DHL Express yahishuye ibyayifashije kuba ikigo cy’indashyikirwa mu bitwara ubutumwa mu Rwanda

1 10-10-2018 - saa 18:12, Evariste Nsengimana

Ikigo gifasha abantu gutwara ubutumwa n’indi mizigo cya DHL Express Rwanda, cyagaragaje ko gutanga serivisi inoze no gufata neza abakiliya aribyo byagifashije guhiga ibikora ako kazi mu Rwanda mu 2018.

Mu mpera z’icyumweru gishize nibwo ikigo East Africa Youth Development cyashimiye ibigo birenga 40 bikorera mu Rwanda, byahize ibindi mu gutanga serivisi inoze.

Muri ibyo bihembo byiswe ‘Service Excellence Awards’, DHL Express yashimwe nk’icyatanze serivisi zo gutwara neza ubutumwa n’imizigo mito n’iminini.

Ni ibihembo bitanzwe ku nshuro ya gatatu, bihabwa ibigo bitanga serivisi bitandukanye birimo iby’ikoranabuhanga, amahoteli, ubukerarugendo, itangazamakuru, ingufu, banki n’ibindi.

Mu kiganiro IGIHE yagiranye n’Umuyobozi wa DHL Express mu Rwanda, Julie Mutoni, yahishuye ko gukorera ku gihe biri mu byatumye bahabwa iki gihembo.

Ati “Ni ugufata ubutumwa ku bakiliya tukanabubatangira aho bifuza ko butangwa kandi ku gihe. hari ababwizanira ku biro byacu n’ubwo dufata ku bakiliya. Ibyo byose tubikora twakira abantu neza mbese tubaha serivisi nziza.”

Mutoni yavuze ko ‘Muri DHL Express, umukiliya afatwa nk’Umwami.

Mu bituma iki kigo gitanga serivisi inoze, uwo kijyaniye ubutumwa kimutumikira mu gihe kiri hagati y’umunsi umwe n’iminsi ine aho bwaba bujyanwa hose.

Kigira n’uburyo bw’ikoranabuhanga rituma umuntu ashobora gukurikirana ubutumwa bwe kuva DHL ikibwakira kugeza igihe butangiwe, akabona amazina y’ubwakiriye n’amasaha abwakiriyeho.

Ubu buryo butanga umutekano w’ubutumwa ku buryo uwabwohereje aba yizeye ko bwageze aho yifuza.

Mutoni yakomeje avuga ko gutanga serivisi nziza ku bakiliya ari inshingano kuko aribo babagira abo bari bo. Kubibonera igihembo ngo ni iby’agaciro kuko bibongerera imbaraga.

Yavuze kandi ko bagiye kurushaho gutanga serivisi nziza kuko bazi agaciro kabyo, karimo gushimisha uyihawe agahora yifuza gukorana nabo.

DHL Express ivuga ko iha agaciro gakomeye abakiliya, ikanabasaba kuyigaragariza ibyo bayifuzaho n’ibitagenda neza ngo bikosorwe.

Yashinzwe mu 1969 muri Leta ya San Francisco muri Amerika, n’abagabo batatu Adrian Dalsey, Larry Hillblom na Robert Lynn ari naho ikomora izina DHL. Batangiye batwara ubutumwa babuvana muri Leta imwe babujyana mu yindi.

Ubu DHL Express ikorera mu bihugu 220; itwara ubutumwa n’ imizigo y’amoko yose, imito n’iremereye, hakoreshejwe imodoka, indege n’ubwato.

Yatangiye ibikorwa mu Rwanda mu 1985, ariko itangira gukora nk’ikigo mpuzamahanga cyigenga, DHL Express Rwanda LTD, muri Kamena 2015.

Umuyobozi Mukuru wa DHL mu Rwanda, Julie Mutoni, ashyikirizwa igihembo
Umuyobozi Mukuru wa DHL mu Rwanda, Julie Mutoni, yavuze ko igihembo bahawe kizabongerera imbaraga zo gukora ibinogeye abakiliya
Abakozi ba DHL bari bitabiriye ibirori baherewemo igihembo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Nizeyimana theoneste 2018-10-10 21:38:23

DHL niya va Germany sinzi impamvu nutabyanditse munkuru yanyu

Kwamamaza