Umuryango w’Abanyarwanda baba muri Canada RCA-Canada, washimiye Leta y’u Rwanda yafashe icyemezo cyo gukuriraho Visa abanyamahanga baza mu gihugu inorohereza Abanyarwanda bafite ubwenegihugu bubiri baba hanze.

Ku wa 17 Ugushyingo, guverinoma y’u Rwanda yatangaje ko guhera tariki 1 Mutarama 2018, abanyamahanga baza mu Rwanda bazajya baka visa bageze ku butaka bw’u Rwanda.

Icyo gihe kandi yanoroherereje abanyarwanda baba mu mahanga bashaka kuza mu Rwanda bafite ubwenegihugu bubiri, ibemerera kuzajya bakoresha indangamuntu.

Si ibi gusa kuko hakuweho n’amafaranga yishyurwaga viza ku banyarwanda bagendera kuri pasiporo z’amahanga ariko bafite indangamuntu z’u Rwanda ku bihugu byemera ubwenegihugu bubiri.

Ubu ntibikiri ngombwa ko gusura u Rwanda bisaba kwaka viza no kwishyura amadolari 30$ yasabwaga mbere.

Mu izina ry’Abanyarwanda batuye muri Canada, RCA-CANADA Umuyobozi wabo, Joachim Mutezintare, yavuze ko bashimira byimazeyo icyemezo Leta y’u Rwanda yafashe ku bijyanye na visa.

Yagize ati “Iki cyemezo gishimangira ko Leta y’u Rwanda ihora ishaka imibereho myiza ya buri munyarwanda, yaba utuye mu guhugu ndetse no mu mahanga, by’umwihariko abanyarwanda batuye muri Canada barashima ubuyobozi bwiza bw’u Rwanda kuko budutera ishema ry’Ubunyarwanda kandi butanga icyizere cy’ejo hazaza heza.”

Yijeje ko bagiye gukomeza gushyigikirana umutima n’ubushobozi bwabo bwose, hamwe n’abandi Banyarwanda, gahunda zose za Leta y’u Rwanda zigamije guteza imbere igihugu no kwimakaza ubumwe bw’abanyarwanda.


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved