Abana bafungiye muri Gereza y’abana ya Nyagatare na bo bazindukiye mu bizami bya Leta bisoza amashuri abanza nk’abandi bari mu buzima busanzwe hirya no hino mu gihugu, kuri uyu wa 14 Ugushyingo 2017.

Abana b’abahungu 15 n’umukobwa umwe nibo bakoreye ibizamini muri gereza

Iyo umunyeshuri akoze ikizami cya Leta akagitsinda bisanzwe bimenyerewe ko ajya kwiga mu mashuri yisumbuye, bamwe bakoherezwa kwiga ku bigo bijyanye n’amahitamo yabo ariko abari muri gereza bagira umwihariko wabo.

Nubwo abo bari mu magereza bakora ibizamini byateguwe cy’Ikigo cy’igihugu gishinzwe uburezi (REB), bo abatsinze bo nta bigo bagenerwa nk’uko bimenyerewe ku bari mu buzima busanzwe.

Umuvugizi w’Urwego rw’Igihugu rushinzwe imfungwa n’abagororwa, CIP Hillary Sengabo, yatangarije IGIHE ko abana baba barahamwe n’ibyaha iyo batsinze ikizami cya Leta bakomeza gufungwa.

Yagize ati “Iyo batsinze bakomeza kwiga bafunze. Muri Gereza ya Nyagatare tuhafite amashuri y’icyiciro rusange ‘Tronc Commun’ dufite n’abarimu babigisha kandi dukurikiza porogaramu ya Minisiteri y’Uburezi.”

CIP Sengabo asobanura ko kugeza ubu mu bana bafunze ntabaragira ikibazo cyo kubura amashuri kuko hari n’ay’imyuga itandukanye.

Akomeza avuga ko abana bajya gufungirwa muri gereza ya Nyagatare baza barigaga mu mashuri abanza, iyo bahageze bakomeza kugororwa bakanigishwa hashingiwe ku cyiciro cya buri wese.

Mu bana16 bakoze ikizamini gisoza amashuri abanza kuri uyu wa Mbere, ufite igihano kinini ni uwakatiwe imyaka itanu. Bimwe mu byaha abana bakora bigatuma bakatirwa igifungo harimo gufata ku ngufu, ibiyobwenge hamwe n’ubujura.

Muri Gashyantare 2017, Perezida Paul Kagame yahaye imbabazi abana 16 bakoze ibizami bya Leta bakabitsinda. Muri aba bagororwa 11 harimo abakobwa babiri bakoze ikizamini cya leta gisoza amashuri abanza n’abandi batanu bakoze icy’icyiciro rusange.

[email protected]


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved