Abaturage 200 bubatse Guest House ya Nkombo bamaze imyaka irenga itatu batarishyurwa

1 17-01-2017 - saa 13:41, Sitio Ndoli

Abaturage 200 bo mu Birwa bigize Umurenge wa Nkombo mu Karere ka Rusizi baravuga ko bambuwe na rwiyemezamirimo wabakoreshaga ubwo hubakwaga amacumbi muri aka gace mu 2012, none imyaka igera kuri ine irashize batarahabwa amafaranga yose bakoreye.

Bamwe mu bayubatse bagera kuri 200 batangaza ko bambuwe amafaranga ubwo bakoraga akazi ko gufasha abafundi, gutera ubwatsi, gukora isuku n’indi mirimo itandukanye.

Abaganiriye na IGIHE batangaza ko mu gihe cy’umwaka bakoze, amafaranga yose bakoreye batayahawe.

Ayinkamiye Immaculée ati “Abayede bari bahari n’abafundi ntabwo bose bahembwe, tumaze imyaka itatu dutegereje guhabwa amafaranga twarayabuze. Njyewe nakoze mu kurangiza inyubako nshyira sima hagati y’amatafari no kuyahanagura, nkomeza n’akazi ko gutera ubwatsi. Bandimo ibihumbi birenga ijana. Byangizeho ingaruka kuko natse inguzanyo muri Sacco kugeza na n’ubu sinari nayishyura.”

Bizimana Innocent atangaza ko rwiyemezamirimo wabakoreshaga yabanje kubaha amafaranga make ariko ayandi ntibayabona.

Ati “Njyewe bamfitiye ibihumbi 150, nahondaga amabuye. Rwiyemezamirimo yabanje kuduha ibihumbi 20, nta yandi yaduhaye. Ari umurenge n’akarere ntacyo badufashije kandi inzara itumereye nabi.”

Mu butumwa rwiyemezamirimo, Evariste Habiyaremye wabakoreshaga yahaye IGIHE yatangaje ko yagiranye amasezerano n’akarere ko kazishyura abo baturage mu mwenda nawe kamubereyemo.

Ati “Ikibazo cyabo bakozi ndakizi ariko twumvikanye n’akarere ko kazabishyura ku mafaranga batari bampa, twarabyanditse, turanabisinyira ko mbyemeye ko babishyura kandi n’amasezerano arabiteganya.”

Umunyamabanga Nshingwabikorwa w’Akarere ka Rusizi, Mushimiyimana Euphrem avuga ko icyo kibazo ndetse n’ayo masezerano na rwiyemezamirimo atayazi ariko nakigezwaho azatangira kugikurikirana.

Ati “Icyo kibazo cy’abo baturage ntabwo nkizi, nibandikira Akarere tukamenya imiterere yacyo tuzicara tugishakire umuti. Icyo nzi ni uko dufite ingwate ya rwiyemezamirimo, ariko niba ibyo avuga ari byo azerekana izo nyandiko twasinyanye."

Aya macumbi yubatswe mu rwego rwo kuruhura abatuye ku Nkombo bambukaga bajya gushaka aho bidagadurira, gukorera inama no gususurutsa abashyitsi bahagana yuzuye nyuma y’umwaka umwe atangiye kubakwa ariko aza kumara indi itatu adakorerwamo. Yatwaye miliyoni 320 harimo ayaturutse mu ngengo y’imari y’Akarere ka Rusizi.

Abagera kuri 200 bubatse amacumbi ya Nkombo bamaze imyaka irenga itatu batarahabwa amafaranga yose bakoreye

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
clement Uwimana 2017-01-17 08:39:36

birababaje n’ukuri wasanga barafataga n’amadeni ngo bazishyura bahembwe,mubavuganire ubuyobozi bugire icyo bubikoraho, uwo ni umwambuzi murakoze.

Kwamamaza