IGIHE

Abanyamuryango ba Rotary bafashije abarwayi bo mu bitaro bya Kibagabaga

0 9-02-2019 - saa 17:56, HABIMANA James

Abanyamuryango bagize Rotary Club Kigali-Virunga na Rotary Club Kigali-Doyen, basuye banagenera inkunga abarwayi bo mu bitaro bya Kibagabaga, kugira ngo babereke ko batari bonyine.

Abarwayi bafashijwe barimo abagore bafite ikibazo cyo Kujojoba, ababyeyi bamaze iminsi babyaye ariko nta bushobozi bafite ndetse n’abana bafite ibibazo by’imirire mibi.

Rotary Club yabashyikirije imfashanyo irimo imyenda yo kwifubika, ibigoma, ibitenge ku babyeyi, pampex, amavuta yo kwisiga ku barwaye indwara yo kujojoba n’ababyeyi bafite abana, amasabune n’amata.

Rugera Jeannette uhagarariye Rotary Club mu Rwanda, iri muri District ya 9150 igizwe n’ibihugu 10, yabwiye IGIHE ko kugeza ubu Rotary ifite abanyamuryango ku isi bagera kuri miliyoni 1.3, mu Rwanda ho bakaba ari 108 ariko bagenda biyongera.

Yavuze ko bakora ibikorwa by’ubugiraneza birimo gufasha mu buvuzi, uburezi, kugeza amazi meza ku baturage n’ibindi bikorwa bikenerwa mu buzima bw’abaturage no kurengera ibidukikije.

Rugera yavuze ko bahisemo gufasha abarwayi bo mu bitaro bya Kibagabaga, kuko hari abarwayi babazwe indwara yo kujojoba bashakaga gufasha ariko bagahitamo kubikora no ku babyeyi bakimara kubyara ndetse no ku bana bafite imirire mibi.

Ati “Twahisemo Kibagabaga kubera ko hari abarwayi babazwe indwara yo kujojoba, noneho kuko twashakaga no gufasha abo barwayi turavuga tuti reka tubishyire hamwe dufashe n’ababyeyi bakimara kubyara ndetse dufashe n’abana bafite imirire mibi.”

Ubusanzwe Rotary ikora igikorwa ngarukamwaka cyitwa Medicare, aho ikorana n’ibitaro bitandukanye nka CHUK, nk’umwaka ushize haje abaganga b’inzobere b’Abahinde barimo n’abanyamuryango ba Rotary, bakavura abarwayi batandukanye.

Rugera avuga ko ubu biyemeje ko gusura no gufasha abarwayi bagiye kujya babikora buri mwaka kuko basanze ari igikorwa gikenewe.

Niyomubyeyi Clarisse umwe mu bahawe imfashanyo na Rotary Club, yavuze ko bugiye gukomeza kumufasha cyane cyane ku ndwara yo Kujojoba arwaye.

Asanga gusurwa ari ukwereka aba barwayi bafite iki kibazo ko batari bonyine kandi badakwiye guhabwa akato.

Yashimiye inkunga leta y’u Rwanda ibagenera, irimo abaganga b’inzobere babavura.

Akarere ka 9150 ka Rotary kagizwe n’ibihugu icumi birimo Cameroun, Congo Brazzaville, Repubulika Iharanira Demokarasi ya Congo, Gabon, Guinée Equatorial, Repubulika ya Centrafrique, Sao Tomé et Principe, Tchad, u Burundi n’u Rwanda.
Akarere ka 9150 (District 9150) kashinzwe mu mwaka wa 1982.

Mu Rwanda hari amashami ya Rotary (Clubs) atandatu, arimo Rotary Club Kigali, Rotary Club Kigali Doyen Rotary Club Mont-Jali, Rotary Club Butare na Rotary Club Virunga ndetse n’iya Musanze yatangijwe mu 2014.

Aba babyeyi bashyikirijwe imfashanyo irimo n'amata
Ababyeyi bishimiye inkunga bahawe na Rotary Club
Abanyamuryango ba Rotary Club kandi basuye abarwayi barwaye kujojoba babagenera imfashanyo
Abanyamuryango bagize Rotary Club Kigali-Virunga na Rotary Club Kigali Doyen biyemeje kujya basura abarwayi buri mwaka
Basuye ababyeyi bamaze iminsi babyaye babagenera n'inkunga
Niyomubyeyi Clarisse umwe mu bahawe ubufasha na Rotary Club
Rugera Jeannette uhagarariye Rotary Club mu Rwanda yagaragaje urugwiro ku babyeyi babyariye Kibagabaga
Rugera Jeannette uhagarariye Rotary Club mu Rwanda iri muri District ya 9150 yavuze ko gahunda ari ugufatanya na leta mu bikorwa bifasha umuturage
Imfashanyo umuryango Rotary Club washyikirije abarwayi mu bitaro bya Kibagabaga
Ubwo aba banyamuryango ba Rotary bageraga ku bitaro bya Kibagabaga
Umuyobozi w'Umuryango Rotary Club Kigali-Virunga, Saudah Nalule, yavuze ko gahunda zo gufasha abarwayi zikomeje

Amafoto: Niyonzima Moses

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza