uburezi ryadindiye. Reba muri RAB ibibazo bihari. Nibabasezerere bashyireho abandi nabo bagerageze.

Paji: 1 | 2 | 3  

Kwamamaza