IGIHE

Bimwe mu bikorwa byibanzweho n’uturere mu mwaka w’imihigo 2018/19

2 14-08-2019 - saa 15:13, Akayezu Jean de Dieu

Kuri uyu wa Kabiri tariki 13 Kanama 2019, mu cyumba cy’Inteko Ishinga Amategeko y’u Rwanda ku Kimuhurura byari biteganyijwe ko haba umuhango wo gusinya Imihigo y’umwaka w’ingengo y’imari wa 2019/2020.

Ni umuhango ubusanzwe uyoborwa n’Umukuru w’igihugu aho atanga ibihembo ashimira uturere twaje imbere mu kwesa Imihigo y’umwaka w’ubukungu ushize akanasinyana n’abayobozi b’ inzego nkuru z’igihugu n’ab’inzengo zibanze Imihigo y’umwaka utaha.

Gahunda y’Imihigo yatangiye mu 2006, ikaba yaragize uruhare mu kongera urwego abayobozi babazwa inshingano zabo no kongera iterambere rishingiye ku muturage. Imihigo kandi yoroshya gahunda yo kwegereza ubuyobozi abaturage no kwihutisha iterambere ry’ubukungu bw’igihugu.

Gusinya Imihigo ni uburyo bw’isuzumamikorere, kwigira ku makosa yihariye aba yaragaragaye ndetse no gukomeza urugendo rw’iterambere mu bufatanye.

Mu mwaka ushize w’imihigo, Akarere ka Rwamagana kaje ku mwanya wa mbere [Umwanya kamazeho imyaka ibiri yikurikiranya], gakurikirwa na Gasabo na Rulindo; mu gihe Nyamagabe, Ruhango na Nyanza aritwo twaje mu myanya ya nyuma.

IGIHE yaganiriye na bamwe mu bayobozi b’Uturere n’Intara bagaruka kuri bimwe mu bikorwa by’ingenzi bari barahize kuzashyira mu bikorwa n’ikigero umwaka urangiye bagezeho babikora ndetse n’uko biteguye guhiga abandi.

Iburasirazuba

Intara y’Iburasirazuba igizwe n’uturere turindwi, muri two dutatu ; Bugesera, Nyagatare na Ngoma twari twahize umushinga munini wo kuzuza stade y’umupira w’amaguru muri buri karere kandi byarakozwe ndetse ubu izi sitade zatangiye gukoreshwa.

Muri iyi ntara kandi bibanze ku kubaka ibikorwa remezo birimo imihanda, kugeza amazi n’amashanyarazi ku baturage, kubaka ibyumba by’amashuri, ibigo mbonezamikurire y’abana bato n’ibindi.

Mu karere ka Gatsibo bubakiye abatishoboye inzu 280, ishuri ry’imyuga rya Ngarama, hubatswe umuyoboro w’amazi wa kilometero uva Gihengeri ugaha amazi imirenge itandatu n’indi mishinga ibiri yo kubaka umuhanda wa Rwimbogo -Munini ufite kilometero 64.

Mu karere ka Ngoma hubatswe inzibutso za Jenoside yakorewe Abatutsi banavugurura izirimo Urwibutso rwa Jenoside rwa Rukumberi, hubakwa urwo mu Murenge wa Zaza n’Urwibutso rwa Ngoma.

Guverineri w’Intara y’Iburasirazuba, Mufulukye Fred yabwiye IGIHE ko hari byinshi bishimira kandi bashima ko imihigo yose uko bari bayihize bayigezeho ku kigero gishimishije bafatanyije n’abaturage ndetse n’abandi bafatanyabikorwa.

Yagize ati “Turishimira n’umusaruro kuko ibyo byose iyo bikozwe bigaragaza umusaruro abaturage babonye kandi biba bigaragara ko imibereho yabo igenda ihinduka.”

“Niba mwarabikurikiye neza mwabonye ko Nyagatare yahawe igikombe cy’ubuhinzi n’ubworozi hanyuma na Rwamagana ihabwa cya serivisi, ni ibyo kwishimira tunashimira abafatanyabikorwa n’abaturage muri rusange.”

Uburengerazuba

Ubuyobozi bw’Intara y’Uburengerazuba butangaza ko mu bikorwa byibanzweho mu mihigo n’ubundi byagarutse kuri za nkingi enye; Ubukungu, Imibereho myiza, imiyoborere n’umutekano.

Guverineri w’Intara y’Uburengerazuba, Munyentwali Alphonse yabwiye IGIHE ko ibyo bakoze byose byaganishaga ku guhindura imibereho y’abaturage.

Yagize ati “Nk’ubwisungane mu kwivuza twabigezeho abaturage batanze ubwisungane mu kwivuza ku kigero kiri hejuru ya 80%, hari n’aho bageze kuri 90%. Urumva ni ibyo kwishimira niba umuturage wacu ashobora kurwara akabasha kwivuza.”

Guverineri Munyentwali yavuze ko mu turere dutandukanye hubatswe ibigo nderabuzima, amavuriro mato, ibyumba by’amashuri, imihanda n’ibindi bikorwa byibanze ku kongera umusaruro w’ubuhinzi.

Muri iyi ntara kandi bibanze ku guhangana n’ikibazo cy’imirire mibi no kugabanya umubare w’abana bari barataye ishuri byose hagamijwe impinduka nziza ku muturage.

Amajyepfo

Kimwe n’ahandi hose mu gihugu, imihigo y’Intara y’Amajyepfo yibanze ku kuzamura imibereho myiza y’abaturage, kubaka ibikorwaremezo n’ibindi.

Umuyobozi w’Akarere ka Ruhango, aherutse kubwira IGIHE ko imihigo bari basinyanye n’umukuru w’igihugu ari 72 irimo 24 y’ubukungu, 34 mu mibereho myiza na 14 mu miyoborere myiza.

Meya Habarurema yavuze ko urebye hafi ya yose bafite icyizere cyo kuyihigura ku kigero gishimishije bikajyana no guhindura imibereho y’abatuye muri aka karere.

Yavuze ko mu bijyanye n’amashanyarazi bubatse umuyoboro wa Kabagari ufite ibirometero 77, aho nibura ingo zisaga ibihumbi bibiri zigomba gucanirwa.

Mu bindi biri mu mihigo navuga bikomeye ni uko muri uyu Mujyi wa Ruhango turi kuhubaka umuhanda w’ikilometero kimwe kandi ubona cyarahinduye isura y’umujyi ku gasozi ko hakurya aha kitwa Kanazi.

Hari kandi n’ibirometero 104 by’imihanda y’itaka ifasha mu buhahirane turimo gutunganya dukoresheje VUP, nayo nirangira ibintu bizagenda neza.

Mu kiganiro aherutse kugirana na IGIHE, umuyobozi w’Akarere ka Kamonyi, Kayitesi Alice yavuze ko umwaka w’imihigo 2018/2019 , bari bahize gukora ibikorwa by’ingenzi mu mihigo 68.

Ni imihigo yarimo 25 iri mu nkingi y’ubukungu, imibereho myiza ni 31 naho imiyoborere myiza n’ubutabera twahize imihigo 12, yose yagezweho ku kigero gishimishije.

Amajyaruguru

Akarere ka Rulindo umwaka ushize kari kaje ku mwanya wa Gatatu ndetse n’uyu mwaka ubuyobozi butangaza ko imihigo yose bari bihaye bayihiguye ku kigero gishimishije ndetse bushimira ubufatanye bw’abaturage n’abandi bafatanyabikorwa.

Muri aka karere bafashije abatishoboye 247, kubona amacumbi, bubaka Isoko rya Rusine, amashuri ya uruzitiro rwa Sitade Ikirenga n’indi mishinga itandukanye igamije guhindura ubuzima bw’abaturage yagiye ishyirwa mu bikorwa.

Guverineri w’Intara y’Amajyaruguru yabwiye IGIHE ko ibyo kwishimira uyu mwaka w’imihigo usize bagejeje ku baturage ari byinshi kuko urebye nko mu Karere ka Musanze hubatswe amazu y’abatishoboye 100 n’ibikoni 125.

Uyu mwaka w’imihigo kandi usize Umurenge wa Cyuve uri gukorera muri Etage yuzuye, mu gihe kubaka ibiro by’Umurenge wa Kinigi bigeze nibura kuri 56%, aho byitezwe ko nawo uzarangirana n’uyu mwaka.

Mu karere ka Gicumbi bubatse Ibiro bishya by’akarere banavugurura ibyari bishaje bubatse kandi Umudugudu w’Icyitegererezo wa Kagugu wa 8 in 1.

Muri gahunda y’igihugu yo kwegerereza abaturage serivisi z’ubuvuzi aho nibura buri Kagari kagomba kuba gafite ivuriro rito [Poste de Sante], muri Gicumbi uyu mwaka hubatswe amavuriro mato agera kuri 17, ndetse kuri ubu imirimo yo kubaka izindi 12 igeze ku kigero gishimishije.

Mu Karere ka Burera, hubatswe kandi imihanda mu Mirenge ikora ku mupaka w’u Rwanda na Uganda, bishimira kandi Kaminuza y’Ubuvuzi ya UGHE, amavuriro 12 yubatswe mu Mirenge ikora ku mupaka.

Kuri iyi Mirenge kandi ikora ku mupaka w’u Rwanda na Uganda hubatswe ibyumba by’amashuri 52 n’ubwiherero 48.

Muri Gakenke, bibanze ku gukangurira abaturage gutanga ubwisungane mu kwivuza aho mu mwaka ushize abagera kuri 95% bari batanze mituweri.

Hubatswe kandi ibitaro bya Gatonde, umuhanda Rwisoko-Rushashi ungana na kilometero 12 ndetse n’imirimo yo kubaka ibiro by’akarere ka Gakenke kuri ubu igeze kuri 28%.

Stade ya Bugesera ni kimwe mu bikorwa remezo byishimirwa cyane
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kangoulou malin pasteur 2019-08-21 15:52:12

Nishimiye iyo mihigo y,uturere ndetse n’intara.Byumwihariko ndashimira ibyo akarere kacu ka Rulindo kagezeho.ndatekereza ko kabikoze bitari muri gahunda ya reta.
Gusa sinabura kutagaya abayobozi bahiga imihigo bakibagirwa ko natwe Abafite_Ubumuga hari iyo bakwiye kuduhigira yihariye
Ex;kutwubakira ibibuga n’ama stade yo gukoreraho sport cg imikino
_Gufasha amakipe y,abafite ubumuga
_Kudushakira imishinga yo kudufasha kwiga imyuga iciriritse no kuduha ibikoresho byadufasha mukwiteza imbere.

2
Gasore 2019-08-14 09:07:11

Burera ko numva ikomeza kuza inyuma kandi biragaragarira amaso ya buriwese,kuko muribimwe byananiranye nukibaka umuhanda was Base -Butaro,kuko nanubu nabaturage bamwe bangirijwe ibyabo ntibarishyurwa,kandi dore umaze imyaka itatu warutangiyegukorwa,none imashini nabakozi bawukoraga sinzahobimukiye wasigaye mumagambo gusa.

Kwamamaza