Nyuma y’uko abantu batanu bishwe muri Malawi bashinjwa kwitwara nk’ibiremwa binywa amaraso ya muntu ( vampires) Loni yimuye abakozi bayo mu turere tubiri.

Amakuru y’uko hari abapfumu b’abanywamaraso yaturutse muri Mozambique nyuma bifata n’uduce twa Malawi twegereye umupaka twa Mulanje na Phalombe nk’uko Reuters ibitangaza.

Ayo makuru yasakaye mu kwezi gushize yatumye abaturage bashyiraho amarondo na za bariyeri, batega izo ‘vampires’ bavuga ko zigenda nijoro.

Ishami rya Loni rishinzwe umutekano rivuga ko uwo abo baturage bafashe bamukekaho kuba umunywamaraso bamukubita kugeza apfuye.

Rishimangira ko abaturage bo muri Mujanja na Phalomba bahahamuwe n’inkuru ziteye ubwoba z’ibyo biremwa by’umwijima byabateye, ku buryo ntawe ugicaracara ku mugoroba uretse irondo bishyiriyeho gusa.

Umuyobozi wa Loni muri Malawi, Florence Rolle yavuze ko abakozi bamwe bayo nabo bagize ubwoba bwo kwicwa n’ayo marondo bakimuka muri utwo duce.
Perezida Peter Mutharika yatangaje ko amakuru y’ubwicanyi bushingiye ku bwoba bw’abanywamaraso ateye inkeke. Avuga ko agiye gukora iperereza ryimbitse.

Hagati aho yategetse ko abantu bose bagomba kuzajya bava mu rugo mbere ya saa moya z’igitondo, bakaba batashye mbere ya saa kumi n’imwe z’umugoroba kugira ngo hatagira ugenda ijoro agakekwaho kuba umunywamaraso.

Imyemerere ishingiye ku bupfumu yashinze imizi mu duce tw’icyaro twa Malawi. Muri 2002 nabwo hari abakubiswe bazira ibihuha by’uko ari abanywamaraso.

Muri Mata uyu mwaka, muri Afurika y’Epfo umusore yafashe umwana w’imyaka itanu witwa Tinyiko Reckson wakinaga umupira amutera icyuma mu ijosi, ubundi amunyunyuza amaraso, nk’uko Daily Mail ibitangaza.

Abari bahari bahise bafata uwo musore baramukubita,akizwa na polisi ariko uwo mwana we arapfa. Bahamije ko yamwishe mu buryo bwo kumuturaho igitambo mu mihango ya gipfumu.

Perezida wa Malawi, Peter Mutharika yabujije abaturage gucaracara hanze nijoro


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved