IGIHE

Amb Vrooman yibukije ko uburenganzira bw’abafite ubumuga bukwiye kubungwabungwa kuva mu muryango

0 30-11-2021 - saa 22:31, Bukuru JC

Ambasaderi wa Leta Zunze Ubumwe za Amerika mu Rwanda, Peter H. Vrooman yibukije ko uburenganzira bw’abafite ubumuga bukwiye kubungwabungwa kuva mu muryango.

Ibi Amb Vrooman yabitangaje ku wa 29 Ugushyingo 2021 ubwo yasuraga ikigo gisanzwe gifasha urubyiruko rurimo n’urubana n’ubumuga kunoza imishinga cya Masaka Business Incubation Center.

Muri uru ruzinduko yari ari kumwe n’abayobozi batandukanye barimo Umunyamabanga wa Leta muri Minisiteri y’Uburezi Ushinzwe Ikoranabuhanga, Imyuga n’Ubumenyingiro, Irere Claudette.

Kimwe n’urundi rubyiruko, urubyiruko rufite ubumuga ruhabwa ubushobozi bwabageza ku isoko ry’umurimo ndetse bagahabwa n’ubumenyi mu bijyanye no kwihangira umurimo.

Iki kigo kandi gikorana na EDC bya hafi binyuze muri gahunda yayo izwi nka “Umurimo Kuri Bose”, igamije gufasha urubyiruko by’umwihariko urufite ubumuga kubona imirimo, mu gihe cy’imyaka ibiri.

Uru ruzinduko rwari ruri mu murongo wo kwitegura kwizihiza Umunsi Mpuzamahanga w’abafite ubumuga, usanzwe uba buri mwaka ku itariki 3 Ukuboza 2021.

Ambasaderi wa Leta Zunze Ubumwe za Amerika mu Rwanda, Peter H. Vrooman yavuze ko biteye ishema kubona ibyo abafite ubumuga bafashijwe binyuze muri iki kigo ndetse yibutsa ko uburenganzira bwabo bukwiye kubungwabungwa kuva mu muryango.

Ati “Uyu munsi biteye ishema kumva impinduka nziza zazanywe n’iyi porogaramu ndetse n’ubuhamya bw’urubyiruko ruri gufashwa. Uru rubyiruko bakwiye kubona ingo zacu, imiryango yacu n’aho dukorera nk’aho babonera uburenganzira bwabo.”

Kuva iyi gahunda ya “Umurimo Kuri Bose” kuri bose yatangira hamaze guhugurwa urubyiruko rurenga 700, 550 bashyizwe mu buryo bwo kwigira ku murimo mu gihe ibigo 52 byiyemeje guharanira imikorere idaheza abafite ubumuga.

Muri Masaka Business Incubation Center, hahuguriwe abafite ubumuga 25 cyane cyane mu bijyanye no gukora inkweto, ibikoze mu mpu n’ibindi. Kugeza ubu buri umwe avuga ko nibura yinjiza 30000 Frw ku kwezi.

Umuyobozi ushinzwe gahunda ya “Umurimo Kuri Bose” muri EDC, Tania Tzelnic yavuze ko ibyo bakora byose baharanira gushyira ku isoko urubyiruko rufite ubumenyi.

Ati “Turi gukora tugamije kongerera imbaraga uruhare rwo gushyira abakozi ku isoko no guhanga umurimo. Kugera ku ntego kwa “Umurimo Kuri Bose” ntibyari gushoboka hatabayeho ubufatanye bwa USAID na Guverinoma y’u Rwanda.”

Raporo y’Ikigo cy’Igihugu cy’Ibarurishamibare (NISR) ku bushakashatsi ku murimo n’ubushomeri mu Rwanda bwakozwe muri Kanama 2020 bwerekanye ko ubushomeri mu Rwanda buri ku gipimo cya 16,7%, mu bafite ubumuga buri kuri 18,5%, naho mu rubyiruko rwose bugeze kuri 21%.

Urubyiruko muri rusange rugorwa no kubona imirimo, byagera ku bafite ubumuga bikarushaho, byanarushijeho kwiyongera cyane muri ibi bihe by’icyorezo cya COVID-19.

Gahunda ya “Umurimo kuri Bose”, igamije gukuraho imbogamizi zituma urubyiruko rwinshi rutabona akazi, aho ruzafashwa kugira ubumenyi bukenewe ku isoko ry’umurimo. Iyi gahunda izatuma urubyiruko rufite ubumuga ruhabwa ubumenyi bukenewe buzatuma rujya ku rwego rwiza ndetse runafashwe kubona inararibonye rikenewe.

Ambasaderi Peter H. Vrooman n'Umunyamabanga wa Leta muri Minisiteri y’Uburezi Ushinzwe Ikoranabuhanga, Imyuga n’Ubumenyingiro, Irere Claudette ubwo basuraga iki kigo
Amb Vrooman yitegereza bimwe mu bikorwa by'uru rubyiruko rurimo n'urufite ubumuga
Bigishwa gukora inkweto
Bafashwa kubona ubumenyi bubahesha akazi
Bafashwa kubona ubumenyi bubahesha akazi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza