IGIHE

Bamwe mu basenateri ntibaramenya niba bemerewe kongera kwiyamamaza mu matora agiye kuba

13 13-06-2019 - saa 11:28, Habimana James

Inzobere mu mategeko n’abasenateri bakomeje gushaka kumenya niba abari mu myanya uyu munsi bemerewe kongera kwiyamamaza.

Hagendewe ku Itegeko Nshinga ryavuguruwe, abasenateri basanzwe bariho bemerewe imyaka umunani gusa ariko itongerwa.

Mu ivugurwa ry’iri tegeko ryo mu 2015, ryahinduye manda y’abasenateri iba imyaka itanu ariko ikaba ishobora kongerwa rimwe gusa.

Gusa ntabwo risobanura neza niba abasenateri bariho uyu munsi bagiye muri iyi mirimo iri tegeko ritaravugururwa bemerewe kongera kwiyamamaza.

Umwe mu basenateri yagize ati “Itegeko Nshinga ntacyo rivuga kuri ibi, ushobora kuvugisha abo muri Komisiyo y’Igihugu y’Amatora (NEC), nibo bashobora gusobanura iki kibazo.”

Umunyamabanga Nshingwabikorwa wa NEC, Charles Munyaneza, yabwiye The New Times ko abasenateri bariho uyu munsi bamazeho imyaka umunani bityo batemerewe kongera kwiyamamaza.

Yavuze ko mu biganiro bagiranye na Minisiteri y’Ubutabera, byabafashije kumva ko abasenateri bariho batemerewe kongera gutorwa kubera ko bazaba bamazeho imyaka yabo umunani mu Ukwakira 2019.

Gusa bamwe mu basesenguzi mu by’amategeko bo bavuga ko hari icyuho mu Itegeko Nshinga bityo ko nta mpamvu yatuma aba basentari batongera kwiyamamaza.

Tom Mulisa wigisha amategeko muri Kaminuza y’u Rwanda, ntabwo yemeranya n’abavuga ko aba basenateri batemerewe kongera kwiyamamaza.

Yagize ati “Itegeko Nshinga ririho ntabwo risobanura ko batemerewe kongera kwiyamamaza.”

Ubwo yavugaga ku ngingo ya 171 na 173 yo mu Itegeko Nshinga, Mulisa yagize ati “Hari icyuho kiri mu mategeko kubera ko ntaho bigaragara ko abasenateri bariho batemerewe kuzongera kwiyamamaza.”

Mulisa na bamwe mu basenateri batifuje gutangazwa, bavuze ko bifuza ko Urukiko rw’Ikirenga rwagira icyo rukora kuri iki kibazo.

Ingingo ya 171 ivuga ko “Ingingo zose z’Itegeko Nshinga rya Repubulika y’u Rwanda ryo kuwa 4 kamena 2003 n’amavugururwa yaryo yabanjirije iri vugururwa bivanyweho kandi bisimbujwe iri tegeko Nshinga rivuguruye. Icyakora abantu batowe cyangwa bashyizweho hakurikijwe manda zishingiye ku ngingo z’Itegeko Nshinga ritaravugururwa kandi batavuzwe mu zindi ngingo z’inzibacyuho z’iri tegeko Nshinga rivuguruye bakomeza manda batorewe cyangwa bashyiriweho.”

Ingingo ya 173 ivuga ko “Abasenateri bari mu myanya igihe iri tegeko Nshinga rivuguruye ritangira gukurikizwa, bakomeza manda batorewe cyangwa bashyiriweho.”

Mulisa avuga ko Itegeko Nshinga ridasobanura neza niba abasenatari bashobora gukomeza indi manda cyangwa batemerewe.

Aha niho avuga ko Urukiko rw’Ikirenga rukwiye kwicara rugatanga umurongo niba aba basenateri bashobora kongera kwiyamamaza.

Inteko Ishinga Amategeko y’u Rwanda igizwe n’imitwe ibiri, uw’abasenateri n’uw’abadepite.

Sena igizwe n’abasenateri 26 barimo 12 batorwa bahagarariye intara enye z’igihugu n’Umujyi wa Kigali, abasenateri umunani bashyirwaho na Perezida wa Repubulika.

Hari abasenateri bane bashyirwaho n’Ihuriro ry’imitwe ya Politiki yemewe mu Rwanda, umusenateri umwe uhagarariye amashuri makuru ya Leta n’undi umwe uhagarariye amashuri makuru yigenga.

Nkuko bigaragara ku ngengabihe nshya ya Komisiyo y’Igihugu y’Amatora, amatora y’abasenateri azaba guhera tariki 16 kugeza tariki 18 Nzeri 2019.

Gutanga kandidatire bizatangira tariki 22 Nyakanga kugeza tariki 9 Kanama, mu gihe kwiyamamaza bizatangira guhera tariki 27 Kanama kugeza tariki 15 Nzeri.

Bamwe mu basenateri bari mu gihirahiro ntibazi niba bemerewe kongera kwiyamamaza
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
Ebi 2019-06-14 23:52:38

Ibyo bisa ni ibyabaye i Burundi, igihe habaga impinduka muri manda za Perezida.
Ngaho rero, abavugaga KO Nkurunziza adafite uburenganzira bwo kwongera kwiyamamaza, twumve niba bagira iyindi mvugo.

2
Inshuti y'Igihe 2019-06-14 11:06:58

Ba Nyakubahwa rwose nimwe mushinzwe kurengera ishyirwa mu bikorwa ry’amategeko, nimwubahirize Itegekonshinga nk’uko mwaryemeje mwoye kureba inyungu zanyu bwite. Nta rujijo na busa ruri muri iryo tegeko birasobanutse, manda yanyu y’imyaka 8 idasubirwamo murayirangije. Mumenye gusaza mutanduranyije kandi mugende mwemye!

3
Kejo 2019-06-13 23:24:36

Oya nta cyuho kirimo nibagende babise abandi ibyo byuho tuzabiziba nyuma baratuvuriye aha. Buriya wasanga bari kubara ubuzima bwabo bavuye mu nteko bagasanga imibare itari guhura none bikaba bisigaye bibabuza gusinzira.

4
Umusomyi 2019-06-13 16:41:33

"...bakomeza manda batorewe cyangwa bashyiriweho"!
None se iyo manda batorewe ni iyihe?
Ni manda y’imyaka umunani idashobora kongerwa.
Ndibutsa ko abasenateri bariho barangiza manda bari mu bemeje umushinga w’itegeko nshinga mbere y’uko ushyikirizwa abaturage ngo bawutore muri referendum! Iriya ngingo yari yasobanuwe ! Komisiyo y’amatora iri mu kuri!

5
yve 2019-06-13 16:37:03

Ngarutse kukibazo cyamugenzi wajye nigute abantu bashyitaho amategeko arengera abandi arikobo ntibabe bazi abarengera Bisa nahowabyara umwana akakwita izina kandi ariwowe wakarimwise abasenateri jye sinemeranya namwe ubwo mutegereje ko urukiko rw’ikirenga ko arirwo ruzabafashe kweri ndatunguwe

6
yve 2019-06-13 16:31:18

Ariko harikintu nibaza abasenateri ntabwo aribamwe mushyiraho amategeko mubanze munsobanurire

7
Ndejeje 2019-06-13 12:08:12

Kuba itegeko shinga rivuga ko bakomeje manda zabo bishatse kuvuga ko manda yabo ikomeza kuba imyaka 8 kuko itegeko shinga ryari rimaze kugira manda yabo imyaka 5. Kuba itegeko shinga rishyira manda yabo ku myaka 8 ryaravuyeho, ni ukuvuga ko bashobora nabo kwiyamamariza manda yindi kuko itegeko ryabuzaga kwiyamamariza manda ya 2 ryabaye ablogé.

8
Ndejeje 2019-06-13 12:07:05

Kuba itegeko shinga rivuga ko bakomeje manda zabo bishatse kuvuga ko manda yabo ikomeza kuba imyaka 8 kuko itegeko shinga ryari rimaze kugira manda yabo imyaka 5. Kuba itegeko shinga rishyira manda yabo ku myaka 8 ryaravuyeho, ni ukuvuga ko bashobora nabo kwiyamamariza manda yindi kuko itegeko ryabuzaga kwiyamamariza manda ya 2 ryabaye ablogé.

9
Kimiya 2019-06-13 11:19:25

Aba basenateri mutweretse bari mugihirahiro njyewe ntacyo mbona kuko nubundi basaziyemo nibabererekere abandi nabo baze kwipima muri ntebe. Ariko kweri ngo abasenateri batifuje ko amazina yabo atangazwa niba abasenateri bafite ubwoba bwuko amazina yabo atangazwa umuturage we kuki mwumva ko mwatangaza amazina ye igihe afitanye ikibazo nubuyobozi? Ngenda demokarasi mu Rwanda uraganje.

10
Inuma 2019-06-13 09:19:19

Byaba bibabaje aba basenateri batora amategeko batazi kuyasesengura ngo bamenye icyo itegeko nshinga riteganya.Kwicara mu nteko ntabwo bihagije. Bimaze kugaragara ko hari ibyuho byinshi mu itegeko nshinga. Nakwisabira abayobozi bakuru ko hashyirwaho commission yigenga igizwe n’abanyamategeko n’abashakashatsi mu kugaragaza icyi cyuho hanyuma rigasubirwamo.Murakoze

Paji: 1 | 2  

Kwamamaza