Imbuga nkoranyambaga z’ishyaka riri ku butegetsi muri Nigeria zigaruriwe n’aba-hackers

0 16-04-2018 - saa 11:14, David Eugène Marshall

Ishyaka riri ku butegetsi muri Nigeria, All Progressive Congress (APC) ryatangaje imbuga nkoranyambaga nshya rizajya rikoresha nyuma y’aho izo ryari risanganywe zigaruriwe n’abajura mu by’ikoranabuhanga bazwi nk’aba-hackers.

Konti ya Twitter, Instagram, Facebook n’urubuga rwa murandasi iryo shyaka ryakoreshaga nibyo byahinduwe.

Ikinyamakuru Premium Times dukesha iyi nkuru kivuga ko APC ikibimenya yahise ifata ingamba zikakaye, harimo no guhindura burundu imbuga nkoranyambaga zose ishyaka ryakoreshaga.

Ku wa Gatandatu ushize nibwo konti ya Twitter yari isanzwe ikoreshwa n’iryo shyaka yagaragayeho ubutumwa bwinshi butavuga rumwe n’umurongo waryo, abantu batangira gutekereza ko iyo konti yinjiriwe.

Bijya gutangira iyo Konti isanzwe izwi nka @APC yakoreshejwe n’umugabo w’umuherwe witwa Justin Sun wo ku mugabane wa Asia, atangaza ko yayiguze n’Umukuru w’Igihugu cya Nigeria, Muhammadu Buhari ku madolari ya Amerika 200.000 nkuko bigaragara kuri iyo Twitter.

Guhera ubwo yahise ahindura rimwe mu mazina ayiherekeje kandi atangira kuvugiraho ibyo ashaka, aha yanavuze ko iyi konti agiye kujya ayikoresha ubushabitsi bujyanye n’ifaranga rishya rikoreshwa mu buryo bw’ikoranabuhanga ryo kuri interineti rizwi nka Bitcoin.

Umunyamabanga ushinzwe Itumanaho muri APC, Bolaji Abdullahi, yatangaje ko imbuga nkoranyambaga zose z’ishyaka zahise zihindurwa.

Mu kuburira Abanya-Nigeria bashoboraga kugwa mu mutego w’abo ba rushimusi Abdullahi yagize ati “Ku mugaragaro, Konti ya Twitter yitwa @APC nticyemewe mu rwego urwo ari rwo rwose mu Ishyaka APC kandi twitandukanije n’ibiri kuyinyuzwaho, rwose ntaho duhuriye nabyo. Ibiri kuyikorerwaho twebwe turabifata nk’icyaha cyo kwiyitirira icyo utari cyo.”

Abdullahi yasabye abantu kongera gukurikirana ibikorwa by’ishyaka binyuze ku mbuga nkoranyambaga nshya ishyaka ryashyizeho ndetse no kwiyandikisha kugira ngo bajye bakira amakuru agezweho ajyanye n’ishyaka biciye mu butumwa bwo kuri email.

Nigeria iri mu bihugu bikunze kwibasirwa n’ubujura bwifashishije ikoranabuhanga muri Afurika.

Urubuga rwa Twitter rw'Ishyaka riri ku butegetsi muri Nigeria (APC), rwinjiriwe n’aba-hackers banyuzaho ubutumwa bwamamaza

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza