Perezida Sirleaf yegukanye igihembo cya ‘Mo Ibrahim’ gihabwa abayoboye neza muri Afurika

1 12-02-2018 - saa 10:20, Cyprien Niyomwungeri

Uwahoze ari Perezida wa Liberia, Ellen Johnson Sirleaf, yegukanye igihembo cya Mo Ibrahim 2017, kubera imbaraga zidasanzwe yakoresheje mu gusubiza ku murongo igihugu nyuma y’intambara za gisivili.

Iki gihembo gihabwa umuperezida wo muri Afurika wayoboye neza igihugu cye. Gitangwa n’umuherwe w’Umunya- Sudani Mo Ibrahim, kikagenerwa umuyobozi ujya ku butegetsi atowe n’abaturage akavaho ku bushake mu rwego rwo gukangurira abayobozi kuva ku butegetsi neza.

Sirleaf, yayoboye Liberia manda ebyiri kuva mu 2006 kugeza 2017. Ni uwa gatanu mu begukanye iki gihembo gihabwa ababaye abakuru b’ibihugu bagateza imbere ibihugu byabo, bagashyigikira demokarasi n’uburenganzira bwa muntu ku bw’inyungu za rubanda kandi bagaharanira iterambere rirambye.

Umuyobozi wa Komite itanga iki gihembo, Dr Salim Ahmed Salim, yavuze ko Sirleaf yagiye ku butegetsi igihugu cye cyarasenywe burundu n’intambara za gisivili, akayobora urugendo rw’ubwiyunge agamije kubaka igihugu na demokarasi.

Yakomeje avuga ko muri manda ebyiri yakoreye abaturage atiganda akubaka umusingi Liberia izubakiraho kugira ngo ive mu bibazo bikiyugarije.

Sirleaf yiyongereye ku bandi batsindiye iki gihembo barimo; Hifikepunye Pohamba wayoboye Namibia wagihawe mu 2014, Pedro Pires wa Capo Verde mu 2011, Festus Mogae wa Botswana mu 2008, Joaquim Chissano wa Mozambique mu 2007 na Nelson Mandela, wahawe icy’icyubahiro mu 2007.

Iki gihembo gifite agaciro ka miliyoni eshanu z’amadolari ya Amerika atangwa mu myaka 10, hakiyongeraho n’ibindi bihumbi 200 by’amadolari uwacyegukanye ahabwa buri mwaka kugeza apfuye. Icyakora aya atangira gutangwa nyuma y’iriya myaka 10. Abahwa kandi n’andi ibihumbi 200 by’amadolari buri mwaka yo gukoresha mu bikorwa bifitiye rubanda akamaro.

Abegukana iki gihembo batorwa mu Bakuru b’Ibihugu na za Guverinoma ba Afurika, bamaze imyaka itarenze itatu bavuye ku butegetsi. Bakaba barayoboye batowe n’abaturage kandi bakubahiriza ibyo Itegeko Nshinga riteganya.

Mu nshuro 11 kimaze gutegurwa, esheshatu zose habuze ucyegukana mu bakuru b’ibihugu bategetse neza bakubahiriza demokarasi bahererekanya ubutegetsi mu mahoro. Mu myaka ya 2009, 2010, 2012, 2013, 2015 na 2016 ntikigeze gitangwa bitewe no kubura ugikwiriye.

Uwahoze ari Perezida wa Liberia, Ellen Johnson Sirleaf, yegukanye igihembo cya Mo Ibrahim 2017
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Rukundo 2018-02-12 04:27:37

Wa wundi uuga ko nta cyiza cy’abagore ari he??

Abagore ni abayobozi bezaaaaa!! full of love and diligence!!!
Proud of you Mrs President!

Kwamamaza