Abageze mu za bukuru basabye leta kubashyiriraho ibitaro na gahunda yo kubafasha byihariye

2 15-04-2018 - saa 09:27, Rabbi Malo Umucunguzi

Abageze mu za bukuru basabye guverinoma gushyiraho uburyo bwihariye bwo kubafasha burimo nko kububakira ibitaro byihariye, kubafasha kubona uburyo bwo gukora ingendo no kubona amikoro abafasha gukora ibintu byinjiriza inyungu.

Mu kiganiro yagiranye na New Times, Perezida w’ihuriro nyarwanda ry’abari mu kiruhuko cy’izabukuru (ARR), Modeste Munyuzangabo, yavuze ko hatariho uburyo buhamye banyuzamo ibitekerezo ku bibazo byugarije ubuzima bwabo, bityo gushyiraho gahunda yihariye ibagenewe bikaba byakemura ibibazo byinshi nk’ubuvuzi no kubonera ubushobozi imishinga y’abari mu za bukuru.

Yagize ati “Abari mu zabukuru bakenera ibitaro biba bizobereye mu gutanga ubuvuzi ku bakuze, kubera ko baba bageze mu gihe cy’indwara zibasira abantu bakuze cyane nka diabète, umuvuduko ukabije w’amaraso, kanseri y’ubugabo bw’epfo, umugongo n’izindi,”

Munyuzangabo yanavuze ko nk’uko hariho ibitaro byihariye byita ku bana, hakenewe n’ibitaro byita by’umwihariko ku bageze mu za bukuru.

Yakomeje agira ati “Guverinoma ikwiye kugira gahunda igenewe abari mu kiruhuko cy’izabukuru nk’uko habaho izigenewe urubyiruko, abantu bafite ubumuga n’abandi.”

Ibyo ngo abivugira ko nubwo umuntu aba asheshe akanguhe cyangwa ari mu kiruhuko cy’izabukuru, hari umusanzu ukomeye aba agishobora gutanga mu iterambere ry’igihugu, bityo bakeneye gufashwa mu buryo burimo no koroherezwa kubona ubushobozi bwo gukora imirimo itandukanye ibyara inyungu.

Yakomeje agira ati “Nk’urugero, hari abahanga mu by’ubutabire bari mu za bukuru bishyize hamwe bakora umushinga wo gutunganya umucyayicyayi umwe uhumuza icyayi, ariko baza kubura ubushobozi. Iyo baba bafite uburyo bwihariye banyuzamo ibibazo byabo, bashoboraga kubona inkunga”

Urugaga rw’Umurimo n’Ubuvandimwe bw’Abakozi mu Rwanda, COTRAF, Dominique Bicamumpaka, yavuze ko uretse kuzamura amafaranga bahabwa muri pansiyo bijyanye n’igiciro cy’imibereho y’iki gihe, kubagabanyiriza amafaranga y’ingendo cyangwa kuyakuraho ku bari mu za bukuru byaba ari ukubafasha.

Yakomeje agira ati “Mu gihe cyacu umuntu usheshe akanguhe yabaga ari umuntu wubashywe cyane muri sosiyete, ibitekerezo byabo bikubahwa kandi bigahabwa agaciro.” Ibi yabivuze agaragaza ko baba bazobereye mu nzego zinyuranye baramazemo igihe, ku buryo ubumenyi bafite bwakomeza kwifashishwa.

Yavuze ko hajya hakorwa inyigo buri myaka itanu, hagasuzumwa niba pansiyo ihabwa abari mu kiruhuko cy’izabukuru ijyanye n’ikiguzi cy’imibereho cyangwa ibiciro ku isoko, kubera ko mu bihugu bitandukanye, usanga amafaranga abari muza bukuru bagenerwa yongerwa buri myaka ibiri.

Yakomeje agira ati “Kwita ku bari mu kiruhuko cy’izabukuru ni no gutera akanyabugabo abakozi bakiri bato kuko bitanga ubutumwa ko ubwo buryo bwo kubitaho nabo buzabageraho ubwo bazaba bageze mu zabukuru.”

Inama y’Abaminisitiri yo muri Gashyantare 2018, yemeje Iteka rya Perezida ryongera amafaranga ya pansiyo n’ay’ibyago bikomoka ku kazi atangwa n’Ikigo cy’Ubwiteganyirize mu Rwanda.

Iki gikorwa cyatumye umuntu wahabwaga amafaranga make ya pansiyo 5,200 Frw azamuka akagera ku 13,000Frw ku kwezi; ni mu gihe ibigo bivugira abageze mu za bukuru byo bivuga ko yari akwiye kuba nibura 25 000 Frw.

Imibare ya Banki Nkuru y’u Rwanda igaragaza ko kugeza mu mpera za Kamena 2017, abiteganyirizaga muri pansiyo bari 446,409, mu gihe abayihabwaga bari 17,378.

Perezida w’ihuriro nyarwanda ry’abari mu kiruhuko cy’izabukuru (ARR), Modeste Munyuzangabo, yavuze ko nta buryo buhamye banyuzamo ibitekerezo ku bibazo byugarije ubuzima bwabo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Rutanga 2018-04-16 06:41:11

Uyu musaza arabaza ibiribyo. Gusa haribyo yibagiwe kubaza kandi bihangayikishije bagenzi be bageze muzabukuru. Reka nibutse bicye muribyo: 1. Kuba waritegenyirije imyaka igeze kuri 35 wakagombye guhabwa pension automatiquement niba uyishaka kuko uba unaniwe niba ugejeje imyaka 55, hari abo itegeko ry’imyaka 60 ryagonze ubu bakirwana no kuzagera kumyaka 60 bari muri iyi categorie. Nimubavuganire nabo bahabwe pension bareke abakiri bato bakomeze akazi nabo bajye hanze bahange imirimo izamura igihugu.
2. Abo basaza nibabe aribo bakangurirwa guhanga umurimo dore ko aba ari nabo bafite ubumenyi na experience maze bahe urubyiruko akazi ruzanakomeze izo businesses nyuma y’abasaza. Mwibuke ko abasheshe akanguhe baba banafite guaranty kubaguriza bitagora amabanki na Leta.

2
Peter Gahima 2018-04-16 04:41:00

Ko mbona muriho musaba ibindi n’ibyo mwemerewe mutarabihabwa? Nimusabe hokorwe ibishoboka byose RSSB ibanze ibahe amafaranga ya pansiyo nk’uko byemejwe ko agomba kwiyongera, ibindi bizaba biza nyuma...

Kwamamaza