Abasaga 500 bitabiriye Itorero Urunana rw’Urungano mu cyiciro cya gatatu

0 5-12-2018 - saa 22:39, Akayezu Jean de Dieu

Urubyiruko rusaga 500 ruturutse mu turere twose tw’u Rwanda ndetse n’abaturutse mu bihugu bisaga cumi, bitabiriye Itorero Urunana rw’Urungano-INKOMEZAMIHIGO icyiciro cya III, ririmo kubera mu Ishuri ry’ubumenyi rya Byimana mu Karere ka Ruhango.

Itorero Urunana rw’Urungano rihuje urubyiruko rurimo abanyarwanda baba mu Rwanda no mu mahanga, rigamije kwigisha amateka y’igihugu urubyiruko n’abari urubyiruko mu gihe cya Jenoside yakorewe abatutsi mu 1994.

Abitabira iri torero kandi batozwa gukunda igihugu no kurwanya ingengabitekerezo ya jenoside n’uwo ari we wese washaka kubabibamo amacakubiri.

Ku mugoroba wo kuri uyu wa Gatatu nibwo abayobozi mu nzego zitandukanye bitabiriye gutangiza ku mugaragaro iri torero, riteganyijwe kuva ku wa 05 kugeza ku wa 11 Ukuboza 2018.

Abatozwa bamaze kuhagera ni 536, barimo 447 baturutse mu bice bitandukanye by’igihugu n’abagera kuri 89 baturutse mu mahanga barimo 43 bo muri Kenya, 30 bo muri Uganda, 5 bo mu Bushinwa n’abandi baturutse mu bihugu byo hirya no hino ku Isi.

Guverineri w’Intara y’Amajyepfo, CG Gasana Emmanuel yavuze ko abanyarwanda bagomba kugira umutekano, amahirwe angana n’imibereho myiza.

Yakomeje asaba abitabiriye iri torero ati “Murasabwa guhora muzirikana politiki y’igihugu cyacu, politiki ya Ndi Umunyarwanda, indangagaciro ituma tuba abo turibo. Mwese mwahuriye aha kugira ngo mwumvikane, mumenyane, mwumve ko arimwe Rwanda rw’ejo.”

Umuyobozi w’Itorero ry’Igihugu, Bamporiki Edouard wagarutse ku mateka y’Itorero, avuga ko ryahanzwe na Gihanga Ngomijana, kandi uko ubutegetsi bwagiye busimburana naryo ryagiye rikura kandi rikagira umumaro cyane.

Bamporiki yashimiye Perezida Kagame wagaruye itorero hagamijwe ko umunyarwanda wese agomba kuba intore mu byo akora.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza