IGIHE

Amb. Nduhungirehe yasabye urubyiruko kuba ku isonga mu guhashya imvugo z’abapfobya Jenoside

1 14-08-2019 - saa 15:18, Philbert Girinema

Abantu batandukanye cyane abanyamahanga, mu mvugo no mu nyandiko bakunze kudahuza ku mibare y’Abatutsi bazize Jenoside yakorewe Abatutsi, aho bamwe bavuga ibihumbi 800 cyangwa abari munsi yabo.

Ni mu gihe mu Rwanda hakozwe ubushakashatsi bukagaragaza ko umubare wa nyawo w’Abatutsi bishwe muri Jenoside yakorewe Abatutsi urenga miliyoni.

Ikibazo cy’uko abanyamahanga bakoresha imibare itandukanye n’iyo u Rwanda rwemera mu kugaragaza Abatutsi bishwe muri Jenoside, ni kimwe mu byo urubyiruko rwitabiriye ibiganiro na Perezida Kagame rwabajije, rubaza impamvu hakoreshwa imibare itandukanye.

Umunyamabanga wa Leta muri Minisiteri y’Ububanyi n’Amahanga, ushinzwe ibikorwa by’Umuryango wa Afurika y’Uburasirazuba, Amb. Olivier Nduhungirehe, yabwiye uru rubyiruko ko nyuma ya Jenoside, u Rwanda rwarwanye intambara zikomeye zirimo n’igamije ko hemezwa inyito yayo.

Ati “Mu myaka 25 ishize habaye indi ntambara yo kwemeza amahanga ibyabaye mu Rwanda, mbere hari ikibazo cy’inyito ubwayo, aho bavugaga Jenoside nyarwanda n’ibindi […] Ubu nta mpaka zigomba kuba ku nyito ya Jenoside yakorewe Abatutsi.”

Ku wa 23 Ukuboza 2003 nibwo Inteko Rusange y’Umuryango w’Abibumbye yemeje ko itariki ya 7 Mata ari Umunsi Mpuzamahanga wo kuzirikana kuri Jenoside yo mu Rwanda. Muri Mutarama 2018 iyi nteko yatoye gukosora iyo nyito, maze itariki ya 7 Mata iba Umunsi Mpuzamahanga wo kuzirikana kuri Jenoside yakorewe Abatutsi mu Rwanda.

Agaruka ku kibazo cy’imibare, Amb. Nduhungirehe, yavuze ko abavuga ko Abatutsi bapfuye muri Jenoside ari ibihumbi 500 cyangwa 800, ari abapfobya.

Ati “Hari abavuga ibihumbi 500, abandi hagati ya 500 na 800, bakavuga ngo nkuko babikesha Loni, baravuga Loni itarigeze ikora ibarura […] Hano mu Rwanda habaye ibarura.”

Umunyamabanga Nshingwabikorwa wa Komisiyo y’Igihugu yo kurwanya Jenoside, Dr Bizimana Jean Damascène, yigeze gutangaza ko nta bushakashatsi Loni yigeze ikora bujyanye n’umubare w’abatutsi bishwe muri Jenoside.

Ati “Ntabwo Loni yigeze iza hano ngo ikore ubushakashatsi ishake abantu bishwe muri Jenoside… ntayo. Gen [Romeo] Dallaire niwe bigeze kubaza aragereranya ati hishwe nk’ibihumbi 800. Ariko nta bushakashatsi na buke, na bumwe Loni yigeze ikoresha hano mu Rwanda ariko itangazamakuru mpuzamahanga ribikora nkana rikavuga ngo Loni yemeje ibihumbi 800. Aho nzi byavuye ni icyo kiganiro Dallaire yigeze gutanga akiri hano mu 1994 cy’ikigereranyo.”

Ibarura ryakozwe na Minisiteri y’Ubutegetsi bw’Igihugu mu 2000 rikamara imyaka ibiri (2000-2002), ryagaraje ko abatutsi 1.074.017 bishwe mu gihe cy’iminsi ijana kuva muri Mata 1994.

Raporo y’iri barura yatangajwe mu 2004 mu gihe u Rwanda rwibukaga ku nshuro ya 10 Jenoside yakorewe Abatutsi. Igaragaza aho abishwe bari batuye, imyaka bari bafite, amazina yabo ndetse bamwe muri bo bizwi neza uburyo bwishwemo.

Iyo hakozwe isesengura ry’iyi mibare, bigaragara ko buri munsi hicwaga ibihumbi icumi na mirongo irindwi na bane 10.074.

Nduhungirehe yasabye urubyiruko kuba ku isonga mu guhindura imvugo z’abapfobya Jenoside, bakagaragaza ku Isi hose imibare ya nyayo y’Abatutsi bishwe. Ati “Abashaka kugoreka amateka y’u Rwanda mubabwize ukuri mushingiye ku bimenyetso bifatika.”

Ibi biganiro byahawe insanganyamatsiko yitwa ‘Igihango cy’Urungano’ byitabiriwe n’urubyiruko rurenga ibihumbi bitatu ruturutse mu bice bitandukanye by’igihugu ndetse no hanze yacyo rwakereye kuganira na Perezida Kagame.

Intego y’ibi biganiro ni ukuganiriza urubyiruko ku cyerekezo cy’u Rwanda mu myaka 25 iri imbere hafatiwe kuri ‘Vision 2050’ , hagamijwe ko iterambere ry’u Rwanda rikomeza kwiyongera.

Umunyamabanga wa Leta muri Minisiteri y’Ububanyi n’Amahanga, ushinzwe ibikorwa by’Umuryango wa Afurika y’Uburasirazuba, Amb. Olivier Nduhungirehe
Nduhungirehe yasabye urubyiruko kuba ku isonga mu guhindura imvugo z’abapfobya Jenoside

Amafoto: Niyonzima Moise

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kamana 2019-08-14 13:26:20

Har n’irindi barura ariko ryakozwe muri 1992 kandi ryakozwe n’ibigo mpuzamahanga ndetse muri gouvernement ihuriweho n’imitwe ya politiki itandukanye imwe ikiriho iri nomuri leta. Bamwe mubari bari murayo mashyaka muzabatubarize bwana Ministre wowe icyo gihe wari umwana.

Kwamamaza