IGIHE

Amajyepfo: Mudasobwa 636 zo muri gahunda ya ’Smart Classroom’ zaribwe

0 12-06-2019 - saa 18:08, Prudence Kwizera

Polisi y’Igihugu itangaza ko muri Mudasobwa zatanzwe mu bigo by’amashuri muri gahunda ya ‘Smart Classroom’ izigera kuri 636 zibwe mu mashuri yo mu Ntara y’Amajyepfo.

Byagarutsweho n’Umuyobozi wa Polisi mu Ntara y’Amajyepfo, ACP Kajeguhakwa Claude, ubwo yahaga ikiganiro abayobozi, abakozi n’abafatanya bikorwa b’Akarere ka Gisagara mu mwiherero barimo gukorera mu Karere ka Muhanga.

Uwo mwiherero w’iminsi ibiri ugamije kubafasha kwisuzuma no kurebera hamwe uko barushaho kunoza imikorere ngo bateze imbere abaturage bazamure imibereho yabo.

ACP Kajeguhakwa yabaganirije ku mutekano abasaba ubufatanye mu gukemura ikibazo cy’ubujura busigaye bwarageze no mu mashuri.

Yagize ati “Twaragenzuye dusanga zimwe muri mudasobwa zaragiye zibwa kubera ubufatanyacyaha cyangwa uburangare bw’ibigo by’amashuri.”

Yasobanuye ko muri mudasobwa 636 zibwe izigera ku 141 zagaruwe abazibye 80 barafatwa.

Yavuze ko iperereza ryakozwe ryerekanye ko iyo zimaze kwibwa zijyanwa muri Repubulika Iharanira Demokarasi ya Congo kugurishwa.

Yavuze ko isesengura ryagaragaje ko ubwo bujura buterwa na bamwe mu bayobozi b’amashuri badaha agaciro mudasobwa zatanzwe na Leta; kudakoresha abarinzi batoranyijwe neza cyangwa ugasanga benshi muri bo bashaje no kuba imfunguzo z’aho zibikwa zitunzwe n’abantu barenze umwe.

Mu Karere ka Muhanga hibwe 186; Ruhango 115; Nyaruguru 88; Huye 72; Kamonyi 66; Gisagara 49; Nyanza 35 naho muri Nyamagabe hibwa 25.

Gahunda ya ‘Smart Classroom’ yashyizweho mu 2016 mu rwego rwo guteza imbere ikoranabuhanga mu mashuri no kunganira gahunda ya mudasobwa imwe ku mwana.

Iyo gahunda ifite intego ko buri kigo cy’ishuri ribanza cyangwa ryisumbuye kigomba kuba gifite icyumba cya mudasobwa (Smart Classroom) aho abana bigira ikoranabuhanga.

Umuyobozi wa Polisi mu Ntara y’Amajyepfo, ACP Kajeguhakwa Claude aganira n'abayobozi, abakozi n'abafatanyabikorwa b'akarere ka Gisagara
Umuyobozi wa Polisi mu Ntara y’Amajyepfo, ACP Kajeguhakwa Claude
Abayobozi, abakozi n’abafatanya bikorwa b’Akarere ka Gisagara mu mwiherero bari gukorera mu Karere ka Muhanga

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza