Mu rwego rwo gukomeza gahunda y’ubumwe n’ubwiyunge mu banyarwanda, abagororwa bafungiye ibyaha bya Jenoside yakorewe abatutsi muri Mata 1994, biyunze n’imiryango 58 biciye bakanayitoteza, banashishakarizwa kumvisha abandi bagororwa bafunganye binangiye gusaba imbabazi.

Ni igikorwa cyabereye mu Murenge wa Nyamata, mu Karere ka Bugesera kuri uyu wa 10 Kanama 2017, abagororwa bafungiye muri gereza ya Rilima, bagaragaje ko kba barakoze Jenoside ari ubugwari bamaranye imyaka isaga 20.

Iki gikorwa cyakozwe n’umuryango w’ivugamutumwa mu magereza, Prison Fellowship, ufatanyije na Komisiyo y’Igihugu y’ubumwe n’ubwiyunge n’Urwego rw’Igihugu rushinzwe imfungwa n’abagororwa(RCS).

Abagororwa 30 bo mu mirenge ya Rilima, Nyamata na Mwogo, barimo 10 bakatiwe burundu n’abandi bakatiwe imyaka runaka bitegura kurangiza, nib o basabye imbabazi abo bahemukiye.

Mukundanganzo Emmanuel wakatiwe igifungo cya burundu ku byaha bya Jenoside yakoze, birimo kuyobora igitero cyishe abantu barimo gusengerwa na Pasteri Gatera Emmanuel nawe waharokokeye, yavuze ko mu gihe cyose yari amaze afunze nta muntu yigeze abwira ibyaha yakoze.

Asaba imbabazi yagize ati “Ibyo nakoze bintera agahinda n’isoni ko natatiye igihango, ngatatira kirazira, twarasangiriye ku mbehe imwe, tukanywera ku nkongoro imwe. Nkaba mbasaba imbabazi ndetse n’umuryango wanjye namwe mwese. Nkaba nikubise imbere y’iyi mbaga yose mbasaba imbabazi.”

Pasteri Gatera yavuze ko yamuhaye imbabazi ubwo yamusuraga aho afungiye, agira ati “Nkuko abivuze njye namusanze kuri Gereza ya Rilima, ansaba imbabazi kandi nazimuhaye mbikuye ku mutima[..] Nkuko njya mbivuga, mfite imbabazi zuzuye ibiganza, uzaza azinsaba ntakizambuza kuzimuha.”

Umuyobozi w’Umuryango w’Ivugabutumwa mu Magereza ‘Prison Fellowship Rwanda, Bishop Gashagaza Deo yasabye abo bagorarwa gushishikariza bagenzi babo kwemera ibyaha no gusaba imbabazi kuko kwinangira bituma ababakomokaho bakurana urwango.

Yangeye ati “Dutekereza ko iyi nyigisho y’urugendo rw’ubumwe hanyuma n’urugendo rw’iyindi yitwa urugendo rw’umugororwa, twafatanyije n’abafatanyabikorwa kugira ngo dukomeze gufasha abanyarwanda mu kwiyunga no gukira ibikomere batewe na Jenoside yakorewe abatutsi.”

Abagororwa basabye imbabazi bakanguriwe gukomeza intambwe bateye

Umuyobozi w’ishami rishinzwe kugorora muri RCS, ACP Jean Bosco Kabanda, yashimiye inzego zose zagize uruhare muri icyo gikorwa cyo kunga abakoze Jenoside n’abayikorewe, avuga ko hari abiciwe ababo muri Jenoside bafite ubushake bwo gutanga imbabazi ariko babuze abo baziha.

Yanasabye abo bagororwa gukomeza iyo ntambwe bateye, bashishikariza bagenzi babo bafunze binangiye kugera ikirenge mu cyabo.

Umunyamabanga Nshingwabikorwa wa Komisiyo y’Igihugu y’Ubumwe n’ubwiyunge, Fidele Ndayisaba, yavuze ko ushaka gukira ibikomere atera intambwe yo gusaba imbabazi kandi ko bikorwa n’uwumvise ko yakoze icyaha.

Yongeyeho ati “Utanga imbabazi na we hari icyo bimusaba gikomeye kandi gutanga imbabazi si ukubura uko ugira, ni ubutwari nkuko bivugwa n’abageze kuri iyo ntera. Ufite ni na we utanga. Uzitanga bimusaba kumva uzisaba n’umutima umenetse, bikamusaba kwakira uzimusaba no kumva akababaro afite atewe na byinshi birimo ipfunwe n’ikimwaro byagaragariye muri wa mutima umenetse nawe bikamusaba kwiyemeza kugira wa mutima uzira kwihorera.”

Iki gikorwa cyo guhuza abakoze Jenoside n’abo bayikoreye, gikorwa ku bufatanye n’ Umuryango w’ivugabutumwa mu magereza ‘Prison Fellowship Rwanda, ushishikariza abagororwa gusaba imbabazi, ubyemeye akandikira uwo yiciye, ukamugezaho uwandiko na we yamara kumvishwa ko kubabarira ari inzira y’ubumwe n’ubwiyunge bakabahuza bagasabana imbabazi bakiyunga.

Kugeza ubu, abagororwa basaga 3000 bandikiye abo biciye babasaba imbabazi no kwiyunga.

Uretse kunga abakoze n’abakorewe Jenoside, uyu muryango wagize uruhare mu kubaka inzu 620 z’abacitse ku icumu, kubatiza abagororwa ibihumbi 43 bakiriye agakiza, gufasha abana 325 bari bafunganye n’ababyeyi mu bikorwa bitandukanye birimo no kubarihira amashuri, inafasha abantu 3425, muri gahunda ya mfasha ngufashe yo komora abakomerekejwe na Jenoside.

Umwe mu bagororwa asaba imbabazi uwo yagerageje kwica ubu akaba akiriho
Bishop John Rucyahana, Perezida wa Komisiyo y'Ubumwe n'Ubwiyunge
Umunyamabanga Nshingwabikorwa wa Komisiyo y'Ubumwe n'Ubwiyunge, Fidele Ndayisaba
Umuyobozi ushinzwe kugorora muri RCS, ACP Jean Bosco Kabanda
Umuyobozi w'Umuryango w'ivugabutumwa mu magereza, Prison Felloship Rwanda, Bishop Gashagaza Deo


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved