IGIHE

Bernard Makuza yahuye na Perezida Sassou Nguesso, aganira n’Abanyarwanda b’i Brazzaville

0 9-02-2019 - saa 11:56, IGIHE

Perezida wa Sena, Makuza Bernard n’itsinda ry’Abasenateri yari ayoboye basoje uruzinduko rw’iminsi itatu i Brazzaville muri Repubulika ya Congo, ku butumire bwa mugenzi we Pierre Ngolo, Perezida wa Sena ya Congo.

Uru ruzinduko rwabaye ku wa 6-8 Gashyantare 2019 rwari rugamije gushimangira umubano mwiza uri hagati ya Repubulika ya Congo n’iy’u Rwanda, no gutsura umubano hagati y’Inteko Zishinga Amategeko z’ibihugu byombi.

Muri uru ruzinduko Perezida wa Sena yahuye n’abanyacyubahiro barimo Perezida wa Repubulika ya Repubulika ya Congo, Denis Sassou Nguesso na Perezida wa Sena y’icyo gihugu, Pierre Ngolo.

Ubwo yakirwaga na Perezida Sassou Nguesso ku wa 7 Gashyantare 2019, yamusobanuriye ibijyanye n’uruzinduko rwe rugamije gutsura umubano hagati y’Inteko Zishinga Amategeko z’Ibihugu byombi ndetse banaganira gahunda zinyuranye zirimo ibyerekeranye n’uko Inteko zishinga Amategeko z’ibihugu byombi zagira uruhare mu kwemezwa n’ishyirwa mu bikorwa ry’Amasezerano y’isoko rusange rya Afurika (AfCFTA) no ku bijyanye n’Abanyarwanda bahoze ari impunzi batuye muri Congo.

Perezida wa Sena y’u Rwanda na Perezida wa Sena ya Repubulika ya Congo baganiriye ku mubano w’Inteko Zishinga amategeko z’ibihugu byombi, ndetse banasinyana amasezerano y’ubufatanye hagati ya Sena y’u Rwanda n’iya Repubulika ya Congo.

Makuza Bernard yahuye kandi n’Umuryango w’Abanyarwanda baba muri Congo mu rwego rwo kungurana ibitekerezo kuri gahunda zitandukanye za Leta.

Mu butumwa yabahaye bwari bufite insanganyamatsiko igira iti “imibereho myiza y’umuturage n’iterambere ry’igihugu byubakiye ku bumwe bw’abanyarwanda n’imiyoborere myiza”, yagarutse ku byo u Rwanda rwiyemeje kugeraho by’umwihariko biteganywa n’amahame remezo avugwa mu ngingo ya 10 y’Itegeko Nshinga rya Repubulika y’u Rwanda ryo mu 2003 ryavuguruwe mu 2015.

Yagaragaje ko hari ibigaragarira buri wese bimaze kugerwaho ariko anaboneraho kwibutsa ko urugendo rukiri rurerure kandi rusaba umusanzu wa buri wese.

Yagize ati, “Nta washidikanya ko amahitamo y’Abanyarwanda yabaye umusemburo w’impinduka mu miyoborere y’Igihugu no mu mibereho myiza y’abaturage. Politiki ziratandukandana,n’ubuyobozi burarutana. Mu myaka 25 ishize, umusaruro wo gushyira imbere ubumwe na guha Abanyarwanda amahirwe angana urivugira.”

Yakomeje agira, ati “Ntituragera aho twifuza, kandi ntitwabigeraho tudakomeje gushyira hamwe. Niyo mpamvu ya gahunda ya ‘Ndi Umunyarwanda mwumvise.’ Ni gahunda itanga urubuga rwo gutanga ubuhamya ku ntambwe tumaze gutera mu mibanire no kwiteza imbere, tubikesha kwibona nk’Abanyarwanda no gushyira imbere ubumwe.”

Bernard Makuza yakiriwe na Perezida Sassou Nguesso
Makuza yaganiriye na Sassou Nguesso kuri gahunda zirimo uko Inteko zishinga Amategeko z’ibihugu byombi zagira uruhare mu kwemezwa n’ishyirwa mu bikorwa ry’Amasezerano y’isoko rusange rya Afurika
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza