Buravan yakoze amateka yegukana "Prix Découvertes RFI 2018"

6 8-11-2018 - saa 18:12, Uwiduhaye Theos

Burabyo Yvan [Buravan] w’imyaka 22 umaze kubaka ibigwi mu Rwanda nk’umuririmbyi ufite ubuhanga by’umwihariko ijwi rye rigakundwa na benshi, yegukanye igihembo cya Prix découvertes RFI 2018.

Yari mu bahanganiye igihembo gitangwa na Radiyo Mpuzamahanga y’Abafaransa, RFI, gihabwa abahanzi b’abahanga mu muziki baturuka mu bihugu bitandukanye muri Afurika no hanze yayo.

Buravan yinjiye mu irushanwa ubwo aheruka i Burayi kuhakorera ibitaramo. Yabanje kwiyandikisha atanga n’ibisobanuro birambuye kuri we nk’umunyamuziki, baza kumutoranya. Icyiciro cyakurikiyeho cyari ugutanga indirimbo hanyuma akanama nkemurampaka kakazumva, kagahitamo icumi ba mbere muri Afurika.

Yahaye akanama nkemurampaka indirimbo enye zisanzwe zinakunzwe bikomeye mu Rwanda, iyitwa ‘Malaika’, ‘Oya’, ‘Just a Dance’ ndetse na ‘Garagaza’.

Yari ahatanye n’abarimo; Umunya-Guinée witwa Azaya, Barakina wo muri Niger, Iyenga wo muri RDC , OMG wo muri Sénégal, Umunya-Cameroun witwa Gasha, Ozane wo muri Togo, Biz Ice wo muri Congo Brazaville, Maabo ukomoka muri Sénégal na Geraldo wo muri Haïti.

Uhagarariye akanama nkemurampaka yari Charlotte Dipanda afatanyije na Juliette Fievet, Claudy Siar, Amobe Mevegue ndetse na DJ Face Maker.

Icyumba cyatangarijwemo uwegukanye igihembo cyari kirimo amafoto y’aba bahanzi bose bahatanye ndetse mbere yo gutangaza uwatsinze babanje kwibutsa abantu abahatanye, berekana indirimbo zabo.

Buravan yashimiye abamushyigikiye kugera yegukanye iki gihembo

Buravan we berekanye ’Garagaza’ iri mu ndirimbo ze zikunzwe muri iki gihe ndetse ikaba yaraciye agahigo ikaba indirimbo ye ya mbere yarebwe n’abantu basaga miliyoni kuri Youtube.

Charlotte Dipanda wari uhagarariye akanama nkemurampaka, akimara gutangaza uyu muhanzi nk’uwegukanye igihembo, yavuze ko afite ubuhanga buhambaye yaba mu myandikire ye no mu miririmbire, ndetse akaba atanga icyizere cyo kuzagera kure mu muziki we.

Ati “Uyu musore namubonyemo ubuhanga, nakunze uburyo aririmbamo n’uburyo ibihangano bye biba byanditse, ni umuhanga kandi atanga icyizere cyo kugeza kure umuziki wa Afurika y’Iburasirazuba.”

Buravan yahise ahamagarwa akanama nkemurampaka kakiri mu cyumba cyatangarijwemo uwatsinze, ati “ndishimye mu buryo bukomeye, nari ndi kumwe n’inshuti zanjye hano dukurikiranye uko biri bugende, ndishimye cyane.’

Yanashimiye abategura iki gihembo ndetse n’abamutoye, mu magambo ye higanjemo kuvuga ko mu mutwe we harimo ishimwe, avuga uyu munsi atari buryame kuko ararara yishimira intsinzi.

Buravan yegukanye igihembo cy’amayero ibihumbi icumi [€10,000] ndetse no gufashwa gukora ibitaramo bizenguruka Afurika na kimwe gikomeye uyu muhanzi azategurirwa i Paris mu Bufaransa.

Indirimbo ’Garagaza’ yatumye Buravan atsinda

Iki cyumba nicyo cyatorewemo umuhanzi uhiga abandi muri Afurika
Buravan yegukanye igihembo cya Prix Decouvertes 2018
Charlotte Dipanda wari uhagarariye akanama nkemurampaka yavuze ko uyu muhanzi ari umuhanga mu buryo bwose
Indirimbo Buravan yahuriyemo na se niyo yatumye ahabwa igihembo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Meti Brown 2018-11-10 06:37:42

You made it bruh

2
umuhoza salome 2018-11-09 03:04:41

wowooooooooooooooooooooo.congratulations my czn. tukwifurije ibyiza byinshi kandi Imana ikomeze ibigufashemo.Turagukunda

3
ROSINE 2018-11-09 01:51:16

waooooo,mes félicitations Buravan,rwose icyo gihembo uragikwiye rwose.uri umuhanga pe!!!
courage cyane.

4
nyiraburyohe zoubeda 2018-11-09 01:05:00

Akoze amateka? ese niwe munyarwanda wambere ugihawe? ko nigeze kumva ko na Nyungura Corneille yagitwaye kera???

5
Freddy 2018-11-08 10:38:17

Congratulation Buravan, nanjye indirimbo zawe ndazemera.

6
Ensemble 2018-11-08 10:25:05

On est ensemble!

Kwamamaza