Abakozi ba MTN Rwanda bafashije abarokotse Jenoside batishoboye i Kirehe

0 14-04-2018 - saa 15:29, Dusabimana Aimable

Abakozi ba MTN Rwanda n’ubuyobozi bwayo basuye Urwibutso rw’i Nyarubuye mu Karere ka Kirehe, banagenera inkunga abarokokeye muri ako gace kabayemo ubwicanyi ndengakamere mu gihe cya Jenoside yakorewe Abatutsi.

Ku wa 13 Mata 2018 ubwo hasozwaga icyumweru cy’icyunamo, MTN Rwanda yunamiye abashyinguye mu Rwibutso rw’i Nyarubuye barimo abaguye muri kiliziya yaho ndetse no mu bindi bice bya Kirehe, inashyikiriza akarere inkunga ya 5,000,000 Frw igenewe abacitse ku icumu rya Jenoside ndetse inatanga sheki ya 2,000,000 Frw azifashishwa mu bikorwa bitandukanye by’Urwibutso rwa Nyarubuye.

Basobanuriwe amateka arambuye y’ubugome bw’indengakamere bw’abishe abari muri ako gace, aho banicaga bakanabarya ibice by’imibiri.

Umuyobozi Mukuru wa MTN Rwanda, Bart Hofker, yababajwe n’ibyo babonye, anavuga ko bifatanyije n’abarokotse Jenoside.

Yagize ati “Ni byiza cyane, byankoze ku mutima uburyo dukomeza ibi biganiro bikoranywe icyubahiro, twese turi hano kugira ngo twunamire abazize akarengane ndetse no kugira ngo dufashe mu kububakira kuri uru rwibutso dufasha n’abacitse ku icumu. Ikindi tugambiriye cyane kurushaho ni ukugira ngo dukumire ko ibintu nk’ibi byakongera kubaho nabyo dukwiye kubyerekezamo imbaraga zacu cyane.”

Yongeyeho ati “U Rwanda n’abanyarwanda bamaze kugaragaza ko bitazongera kubaho by’umwihariko muri iki gihugu, gusa igihari ni uko kwibuka bigomba gukomeza kubaho mu rwego rwo gukumira ko ibintu nk’ibi bitakongera kubaho.”

Umuyobozi w’Akarere ka Kirehe wungirije ushinzwe imibereho myiza y’abaturage, Mukandarikanguye Gérardine, yashimiye MTN Rwanda yatekereje gutera inkunga Urwibutso rwa Jenoside rwa Nyarubuye n’abarokotse batishoboye, ayizeza ko hazanakurikiranwa iterambere izabagezaho ikamenya ibyiza byashibutse mu bufasha n’ubwitange bagize.

Yagize ati “Ni igikorwa gikomeye cyane kandi umuntu yakwita icy’ubumuntu. uba mwaratekereje mu buryo bwombi, gutera inkunga urwibutso; rufite inyubako ikenera gusanwa, ifite abakozi bahoraho, ikenera gukorerwa amasuku, hanyuma mugatekereza gufasha abacitse ku icumu.”

Yongeyeho ati “Ndagira ngo mu izina ry’ubuyobozi bw’akarere tubashimire tubikuye ku mutima kuko turacyafite imiryango imwe iri mu bacitse ku icumu batishoboye, bafite ibibazo bitandukanye, ubu rero kuri twebwe iyi ni inkunga igiye kubafasha mu bibazo bitandukanye bafite.”

Mukanoheli Theopiste uri mu barokotse bahawe inkunga i Nyarubuye yashimye MTN Rwanda yabageneye ubufasha muri iki gihe bibuka imiryango yabo yashize.

Yagize ati “Ni iby’igiciro gikomeye kubona abantu nk’aba baza kudufata mu mugongo muri iki gihe. Tubiha agaciro cyane kuko muri ibi bihe twibuka imiryango yacu yashize.”

Yongeyeho ati “Iyi nkunga batugeneye izadufasha muri byinshi, aha mu Murenge wa Nyarubuye hari abacitse ku icumu benshi bagiye basigarana ibikomere bya Jenoside ku buryo bafite ubumuga budakira, muri abo nanjye ndimo, hari abatabasha gukora ariko dushobora gutegura umushinga wo kwiteza imbere ndetse no gufashanya hagati yacu ku bafite ibibazo bikomeye kurusha abandi tubifashijwemo n’ubuyobozi.”

Muri Jenoside, i Nyarubuye abakobwa bafatirwaga ku ngufu mu bwogero bw’ababikira mbere yo kwicwa, ababyeyi batwite bafomozwaga inda mbere yo kwicwa nyuma impinja zikajugunywa mu misarani. Hari kandi abajombwe ibisongo, abana bahondaguwewa ku nkuta n’ubundi bugome ndengakamere.

Urwibutso rwa Jenoside rwa Nyarubuye rugaragaramo ibimenyetso bitandukanye by’ubu bwicanyi rushyinguyemo imibiri isaga 58,000, rwuzuye neza muri Nyakanga 2016.

Umuyobozi Mukuru wa MTN Rwanda, Bart Hofker, yashyikirije akarere inkunga ya 5,000,000 Frw igenewe abacitse ku icumu rya Jenoside
Bashyize indabo ku mva zishyinguwemo imiryango y'abashyinguwe mu Rwibutso rwa Jenoside rwa Nyarubuye
Umuyobozi Mukuru wa MTN Rwanda, Bart Hofker n'umufasha we bashyira indabo ahashyinguwe imibiri y'abazize Jenoside yakorewe Abatutsi
Umukozi w'Urwibutso rwa Jenoside yasobanuriya amateka abakozi ba MTN Rwanda
Abakozi ba MTN Rwanda kuri Kiliziya ya Nyarubuye yiciwemo Abatutsi benshi
Abakora muri MTN Rwanda beretswe ibimenyetso bitandukanye bigaragaza ubugome Jenoside yakoranywe i Nyarubuye, birimo ifuru bokerezagaho ibice by'imibiri y'abishwe
Umuyobozi w’Akarere ka Kirehe wungirije ushinzwe imibereho myiza y’abaturage, Mukandarikanguye Gérardine, yashimiye MTN Rwanda
Abakozi batandukanye ba MTN Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza