Abayobozi babiri ba Ferwafa batawe muri yombi

26 13-09-2018 - saa 12:19, IGIHE

Umunyamabanga Mukuru w’Ishyirahamwe ry’Umupira w’Amaguru mu Rwanda, Ferwafa, ndetse n’Ushinzwe Amarushanwa, batawe muri yombi mu iperereza ku byaha bakekwaho byo guha ruswa umusifuzi.

Abo ni Umunyamabanga Mukuru, François Regis Uwayezu na Ruhamiriza Eric ushinzwe amarushanwa.

Umuvugizi w’Urwego rw’Igihugu rw’Ubugenzacyaha, Mbabazi Modeste, yabwiye IGIHE ko ubugenzacyaha aribwo bwafashe inshingano zo kubakurikirana ku byo bakekwaho.

Ati “Baraye bafashwe. Barimo Umunyamabanga Mukuru n’Ushinzwe amarushanwa. Bakekwaho ibyaha byo gutanga ruswa […] Ni ku kibazo cya ruswa mu basifuzi.”

Umusifuzi w’Umunya-Namibia, Jackson Pavaza, yari aherutse gutangaza ko aba bayobozi bamuhaye ruswa y’amafaranga “atazi umubare” kugira ngo asifure umukino w’Amavubi na Côte d’Ivoire abogamiye ku Rwanda.

U Rwanda rwakiriye Côte d’Ivoire ku Cyumweru tariki 9 Nzeri kuri Stade ya Kigali i Nyamirambo, rutsindwa ibitego bibiri kuri kimwe.

Jackson Pavaza wasifuye uyu mukino, yavuze aba bayobozi ba bamushyiriye amafaranga kugira ngo aze kugena umusaruro w’u Rwanda.

Aganira n’ikinyamakuru Namibian Sun, yagize ati “Amafaranga yari mu ibahasha. Sinigeze ngerageza no kuyabara cyangwa kumenya yari angahe.”

“Nababwiye ko nta mpano nshobora kwakira ivuye ku muntu uwo ariwe wese nk’uko amategeko ya CAF abiteganya. Narayanze ndetse ikibazo nkimenyesha CAF.”

Ferwafa yasobanuye ko ku wa Gatanu tariki 7 Nzeri 2018, nyuma y’inama itegura umukino ku cyicaro iyobowe na Komiseri w’Umukino, Mike Letti wo muri Uganda n’abasifuzi bane bakomoka muri Namibia, aba basifuzi hari amafaranga bahawe.

Iti “Bishyuwe $247 yo kwifashisha mu byo bashobora gukenera bitateganyijwe byemewe n’Ishyirahamwe ry’umupira w’amaguru muri Namibia kandi bikaba biteganywa n’ingingo ya 36 na 37 by’amategeko agenga amajonjora y’igikombe cya Afurika cya 2019.”

Ferwafa ivuga ko imaze kwishyura abasifuzi ayo mafaranga, bagaragaje ko hari andi yarenze ku matike yabazanye i Kigali bityo nayo bagomba kuyishyurwa.

Byatumye ku Cyumweru mbere y’umukino, Ruhamiriza na Uwayezu bajyana amadolari 948 yo kugabanya abasifuzi bane, buri umwe afata 237.

Aba bayobozi bombi ngo bagiye kuri Hotel des Milles Collines saa tanu za mu gitondo kandi bitari mu bwihisho, bahurira ku muryango wa hoteli babaha amafaranga nk’uko bari bayasabye.

Aha ngo niho Pavaza yahise amenyesha abayobozi ba Ferwafa ko amafaranga bamugomba ari $237 atari 948.

Bamusabye ko yakomeza kwitegura umukino, amafaranga bakayasubiranayo bakaza kuyamuha nyuma kuko bitari gushoboka ko bamuha $237 ye batabonye aho bavunjishiriza.

Ingingo ya 641 mu gitabo cy’amategeko ahana ibyaha mu Rwanda, iteganya igifungo kirenze imyaka itanu kugeza kuri irindwi ku cyaha aba bagabo bakekwaho cyo gutanga impano kugira ngo hakorwe ibinyuranyije n’amategeko.

Iteganya kandi ihazabu y’amafaranga y’u Rwanda yikubye inshuro kuva kuri ebyiri kugeza ku icumi z’agaciro k’indonke yatanze cyangwa yashatse gutanga.

CAF yahagurukiye ibyaha bijyanye na ruswa mu basifuzi. Muri Nyakanga uyu mwaka yatangaje ko yahagaritse abagera kuri 22 bagaragayeho iyo myitwarire.

Inkuru bifitanye isano:

- Ferwafa yisobanuye ku kibazo cy’umusifuzi uyishinja ruswa

- Abayobozi ba Ferwafa barezwe bashinjwa gutanga ruswa ku basifuzi

Umunyamabanga Mukuru, François Regis Uwayezu, bivugwa ko ari mu bashatse gutanga ruswa ku basifuzi
Ruhamiriza Eric ushinzwe amarushanwa nawe yatawe muri yombi
Pavaza si ubwa mbere atamaje abashatse kumuha ruswa
Umukino u Rwanda rwatsinzwemo na Côte d’Ivoire wasifuwe na Jackson Pavaza
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2 | 3  

1
Ob 2018-09-13 18:10:35

Nkimara kubina iyi nkuru nuburyo abo bagabo bisobanuye, ukongera ukumva uko President wa FERWAFA yabivuzeho nahise mbona ko bari bufungwe peee. Ahubwo natangara niba aba bagabo bo batarabibonaga ko byabarangiranye.

2
aline 2018-09-13 16:56:26

ge ndabemeye nubwo babikoze giswa ariko bari kuntego yo kuraza abanyarwanda twese dukunda amavubi mu byishimo no ku ntsinzi nubwo bitaciyemo baragerageje baruta bamwe barigisa umutungo w’abanyarwanda bakawujyana kwishimisha nimiryango yabo .

3
Birababaje 2018-09-13 16:27:31

Bazabanze bakore iperereza hamenyekane uwabahaye ariya mafrw ngo bajye kuyatanga. Kuko ndacyeka ko ataribo bibwirije kujya gukora uriya deal. Ferwafa irakaze! Ariko bagiye bigira kuyandi mashyirahamwe nka Ferwacy?

4
Mugabo 2018-09-13 16:13:25

Ubwo atarire bayamushyiriye wenda twareba. Kuko ruswa itangwa nabagore turabimenyerye

5
Sébastien 2018-09-13 14:47:46

mes chers amis sportifs Rwandais
nyakubahwa président wa républika y’urwanda yarabivuze ariko byaranze sinzi umuti uzava hehe kugirango Ferwafa ijye kumurongo kandi buri munsi umupira wo mu Rwanda uzira amakosa ya Ferwafa dore ibya Dadi Birori aho byatugejeje none tena barongeye rwose imikorere iri muri Ferwafa ntaho yageza umupira wacu

6
dusabe 2018-09-13 13:59:41

Andika babanze bashake ibimenyesto bigaragara

7
mabinga majigo!! 2018-09-13 12:42:16

mwicecekere ntabyo muzi, aka ni kagakino kagikomeza. babafashe se ngo haricyo bazabatwara? mwibuke degaulle ashinjwa amanyanga mû kurya yamafranga yagenewe kubaka hôtel, nti bamuretse akidegembya KD bimuhama% tubwizanyukuri, abantu bakunda umupira bakanawitangira, sibo barebwa muguhabwa imyanya ngo bayobore! ahubwo baburizwamo imbere y’a bâ runyunyuzi. none bageze aho kudusebya akakageni? nakumiro!!!!!!!!

8
Kambanda Marley 2018-09-13 12:30:39

Ni byiza ko RIB yatangiye akazi kayo. Turayizera mu kazi ishinzwe, abakekwaho icyhaha bamaze kudutesha agaciro kabone n’iyo ibimenyetso byaba bitabonetse, uretse ko basa nkaho bamaze kwitangira ibibashinja bihagije. Ibuye ribonetse ntabwo riba rikishe isuka kandi nibyiza kureba mu murima wose ko ntahandi haba hihishe amabuye. Iyi mikorere iragayitse kandi igihugu cyacu aho kigeze cyarayirenze. Ikibabaje ni uko abari ku isonga ryayo bagaragara nk’aho bakiri bato.

9
ukuri 2018-09-13 12:26:54

ge si nabarenganya kuko ari icyakorwa cyose kugirango igihugu cyacu kibone ishema nange na gikora niba naba bashakaga ishema ryacu kuko iyo dutsinda abanyarwanda twese twari kurara neza ... ahubwo aba ni abagabo abayarigisa kubwinyungu zabo ni miryango yabo bangana iki ? si benshi? abahombya leta si benshi muhora mutubwira nkabanyamakuru ?? Nibe naba bashakaga ko abanyarwanda bishima . Mubabarire

10
Vincento 2018-09-13 12:13:23

Ibi bintu bikwiye gusesengurwa neza kuko ukurikije uburyo babikozemo Ntabwo iriya yari ruswa.Ahubwo bigaragara ko Bari kuri pressure cyangwa igitutu cy’igihe.
Gusa babaye barabikoze yaba ari isura mbi ku gihugu!
Ariko niba nta facts uriya musifuzi nawe azakurikiranwe kuko yaba yarasebeje abantu n’u Rwanda muri rusange.
Kuko hari n’abishakira amanota bashyira abandi hasi cyangwa babahindura ibiraro!

Paji: 1 | 2 | 3  

Kwamamaza