IGIHE

U Bufaransa ntibwanyuzwe n’intsinzi ya Félix Tshisekedi watorewe kuyobora RDC

20 10-01-2019 - saa 12:06, Ferdinand Maniraguha

Impungenge ni zose ku ntsinzi y’umukandida utavuga rumwe na Leta Repubulika Iharanira Demokarasi ya Congo, Félix Antoine Tshisekedi, nyuma y’uko bamwe mu bo bari bahanganye bayamaganye, u Bufaransa bukagaragaza ko butanyuzwe.

Komisiyo y’amatora mu ijoro rishyira kuri uyu wa Kane, yatangaje ibyavuye mu matora ya Perezida yabaye tariki 30 Ukuboza 2018 byari bitegerejwe na benshi.

Muri 97 % y’amajwi amaze kubarurwa, Tshisekedi ni we waje imbere n’amajwi 38.57 %, akurikirwa na Martin Fayulu wagize amajwi 34.83 % naho Emmanuel Ramazani Shadary yaje ku mwanya wa gatatu n’amajwi 23.84 % .

RFI yatangaje ko Minisitiri w’ububanyi n’amahanga w’u Bufaransa, Jean-Yves Le Drian yagaragaje impungenge ku byatangajwe mu matora ya RDC.

Le Drian yavuze ko bihabanye n’ibyo bari bagiye babona hirya no hino, gusa asaba umutuzo mu gihe bagitegereje uko bigenda.

Ati “Bisa n’aho ibyatangajwe byo gutsinda kwa Tshisekedi bitajyanye n’ibyo twagiye tubona kuko abasenyeri bakoze igenzura batangaza ibihabanye na biriya. Nkeka ko dukwiye gukomeza gutuza tukirinda imvururu tugategereza umucyo ku byavuye mu matora .”

Yakomeje agira ati “U Bufaransa bugomba kugira icyo buvuga kuko ni kimwe mu bihugu bigize akanama k’umutekano ka Loni. Mu cyumweru gishize twahamagaye ako kanama kugira ngo gakurikirane ko ibitangazwa biba ibihuye n’ukuri.”

Mu Cyumweru gishize, Inama nkuru y’Abepiskopi Gatolika muri RDC (Cenco) yari yatangaje ko izi uwatsinze amatora, isaba Komisiyo y’amatora kutazatangaza ibihabanye n’ibyo abaturage batoye.

Cenco ivuga ko yohereje indorerezi zayo mu biro by’itora bigera ku bihumbi 50, mu biro by’itora 70 000 byari mu gihugu hose.

Radiyo Mpuzamahanga y’Abafaransa (RFI) yatangaje ko bamwe mu badipolomate babashije kubona raporo ya Cenco, bemeza ko Martin Fayulu ari we watsinze amatora.

Fayulu yabwiye RFI ko ibyo Komisiyo y’amatora yatangaje ari agahomamunwa akandi bihabanye n’ibyo abaturage batoye.

Yagize ati “Ni agahomamunwa. Abantu bakunze kujya babeshya abaturage none barashaka gukomeza kubabeshya. Barabizi ko Tshisekedi atatsinze, ntashobora gutsinda. Intsinzi ni iy’abaturage niba twubaha abaturage, tugomba kuyibaha. Nibo bahisemo.”

Fayulu yavuze ko amajwi agomba kubarwa bundi bushya, agatangazwa ibiro by’itora ku bindi.

Ati “Mu 2006, bibye intsinzi ya Jean Pierre Bemba, mu 2011 bibye intsinzi ya Etienne Tshisekedi, uyu munsi ntabwo bashobora kongera kwiba instinzi y’abaturage.”

Fayulu yavuze ko habayeho ubwumvikane hagati y’abambari ba Perezida Joseph Kabila ndetse n’aba Tshisekedi bagapanga uko biba amajwi.

Uwari ukuriye ibikorwa byo kwiyamamaza bya Tshisekedi, Vital Kamerhe yemereye RFI ko bahuye koko ariko ngo baganairaga ku buryo bwo kubungabunga umutekano muri ibi bihe by’amatora.

Yavuze ko iyo haza kubaho kuganira kwiba amajwi, impuzamashyaka ya Tshisekedi yakabaye yanatsinze mu matora y’Abadepite n’ayo ku rwego rw’Intara.

Hategerejwe kumva icyo Cenco itangaza nyuma y’ibyo Komisiyo y’amatora yatangaje.

Abatishimiye ibyavuye mu matora bahabwa iminsi icumi yo kujuririra urukiko rurinda Itegeko Nshinga.

Ni ubwa mbere muri RDC hagiye kuba ihererekanya ry’ubutegetsi rikozwe mu mahoro kuva icyo gihugu cyabona ubwigenge mu 1960.

Minisitiri w’ububanyi n’amahanga w’u Bufaransa, Jean-Yves Le Drian yagaragaje impungenge ku byatangajwe mu matora ya RDC
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
José 2019-01-11 12:29:26

Ahubwo c yahangayikishwa n’aba jilets jaune mbere yuko bahangayikira n’inyurwa ry’ibibera muri Africa. President wa Congo azayobora abanye Kongo ntabwa azayobora abafransa

2
Bakame 2019-01-10 15:00:03

Gooooooooo! Goli goli goli goli! Igitego kiza cyanee gitsinzwe na Joseph kabila! Ubundi se ningombwa ngo abanyecongo nibatora hanyurwe abafaransa!! Bose batora macron bibwiye ko twanguzwe! Coup de chapeau kuri kabila kabange

3
Bakame 2019-01-10 15:00:01

Gooooooooo! Goli goli goli goli! Igitego kiza cyanee gitsinzwe na Joseph kabila! Ubundi se ningombwa ngo abanyecongo nibatora hanyurwe abafaransa!! Bose batora macron bibwiye ko twanguzwe! Coup de chapeau kuri kabila kabange

4
Pablo Escoble 2019-01-10 14:58:26

Abafransa baba bashaka ko abantu bicana nabagome

5
MANIRIHO DJUMA 2019-01-10 13:15:29

ABO BAPADIRI NIBAREKE UWATOWE AYOBORE

6
B 2019-01-10 10:58:05

Abafaransa bari kwanga Macron wabo, none barashaka no gutekerereza aba congoman kwanga uwo bitoreye

7
Safari Benoit 2019-01-10 09:57:47

Aba bayobozi b’idini bage bavuga ijambo ry’Imana bareke guteranya abantu.
Bavugaga ko bazi uwatsinze se ni bo babaruye amajwi?

8
Karebu 2019-01-10 08:56:09

Afrika wee waragowe. America ngo yari yiteguye guhita yohereza yo ingabo zijya gusahura zitwaje kurinda umutekano. Any way nshimiye president Kabila uru ni urugero rwiza atanze kubandi ba presidents bo mu karere k’ibiyaga bigari. Ark ubu kko AU yashyizeho igisikare cyayo. Tikajya twikemurira ibibazo by’iwacu tukareka kwikururira ba rusahurira mu nduru kko. I dream to be Rwandan of Africans.

9
Truth5 2019-01-10 07:09:16

Mu makuru mfite atagira aho abogamiye kandi yizewe 100% nuko Fayulu ariwe watsinze amatora.

10
Truth5 2019-01-10 07:07:21

Mu makuru mfite atagira aho abogamiye kandi yizewe 100% nuko Fayulu ariwe watsinze amatora.

Paji: 1 | 2  

Kwamamaza