IGIHE

Uburyo Ebola yinjiye muri Uganda

0 12-06-2019 - saa 21:05, HABIMANA James

Nyuma y’igihe icyorezo cya Ebola kiyogoza Repubulika Iharanira Demokarasi ya Congo, Minisiteri y’Ubuzima muri Uganda hamwe n’Ishami ry’Umuryango w’Abibumbye ryita ku buzima (OMS), bemeje ko yagaragaye muri icyo gihugu.

Minisitiri y’Ubuzima muri Uganda Dr Jane Ruth Acen yasohoye itangazo rigaragaza uko Ebola yageze muri iki gihugu ndetse amakuru agezweho ni uko imaze guhitana abantu babiri ari bo umwana w’imyaka itanu na nyirakuru.

Yavuze ko ari umwana w’umuhungu w’imyaka itanu, wavuye muri RDC, ari kumwe na nyina tariki 10 Kamena 2019.

Dr Ruth Acen yavuze ko nyina asanzwe ari umunye-Congo ariko washakanye n’umunya-Uganda, bakaba batuye muri Kasese.

Yavuze ko uyu mugore yari yasubiye muri Congo kuvuza Se indwara ya Ebola, ariko nyuma yaje kumwica.

Minisiteri y’Ubuzima muri iki gihugu yagaragaje ko nyuma uyu mugore n’umwana we baje kugaruka muri Uganda bari kumwe n’abandi bantu bane bo muryango we, bose bakomoka muri RDC.

Aba bantu ngo banyuze ku mupaka wa Bweru, ariko kubera ko uyu mwana yari arwaye nyina yihutiye kumujyana ku bitaro bya Kagondo.

Minisiteri y’Ubuzima yavuze ko bimwe mu bimenyetso uyu mwana yagaragazaga byarimo kuruka, kubabara umutwe, kuruha no kuruka amaraso.

Uganda yavuze ko muri iryo joro ubwo aba baturage bazaga, ubuyobozi muri Congo bwabahaye amakuru ko hari abantu binjiye mu gihugu bafite Ebola ndetse bagaragaza amazina yabo na nimero zabo za telefoni.

Dr Ruth Acen yagize ati “Nyuma yo kubona aya makuru ibigo by’ubuzima byahise biteguzwa ndetse bihabwa n’amakuru yose y’uko ikibazo gihagaze.”

Yavuze ko uyu mwana yaje kugaragara ku kigo cya Kagondo afite ibi bimenyetso bya Ebola, ahita yoherezwa ahantu hihariye.

Amaraso ye yahise yoherezwa gupimwa mu kigo cya Uganda gipima virusi tariki 11, ibisubizo biza bigaragaza ko arwaye Ebola.

Dr Ruth Acen yavuze ko aba bantu bose bashyizwe ahantu hihariye, babiri muri aba bakaba bagaragaza ibimenyetso bisa nk’iby’umuntu urwaye Ebola, ibizamini bikaba biri butangazwe vuba.

Minisiteri y’Ubuzima muri iki gihugu yavuze ko abandi bantu umunani babonanye n’aba bamaze gushyirwa ahantu hihariye mu gihe barimo gukurikiranwa.

Iki gihugu cyavuze ko cyo na OMS bamaze kohereza itsinda ry’abaganga muri aka gace gukurikirana iki kibazo, babaka banateganya gutanga urukingo rwa Ebola tariki 14 uku kwezi.

Virus ya Ebola ni imwe mu zikaze kuko yandurira mu gukoranaho k’umuntu uyifite n’utayifite binyuze mu matembabuzi. Bimwe mu bimenyetso byayo birimo kugira umuriro mwinshi, gucika intege, ububabare bukabije, kuribwa umutwe, kubabara mu mihogo, kuva amaraso ahantu hatandukanye hari umwanya n’ibindi.

Umuntu uhuye n’uwanduye Ebola ahita ahabwa urukingo agakurikiranwa ari ahantu ha wenyine mu gihe cy’iminsi 21. Kugeza ubu muri Uganda nta kindi gice cy’igihugu kiratangazwa ko cyaragaragayemo umuntu ufite iyi ndwara.

U Rwanda nk’igihugu cyegeranye na Uganda na RDC, ruheruka gutangiza gutanga urukingo rwa Ebola rwitwa “rVSV-ZEBOV” ku bajyanama b’ubuzima n’abandi bakozi bakira abarwayi mu duce twegereye imipaka ya Repubulika Iharanira Demokarasi ya Congo (RDC) dushobora gukwirakwiramo icyorezo cya Ebola kurusha utundi.

Ni ingamba yafashwe mu kurushaho kwitegura guhangana na Ebola, yiyongereye ku zirimo imyitozo yahawe abakora mu rwego rw’ubuzima mu duce twegereye umupaka no gupima umuntu wese winjira mu Rwanda aturutse mu bihugu birangwamo iyi ndwara.

Kwamamaza
Kwamamaza

Izindi nkuru wasoma

6 2 18-06-2019
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza