Minisiteri y’Imicungire y’Ibiza no gucyura Impunzi itangaza ko ibiza byiganjemo imvura nyinshi bimaze kwangiza ibintu bifite agaciro k’amafaranga y’ u Rwanda asaga miliyari esheshatu n’igice kuva mu kwezi kwa Mutarama 2017.

Iyi minisiteri ivuga ko ibyabaruwe byangiritse bifite agaciro birimo inzu z’abaturage zasenyutse burundu n’izasenyutse igice, imyaka, ikiguzi cy’ubuvuzi ku bakomeretse n’agaciro k’ibikorwaremezo byasenyutse.

Mu kiganiro n’abanyamakuru, kuri uyu wa 12 Ukwakira 2017, Umuyobozi w’Ishami rishinzwe ubutabazi no gusana ibyangijwe n’ibiza muri MIDIMAR, Philippe Habinshuti, yavuze ko muri uyu mwaka abantu 52 bamaze kwicwa n’ibiza, 119 barakomeretse, inzu 127 zirasenyuka burundu naho 4620 zirangirika, ibihingwa biri kuri hegitari 2014 bitikirira mu mirima n’amatungo 125 arapfa.

Yavuze ko by’umwihariko kuva imvura y’iki gihembwe cy’ihinga itangiye kugwa muri Kanama imaze guhitana abantu 20.

Iyi mvura yakomerekeje abantu 57 yangiza inzu 2425 n’imyaka ihinze kuri hegitari 1551, yica amatungo 99, isenya ibyumba by’amashuri 107, ibiraro 13 n’ibiti bijyana intsinga z’amashanyarazi 45.

MIDIMAR ivuga ko uturere twibasiwe n’ibiza cyane muri uyu mwaka ari Rusizi, Nyamasheke, Ngoma, Huye na Nyagatare.

Nyuma yo gusanga inzu zasenywe n’ibiza muri uyu mwaka ari nyinshi, Ikigo cy’Igihugu gishinzwe Imiturire, RHA, kivuga ko cyabaruye abantu 10 000 batuye mu manegeka, muri bo 3905 bazimurwa mbere y’uko umwaka urangira.

Minisitiri muri MIDIMAR, Debonheur Jeanne d’Arc, yavuze ko kuva muri Kanama kugeza ubu, Leta imaze gutanga miliyoni zisaga 65 z’amafaranga y’u Rwanda zo gutabara abahuye n’ibiza no kwimura abatuye mu manegeka ariko ko ari igikorwa gikomeza.

Ati “Hari abatagerwaho n’ubwo bufasha, turacyakomanga hirya no hino, kuko ibiza biratungurana, turacyashakisha uburyo twakomeza kubafasha, aho tuzajya tubona bari mu kaga kurusha abandi nibo tuzajya duheraho dukomeze kubitaho.”

MIDIMAR kandi yatangije ubukangurambaga bwo kwigisha no gufasha abaturage guhangana n’ibiza, mu cyumweru cyahariwe kugabanya ingaruka ziterwa na byo.

Minisitiri Debonheur avuga ko icyo cyumweru kizatangirira ku wa 13 kugeza ku wa 19 Ukwakira 2017, mu Murenge wa Ngeruka mu Karere ka Bugesera, ahazabera umuganda wo gukomeza ibisenge.

Iyi minisiteri inakomeje ibikorwa byo kurinda abaturage inkuba, bategeka abazamura inyubako kuzishyiramo imirindankuba no kwigisha abaturage uko bazitwara muri iki gihe cy’imvura.

Minisitiri ushinzwe gukumira ibiza no gucyura impunzi, Debonheur Jeanne d’Arc
Umuyobozi w'Ishami rishinzwe ubutabazi no gusana ibyangijwe n'ibiza muri MIDIMAR, Philippe Habinshuti


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved