IGIHE

Uwabaye Minisitiri mu Burundi akurikiranywe n’ubutabera mu Bufaransa ashinjwa gukoresha ubucakara umukozi we

1 10-09-2019 - saa 10:14, Habimana James

Ubutabera mu Bufaransa bwashinje Gabriel Mpozagara wabaye Minisitiri w’Ubutabera mu Burundi n’umugore we, ibyaha byo guhohotera no gukora ubucakara ku mukozi wabo.

Uyu muryango urashinjwa ko umukozi wabo witwa Methode Sindayigaya w’imyaka 39 bamumaranye imyaka 10 bamukoresha mu buryo bw’ubucakara, aho batuye mu Bufaransa.

Mpozagara yabaye Minisitiri w’Ubutabera mu Burundi anakora mu Ishami rya Loni ryita ku Burezi, Ubumenyi n’Umuco (UNESCO).

BBC yavuze ko Methode Sindayigaya yavuye mu Mujyi wa Bujumbura mu 2008 agiye mu Bufaransa aho yari yemerewe akazi ko kwita ku mwana w’uyu muryango wari ifite ibibazo by’ubumuga, ni mu gace ka d’Avray hafi y’Umurwa Mukuru Paris.

Methode yabwiye abacamanza ko Gabriel Mpozagara n’umugore we bamwishyuriye urwandiko rw’inzira ndetse n’itike y’indege kugira ngo agere mu Bufaransa.

Akigera muri iki gihugu, urwandiko rwe rw’inzira bararumwambuye amara imyaka 10 yose muri uru rugo akoreshwa mu buryo bw’ubucakara kandi adahembwa.

Yagize ati “Nakoreshwaga mu buryo budasanzwe, banyambuye uburenganzira bwose, nagumaga mu nzu nkingiranye kandi nkakora iminsi irindwi ntaruhuka, nari nk’umucakara ariko ubu nizeye ubutabera.”

Yavuze ko mu 2018 aribwo umuntu wari uje gukora muri urwo rugo, yabwiye Polisi ko yabonye umuntu bigaragara ko afite ibimenyetso by’uburwayi uryamye ahantu hatameze neza.

Mpozagara n’umugore we bahakanye ibyo baregwa, bavuga ko urwandiko rw’inzira rwa Sindayigaya rutigeze rufatirwa.

Yabwiye abacamanza ko Sindayigaya ariwe ubwe utarashakaga kuva mu rugo ngo abe yagira aho ajya.

Mu 2007, nabwo uyu muryango wagaragaye imbere y’ubutabera bashinjwa ibyaha bimeze nk’ibi ku bandi bana babiri nabo bakomoka mu Burundi.

Mu gihe iki cyaha cyaba kibahamye, bashobora gufungwa imyaka itatu no gutanga amayero ibihumbi 150.

Icyemezo cy’urukiko kizasomwa tariki 21 Ukwakira uyu mwaka.

Gabriel Mpozagara wabaye Minisitiri w’Ubutabera mu Burundi arashinjwa guhohotera umukozi we
Methode Sindayigaya w’imyaka 39 bamumaranye imyaka 10 bamukoresha mu buryo bw’ubucakara
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Hugo 2019-09-10 20:03:24

Birababaje

Kwamamaza