IGIHE

Abanyarwanda nibakomeza kudufasha Ebola ntizagera mu Rwanda- Minisitiri Gashumba

0 14-08-2019 - saa 10:09, Akayezu Jean de Dieu

Icyorezo cya Ebola gihangayikishije ibihugu byo mu Karere by’umwihariko ibihana imbibi na Repubulika Iharanira Demukarasi ya Congo yongeye kwibasirwa n’iki cyorezo kuva muri Kanama 2018.

Ebola ni indwara yandura iyo amaraso cyangwa amatembabuzi y’umuntu uyirwaye akoze ku muntu muzima, yandura mu buryo bworoshye kandi kuyivura biragoye kuko abenshi ifashe irabahitana.

Imibare iheruka y’Ishami ry’Umuryango w’Abibumbye ryita ku buzima, OMS igaragaza ko abantu basaga 1800 bamaze gupfa kuva icyo cyorezo cyakwaduka muri Repubulika Iharanira Demokarasi ya Congo umwaka ushize.

Muri Nyakanga uyu mwaka, nibwo umurwayi wa mbere wa Ebola yagaragaye mu Mujyi wa Goma, uhereye mu Burasirazuba bwa RDC, hafi y’u Rwanda.

Minisiteri y’Ubuzima mu Rwanda ikomeje gukaza ingamba zo guhangana n’iki cyorezo hashyirwaho ibigega bifasha gukaraba aho ku mupaka w’u Rwanda na RDC hashyizweho amazi arimo umuti abantu bakaraba.

Iyi Minisiteri kandi isaba abaturage gutanga amakuru kuri Polisi kuri nimero itishyurwa ya 112 no kuri Minisiteri y’ubuzima ku 114, ubuyobozi cyangwa abajyanama b’ubuzima.

Mu kiganiro na IGIHE, Minisitiri w’Ubuzima, Dr Diane Gashumba yavuze ko kuba mu Rwanda nta Ebola iragaragaramo bituruka ku bufatanye n’abaturage, Ingabo na Polisi y’igihugu abikorera n’abandi bafatanyabikorwa.

Ati “Dukomeje kwibutsa abanyarwanda ko bakomeza kwirinda ingendo za hato na hato zo mu gihugu cy’ahantu hari icyorero [RDC], kuko Ebola yandura mu buryo bworoshye kandi kuyivura biragoye abenshi ifashe bahasiga ubuzima.”

Yakomeje agira ati “Ikindi dukomeje gusaba abanyarwanda ni ukubabwira duti mureke umuco wo gusuhuzanya muhana ibiganza kuko ntacyo biduhungabanyaho. Ntacyo byica ni ukubyishyira mu mutwe gusa tukabimenyera kandi tukamenya ko kudasuhuzanya mu ntoki bidukingira izindi ndwara ziterwa n’umwanda nka Ebola, Macinya, Korera, Ubuheri n’izindi ndwara nyinshi.”

U Rwanda rwiteguye bihagije

Kuva muri Kanama umwaka ushize, u Rwanda rwatangiye gupima Ebola abantu binjiye mu gihugu nyuma y’iminsi mike iki cyorezo cyongeye kuvugwa muri Repubulika Iharanira Demokarasi ya Congo.

U Rwanda kandi rwashyizeho uburyo bwo gupima umuriro umuntu wese winjira aturutse mu bice bivugwamo Ebola, runashyiraho ikigo cyihariye mu kuvura Ebola giherereye mu murenge wa Rugerero mu Karere ka Rubavu.

Rwahuguye abantu 23 657 barimo abaganga, abaforomo, abakozi bo mu mavuriro, polisi, abakozi ba Croix Rouge n’abajyanama b’ubuzima, hitawe cyane ku bantu bakora hafi y’imipaka.

Ingabo z’u Rwanda (RDF) zifatanyije na Minisiteri y’Ubuzima n’Ikigo cy’Igihugu cy’Ubuzima (RBC), zakoze imyitozo igamije kugaragaza ubushobozi bwo guhangana no gukumira icyorezo cya Ebola igihe cyaba kigeze mu gihugu.

Minisitiri Gashumba yavuze kandi ko hanatanzwe inkingo ku bakora mu rwego rw’ubuzima bagera ku 3000, bashobora kwitabazwa mu gihe iki cyorezo cyaba cyageze mu gihugu.

Mu Rwanda hari laboratwari ishobora gupima ikagaragaza niba umuntu afite ibimenyetso bya Ebola cyangwa atabifite.

Minisiteri y’Ubuzima ivuga ko ikomeje gukorana n’inzego zibishinzwe hagamijwe gushyiraho uburyo bwo gukaraba by’umwihariko ahantu hahurira abantu benshi.

Gashumba yagize ati “Dukomeje gusaba abafite amahoteli, utubari n’amaresitora, ibigo by’amashuri no ku nsengero, Kiliziya cyangwa Umusigiti gushyiraho za kandagira ukarabe kugira ngo ababagana bajye babanza gukaraba mbere yo kwinjira, ibi bizafasha gukomeza gukumira ikwirakwizwa ry’indwara ziterwa n’umwanda no kwirinda ko Ebola iramutse yageze mu gihugu kugira ngo idakwirakwira.”

Ibitaro bigera kuri 15 bikora ku mipaka, bifite ahantu hashobora gushyirwa umurwayi wa Ebola ntiyanduze abandi mu gihe yaba abonetse.

Haracyari imbogamizi

Repubulika Iharanira Demukarasi ya Congo nk’igihugu gihana imbibi n’u Rwanda gicumbikiye Abanyarwanda benshi ndetse imibare y’Urwego rw’Igihugu rushinzwe abinjira n’abasohoka igaragaza ko nibura ku mupaka uhuza u Rwanda na RDC hanyura abantu ibihumbi 34 ku munsi.

Minisitiri Gashumba yavuze ko hari imbogamizi z’aba baturage bumva ko kwambuka bajya mu bice birimo Ebola ariyo mahitamo badatekereje ku mahirwe yandi ari mu gihugu cyabo aho kujya kwishora ahari icyorezo babibona.

Yakomeje agira ati “Indi mbogamizi ni abanyamadini bamwe batarumva uburemere bw’iki kibazo. Urajya kumva ukumva atumiye abantu 1000 ngo baje gusenga baturutse Butembo, Beni ndetse bagera no ku mipaka bagashaka kubeshya, amahirwe ni uko imipaka yacu icunzwe neza ariko abanyamadini bareka gutumira abo bantu kugeza icyorezo kirangiye.”

Gashumba yongeyeho ko ingamba zose zashyizweho nta kinini zivuze mu gihe abaturage batumvise ko kujya ahari Ebola ari ukwishyira mu byago.

Ati “Ikindi n’ubwo twashyizeho ahantu ho gukarabira ntabwo byakurinda ijana ku ijana ahubwo icyarinda abaturage ni ukutambuka umupaka bajya ahari Ebola, kuko uyu munsi bavuze ngo hari amasasu avuga hakurya nta wakwambuka ariko kuba batarabona uwishwe na Ebola ngo babone uko imwica nabi niyo mpamvu bataratangira kubitinya.”

Minisitiri Gashumba yavuze kandi ko kugeza ubu mu Rwanda nta cyorezo cya Ebola kirahagaragara kandi ku bufatanye n’abaturage hari icyizere ko kitazahagera.

Ibimenyetso byayo ni ukugira umuriro, kurwara umutwe, kuribwa mu ngingo, kubabara mu muhogo, gucika intege, guhitwa, kuruka cyane kandi kenshi, kuribwa mu nda no kuva amaraso ahantu hose hari umwenge ku mubiri.

Minisitiri w'Ubuzima. Dr Diane Gashumba yasabye abanyarwanda kwitwararika ku isuku no kujya ahantu hagaragaye Ebola
Kwinjira mu Biro by'Umurenge wa Gisenyi bisaba kubanza gukaraba intoki n'amazi meza
I Rubavu ku mupaka uhuza u Rwanda n'Umujyi wa Goma ahazwi nko kuri Petite barrière hashyizweho aho abantu bakarabira

Video n’Amafoto: Mugwiza Olivier

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza