IGIHE

Busingye yasabye RIB gukurikirana mu buryo bwihariye abakora ibyaha birimo gukuramo inda

2 9-08-2019 - saa 19:53, Habimana James

Minisitiri w’Ubutabera, Johnston Busingye, yavuze ko bamwe mu bantu bari mu magereza nk’abana n’abakoze ibyaha byo gukuramo inda, mu gihe cyo guca imanza zabyo bikwiye kujya byitabwaho harebwa impamvu babikoze.

Minisitiri Busingye yabigarutseho kuri uyu wa Gatanu mu karere ka Bugesera, aho yafunguye umwiherero w’iminsi itatu uzageza tariki 11 Kanama uhurije hamwe abakozi b’Urwego rw’Igihugu rw’Ubugenzacyaha (RIB).

Ni umwiherero ugamije kureba uko uru rwego rumaze umwaka rugiyeho, rwarushaho gutanga serivisi nziza ku barugana.

Minisitiri w’Ubutabera yashimye RIB kuri byinshi imaze kugeraho mu gihe imaze, avuga ko yagaragaje impinduka mu kwihutisha akazi no kugakora kinyamwuga.

Ubwo yagarukaga ku bijyanye n’ubutabera, Minisitiri Busingye yagize ati “RIB muri urwego rukomeye mu nzego ziri muri iki gihugu. Turifuza kubaka umuco wo kubahiriza amategeko no gutinya ibyaha mu gihugu cyacu. Umunyarwanda cyangwa undi muntu utuye mu Rwanda akwiye kwibwiriza kutishora mu byaha igihe cyose yaba ari mu Rwanda cyangwa ibyo byaha biri bugire ingaruka ku Rwanda cyangwa ku munyarwanda.”

Yakomeje agira ati “Iyo ni intego dukomeyeho cyane kandi tugomba kugeraho, ariko kugira ngo tubigereho ntibisaba gusa ko uwaketsweho ibyaha akurikiranwa. Birasaba gusesengura ubukozi bw’ibyaha ubwabyo, hakarebwa ikibitera, uko biteye, hakanarebwa abakunze kubyishoramo.”

Busingye yavuze ko hari ibyaha bikwiriye kujya bisesengurwa byihariye kugira ngo hamenyekane impamvu byakozwe, haboneke uburyo bwo kubikumira.

Ati “Hari ibyaha bimwe tugomba kugirira ubushobozi tukamenya icyatumye biba, aha navuga nk’ibyaha bikorwa n’abana kuko burya abana ni abantu bari mu nshingano z’ababyeyi zo kubarera, bikenera ko ubushinjacyaha bujya bumenya impamvu uwo mwana ashobora kuba yagiye mu byaha, hari kandi n’ibyaha byo gukuramo inda.”

Minisitiri Busingye mu ku garagaza uko iki kibazo giteye yavuze ko begereye abagororwa bakatiwe kubera ibyo byaha, bagasanga akenshi babiterwa n’imiterere y’aho babikoreye.

Yasabye ko bikwiriye kujya byitabwaho n’ubugenzacyaha ndetse n’ubushinjacyaha, hakagaragazwa icyabiteye bityo hagafatwa ibyemezo.

Umunyamabanga Mukuru wa RIB, Col. Ruhunga Jeannot, yavuze ko uyu mwiherero ari ngombwa kugira ngo barebere hamwe ibyo bagezeho, imbogamizi ndetse n’ingamba ngo barusheho kuzuza inshingano bahawe.

Yavuze ko kuva uru rwego rwajyaho rumaze kugera kuri byinshi harimo ko mu rwego rwo kwegera abaturage babonye moto 144, imodoka 28, mudasobwa 598, bakaba barubatse kandi n’urwego rwa Interpol ngo barusheho gukurikirana ibyaha ndengamipaka.

RIB yavuze ko kugeza ubu hari abagenzacyaha 28 bafatiwe muri ruswa, ariko bose barahanwe hagamijwe kurema ubunyangamugayo muri uru rwego.

Col Ruhunga yagize ati “Twumva ko kuba twaba benshi tudafite ubunyangamugayo ahubwo twaguma turi bake ariko tuzi ko abo bake bakora akazi neza kandi bafite ubunyangamugayo.”

Urwego rw’Igihugu rushinzwe Ubugenzacyaha rwatangaje ko rukoresha abakozi bagera kuri 900.

Minisitiri w’Ubutabera yashimye RIB kuri byinshi imaze kugeraho mu gihe imaze, avuga ko yagaragaje impinduka mu kwihutisha akazi no kugakora kinyamwuga
Umunyamabanga Mukuru wa RIB, Col. Ruhunga Jeannot, yavuze ko uyu mwiherero ari ngombwa kugira ngo barebere hamwe ibyo bagezeho, imbogamizi ndetse n’ingamba ngo barusheho kuzuza inshingano bahawe
Abakozi ba RIB bitabiriye umwiherero witezweho gufatirwamo imyanzuro izatuma akazi kabo karushaho kunoga
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Caty 2019-08-10 04:14:04

Ese ubundi gukuramo inda babikuye mu byaha bihanirwa n’amategeko? N’ubundi birakorwa ku mugaragaro kandi nta uhanwa. N’abo bari bafunze Muzehe yabahaye imbabazi mu minsi ishize. Aho kwirirwa barushya inzego z’ubutabera rero, ndabona ikiza ari uko babikura mu mategeko ahana!

2
Paci 2019-08-10 02:58:31

Ni byiza RIB iri gukora neza turabona Moto na mudasobwa byagarujwe ariko bashyire imbaraga no mu kugaruza Flatt kuko Hari ubujura bukabije bwamaflatt l muhanga bimaze gufata Indi ntera

Kwamamaza