Komisiyo y’Amatora muri Repubulika Iharanira Demokarasi ya Congo yatangaje ko nta matora ya Perezida ashoboka muri icyo gihugu mbere y’umwaka wa 2019.

Ibiganiro Leta yagiranye n’impande zitavuga rumwe nayo byari byemeje ko amatora agomba gukorwa uyu mwaka, hakaboneka usimbura Joseph Kabila, umaze imyaka 16 ku butegetsi, wagombaga kurangiza manda ye ya nyuma mu Ukuboza umwaka ushize.

Komisiyo y’Amatora (CENI) kuri uyu wa Gatatu yatangaje ko nyuma y’ibarura ry’abaturage ritararangira izakenera indi minsi 504 yo kwitegura amatora.

Icyakora umuvugizi wayo yavuze ko icyo gihe gishoboka kubanyuka nibaramuka bemerewe gukoresha ikoranabuhanga mu gutora (imashini zifashishwa batora) ndetse n’Itegeko rigenga amatora rigahindurwa.

CENI yagiye yigiza inyuma igihe cy’amatora ivuga ko ari ku mpamvu z’umutekano n’ubushobozi. Muri Nyakanga uyu mwaka yatangaje ko idashobora gukora amatora hakiri ibibazo by’umutekano muri Kasai.

Amashyirahamwe aharanira uburenganzira bwa muntu muri icyo gihugu yatangiye kwamagana ibyo bisobanuro bya CENI ndetse ahamagarira abaturage kubyanga.

Ishyirahamwe riharanira Demokarasi, LUCHA, ryanditse kuri Twitter riti “Nta kundi kongera gutegereza. Baturage ba Congo, birarangiye.”
Nyuma y’inama y’akanama gashinzwe umutekano muri Loni kuri uyu wa Gatatu, Ambasaderi w’u Bufaransa muri uwo muryango, François Delattre yasabye Guverinoma ya Congo gutangaza ingengabihe y’amatora.

Akanama k’umutekano ka Loni kasabye ko amatora akorwa uyu mwaka nkuko byari byemeranyijwe hagati y’impande zitavuga rumwe mu Ukuboza umwaka ushize. Icyakora Daily Nation yatangaje ko bamwe mu badipolomate babona ko amatora muri icyo gihugu adashoboka mu mezi atatu asigaye ngo umwaka urangire.

Perezida Joseph Kabila amaze imyaka 16 ku butegetsi


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved