IGIHE

Wendy Waeni wigeze gutumirwa na Perezida Kagame yakeneshejwe n’uwari umujyanama we

3 8-08-2019 - saa 18:31, Uwiduhaye Theos

Umwana wo muri Kenya witwa Wendy Waeni ufite impano mu mikino ngororamubiri wamamaye ubwo yahuraga na Perezida Kagame, arembejwe n’ubukene yatewe n’uwari umujyanama we.

Mu kiganiro yahaye Citizen Tv, Wendy yavuze ko Joe Mwangi wabaye umujyanama we yamunyunyuje imitsi akishakira inyungu ze bwite bagatandukana nta n’urwana rwo kwishima uyu mwana afite akuye mu bikorwa yagiye akorana n’uyu mugabo mu myaka itanu ishize.

Uyu mwana yagize ati “Nagiye nitabira ibikorwa bitandukanye by’imikino ngororamubiri ku Isi yose. Ubu mba muri Huruma kubera Joe Mwangi. Nitabiriye ibikorwa by’imikino ngororamubiri mu Rwanda, u Budage n’u Bushinwa ariko nta n’urupfumuye nigeze ntunga. Mama wanjye ari mu bibazo, ubu acuruza bombo n’itabi nijoro, tuba mu kazi k’icyumba kimwe.”

Yakomeje avuga uretse kuba Joe Mwangi yaramuririye amafaranga, ari nawe usigaye ukoresha imbuga nkoranyambaga ze ku buryo hari igihe ashyiraho ibintu atazi birimo n’ibisetsa abantu bakamwita umushizi w’isoni kandi arengana.

Joe mu gusubiza we yabanje guhakana kuba yaragiye agendana n’uyu mwana.

Ati “Ku mashusho byavuzwe ko njyewe nagendanye mu bihugu bitandukanye ndi kumwe na Wendy, ariko ntabwo nigeze mva muri iki gihugu ndi muri kompanyi ya Wendy Waeni.”

Yakomeje avuga ko umuntu waba afite ikimenyetso kimugaragaza ariko kumwe na Wendy hanze ya Kenya yakigaragaza, mu gihe hari amashusho yagaragajwe n’Umunyamakuru Eugene Anangwe y’uyu mugabo yazanye n’uyu mwana mu Rwanda.

Joe Mwangi ntabwo yorohewe ku mbuga nkoranyambaga muri Kenya ndetse Duncan Ondimu uyobora ibiro bikuru by’Ubushinjacyaha muri Kenya yanditse kuri Twitter avuga ko agiye gushakira uyu mwana ubutabera.

Yakomeje yibaza ukuntu umubyeyi atuma umwana akoreshwa muri ubu buryo mu gihe kirenze ukwezi, umwaka umwe bikagera ku myaka itanu.

Umunyamabanga w’Ishyaka Orange Democratic Movement (ODM) Edwin Sifuna, nawe yahishuye ko hari hari igihe bigeze kwemerera Wendy ibikoresho byo gukinana bakanamusinyira sheki hashira icyumweru Joe Mwangi akaza kuyihinduza ashaka ko bayishyira mu mazina ye, byose agahita abihagarika, bakabyihorera.

Ku wa 12 Ukuboza 2014, ubwo Wendy Waeni yarimo asusurutsa abitabiriye ibirori by’umunsi w’ubwigenge bwa Kenya “Jamhuri Day”, byahereye muri Nyayo Stadium bigakomereza mu Ngoro y’Umukuru w’Igihugu, yabashije kuganira na Perezida Uhuru Kenyatta wari kumwe na Madamu we, ndetse n’abandi bakuru b’ibihugu barimo na Perezida Kagame.

Ubwo yari amaze kuganira na bo, Ikinyamakuru Tuko.co.ke cyabajije Wendy Waeni ijambo rikomeye Perezida Uhuru Kenyatta yamubwiye, asubiza mu bwenge, avuga ko ari ibanga rikomeye hagati yabo.

Gusa avuga ko kimwe mu byo ahakuye, ari uko Perezida Kagame yamwemereye kuzamutumira i Kigali.

Uwo mwana w’umukobwa yakomeje kubizirikana, ndetse kuwa 8 Kanama 2016, abicishije ku rubuga nkoranyambaga rwe rwa Twitter, yibutsa Perezida Kagame agira ati “Ndacyategereje ubutumire bwanjye mu Rwanda nk’uko mwabinsezeranyije Nyakubahwa.”

Perezida Kagame yahise asubiza amwizeza kumugezaho ubutumire mu gihe cya vuba, ati “Ndimo kubitunganya, ubutumire buzoherezwa vuba. Wagize neza gukomeza kubikurikirana.”

Kuwa 9 Nzeri 2016, ni bwo uwo mwana w’umukobwa wamaze kuba icyamamare, yakiriwe n’Umukuru w’igihugu cy’u Rwanda, Paul Kagame, gusa nta cyatangajwe mu byo baganiriye.

Wendy Waeni yatangiye imikino ngororamubiri afite imyaka ine gusa, ndetse yabashije kwiyereka imbere y’abakuru b’ibihugu banyuranye muri Afurika, ikintu cyamushimishije mu buzima bwe nk’uko abigaragaza haba ku mbuga ze nkoranyambaga, Facebook, Twitter cyangwa Instagram.

Abandi bakomeye Wendy yahuye na bo, twavuga Perezida Uhuru Kenyatta wa Kenya, Perezida John Mahama wa Ghana, Perezida Museveni wa Uganda, Jacob Zuma wa Afurika y’Epfo na David Cameron wari Minisitiri w’Intebe w’u Bwongereza.

Uretse inzozi yakabirije muri Afurika, uyu mukobwa yazengurutse Aziya n’u Burayi yerekana impano ye, ahagararira Kenya mu imurika mpuzamahanga ry’impano, World Talent Expo, mu bihugu nka Taiwan n’u Bushinwa.

Perezida Kagame ubwo yahuraga bwa mbere na Wendy Waeni
Ubwo Perezida Kagame yakiraga Wendy Waeni wari ufite inzozi zo kuganira na we
Ubwo bahuraga Wendy yahaye Perezida Kagame impano
Joe Mwangi (wambaye umutuku) avuga ko atigeze ava muri Kenya ajyanye na Wendy nyamara muri iyi foto yo mu Rwanda agaragaramo
Wendy n'umubyeyi we bifotozanya na Perezida Kagame
Wendy Waeni, intyoza mu myitozo ngororamubiri yakeneshejwe n'uwari umujyanama we
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Manishimwe Pascal 2019-08-09 03:38:18

Uwo muteka mutwe afatwe yishyure uwomwana

2
shadia 2019-08-09 02:44:06

Sha nubundi ururugabo rurasa nurujura pe, doruko rureba!!!! Ahubwo nibarumwambure rutazanamuhohotera, apuuuuuu. Rwamufatiranye nubujiji bwa nyina, ibaze nukuli kuba arigucuruza bombon nitabi, ubwose uyumwana aracyiga aracyabona minerval mwakabyara mwe???? Nukuntu arikeza, nibakazana mu Rwanda. Birababaje

3
John 2019-08-08 14:42:49

Birababaje niba ari ukuri. Gusa abanyarwanda tuzamufasha ahumure!

Kwamamaza