Abayobozi beretswe ko kuvuga rikijyana nta sano bifitanye n’umwanya barimo

0 24-06-2018 - saa 13:44, Mukaneza M.Ange

Abayobozi b’ibigo bitandukanye, yaba iby’abikorera n’ibya leta, bitabiriye amahugurwa ku miyoborere, bagaragarijwe ko umwanya bafite mu kigo atari wo ubahesha kubahwa no kumvirwa n’abo bashinzwe kuyobora.

Aya mahugurwa yabaye ku wa 21 Kamena 2018 yari afite insanganyamatsiko irebana no gufasha abayitabiriye kuba abantu bavuga rikumvikana “Become a person of influence”; yateguwe na ITM Africa ku bufatanye n’Ikigo gisanzwe gitanga ubumenyi mu bijyanye n’imiyoborere AB Leadership.

Umuyobozi wa AB Leadership, Annet Baingana, impuguke mu bijyanye no gufasha abantu kuzamura ubumenyi mu miyoborere ari nawe watanze aya mahugurwa, yabwiye aba bayobozi ko umwanya bafite mu kigo atari wo utuma imiyoborere yabo iba myiza, ahubwo byose bituruka ku buryo babyitwaramo.

Yakomeje avuga ko abantu bashobora kumva no gukora ibyo ubasabye kubera ko wakoresheje imbaraga cyangwa wabateye ubwoba; ariko uburyo bunoze kurushaho ni ukubinyuza mu cyubahiro baguha bagendeye ku bikorwa by’indashyikirwa ukora n’urugero ubaha buri munsi.

Ibi kandi byanagarutsweho n’Umuyobozi Mukuru w’Ikigo cy’Igihugu Gishinzwe Iterambere, RDB, Clare Akamanzi, wabanyuriyemo urugendo rwe kuva yimenyereza akazi kugeza atangiye kuyobora iki kigo, aho yifashishije urugero rw’uwari umujyanama we mu kugaragaza ko kubwira abantu bakakumva ntaho bihuriye n’umwanya w’ubuyobozi uriho.

Ati “ Abantu benshi batekereza ko kuba umuntu avuga rikijyana bituruka ku mwanya w’ubuyobozi afite ariko nize ko ushobora kuba umuntu uvuga rikumvikana utari mu mwanya w’ubuyobozi runaka.”

Yakomeje avuga ko kugira ngo ubashe kumvwa no kubahwa kandi ibitekerezo byawe bigahabwa agaciro, ugomba guharanira kubaka icyizere mu bantu kandi ukagira ibikorwa bikwiye umwanya uriho koko.

Rukundo Johnson ushinzwe gutegura ibikorwa muri Smart Africa, akaba n’umwe mu bitabiriye aya maguhugurwa yagaragaje ko yakuyemo amasomo y’ingenzi, ariko ibyo azihutira gushyira mu bikorwa harimo kurushaho kwihangana no kwigira ku makosa ye.

Ati “Icya mbere ngiye kurushaho kunoza ni ukumenya kwihangana, kumenya uko nkorera ku gitugu kandi abangana bose nkabakira neza ntitaye ku buryo baje bamvugisha byaba nabi cyangwa neza.”

Umuyobozi wa ITM Africa mu Rwanda, Mwiza Lys, yavuze ko mu mpamvu zatumye bategura aya mahugurwa ni ukubereka uburyo barushaho kuyobora neza binyuze mu kubera icyitegererezo abo bayobora.

Yakomeje avuga ko mu rwego rwo kubereka ko ibyo bari kwigishwa bitari amagambo gusa, hifashishijwe abayobozi babashije kugera ku rwego rushimishije kugira ngo babanyuriremo muri make inzira banyuzemo ndetse n’uko babashije guhangana n’imbogamizi bagiye bahura nazo.

Uretse Akamanzi, abandi batanze ubuhamya bwabo bushobora kubera abandi bayobozi umusingi wo kurushaho gukora cyane harimo Umuyobozi wa Gasabo Investment Company, Fabrice Shema; Umuyobozi wa Engen, Sarah Doukoure; Umuyobozi wa AC Group, Patrick Buchana na Jean Philbert Nsengimana wahoze ari Minisitiri w’Urubyiruko n’Ikoranabuhanga ubu akaba ari Umujyanama w’Umuyobozi wa Smart Africa.

ITM Africa ni ihuriro ry’ibigo mpuzamahanga bitanga serivisi zirimo gufasha ababyifuza gushaka abakozi, kubakurikirana no gutanga amahugurwa ibigo byifuza ku bakozi babyo. Iri huriro rikorera mu bihugu bitandatu.

Amahugurwa yitabiriwe n'abayobozi mu byiciro bitandukanye
Umuyobozi wa AB Leadership, Annet Baingana, niwe wahaye aba bayobozi ubumenyi butuma barushaho kunoza uburyo bayoboragamo
Umuyobozi mukuru wa RDB, Clare Akamanzi
Umuyobozi wa AC Group, Patrick Buchana
Gukora nk'itsinda ni kimwe mu byo batojwe
Umuyobozi wa ITM Africa mu Rwanda, Lys Mwiza
Abitabiriye aya mahugurwa bagiye bahabwa imyitozo itandukanye ituma barushaho kumenya uko barushaho kunoza imiyoborere
Babazwaga ibibazo bitandukanye bagahuriza hamwe ibisubizo
Jean Philbert Nsengimana wahoze ari Minisitiri w’Urubyiruko n’Ikoranabuhanga ubu akaba ari Umujyanama w’Umuyobozi wa Smart Africa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza