Cogebanque yasobanuriye abakunzi b’amagare uko bahererekanya amafaranga batanafite konti

0 12-06-2018 - saa 11:20, Akimana Jean de Dieu

Nyuma yo kuryoherwa n’isiganwa rya Rwanda Cycling Cup kuri uyu wa Gatandatu tariki 9 Kamena, Cogebanque yashishikarije abatuye Akarere ka Nyanza kugana uburyo bushya kandi bugezweho bwo kohererezanya amafaranga hagati y’abantu bitagombye ko bafitemo konti buzwi nka E-Banking, ku biciro biri hasi.

Iyi banki nyarwanda isanzwe ari umufatanyabikorwa w’imena w’umukino w’amagare ikaba ifite n’ikipe ya Les Amis Sportif itera inkunga, yataramiye abatuye i Nyanza nyuma y’uko bari bamaze kuryoherwa n’agace ka gatatu ka Rwanda Cycling Cup kegukanywe na Uwizeyimana Bonaventure.

Ukuriye serivisi za banki zifashisha ikoranabuhanga n’ikoreshwa ry’ikarita muri Cogebanque, Nishimwe Yvon Gilbert, yatangaje ko ubu buryo umuntu ashobora kubwifashisha yoherereza undi amafaranga kabone n’iyo yaba adafite konti muri Cogebanque, babutezeho kuzorohereza abakiliya mu guhabwa serivisi nziza kandi zihuse.

Nishimwe ati "Gukoresha serivisi za banki hakoreshejwe ikoranabuhanga mu kohereza no kwakira amafaranga ndetse no kwishyura, bizafasha banki yacu gufasha abakiliya kubona serivisi yihuse kandi vuba, hatitawe kuri telefoni ikoreshejwe kandi buri wese bikamugeraho kuko ntawe twasize inyuma n’udafitemo konti azajya akoresha izi serivisi nta kibazo".

Umuntu ashobora kohereza, kwakira amafaranga yaba ari umukiliya wa Cogebanque cyangwa atari we ku igiciro gito ugereranyije n’ubundi buryo wakoresha.

Muri ubwo buryo bushya, umuntu uri i Kigali ashobora koherereza undi uri i Rusizi amafaranga, akabona ubutumwa kuri telefone ye maze akayijyana ku mu-agent wa Cogebanque umwegereye yamara kuyimwereka agahita ayamuha mu ntoki.

Nishimwe yongeraho ko hari izindi serivisi bafite nazo zireba abakiliya babagana zo gufunguza konti udatanze amafaranga. Urugero ni aho umuntu agana umu-agent wa Cogebanque umwegereye agafunguza konti yitwa “ITEZIMBERE”; konti adakatwaho amafaranga yo kuyicunga, ashobora gusabiraho inguzanyo, agatabo ka sheki, ikarita n’izindi serivisi za banki.

Ati "Dusanzwe dufite serivisi zitandukanye duha abatugana kandi nziza nko gufunguza konti udatanze amafaranga ugahita uhabwa uburyo bwo gukoresha ikoranabuhanga. Mu gihe gito turazana n’ubundi buryo aho umuntu azajya yiguriza atavuye iwe agakemura ibibazo bye.”

Ikipe ya Les Amis Sportif y’i Rwamagana Cogebanque isanzwe itera inkunga, ni imwe mu zikomeye mu gihugu ndetse yabimburiye izindi gutanga umukinnyi wegukana Tour du Rwanda, Ndayisenga Valens mu 2014 wongeye kuyisubiza mu 2016 akinira Dimension Data ndetse na Areruya Joseph wayitwaye umwaka ushize yakuriye muri iki kipe.

Abo bakinnyi bari bamaze kugera no ku rwego rwo guhesha u Rwanda ishema ku mugabane wa Afurika, uyu mwaka bose bagiye gukina mu Bufaransa nk’ababigize umwuga byatumye mu marushanwa y’imbere mu gihugu, Les Amis Sportif itakiri twitwara neza.

Cobebanque yagize uruhare runini mu iterambere rya Areruya Joseph (wo hagati) umaze kuba umukinnyi rurangiranwa mu mukino w'Amagare muri Afurika
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza