Abanyarwanda batuye mu mujyi wa Brazzaville ndetse na Ambasaderi w’u Rwanda muri Congo bifatanyije n’abaturage bo muri Komini ya Bacongo mu muganda waranzwe n’ibikorwa by’isuku no gutera ibiti.

Uyu muganda wabaye ku itariki ya 2 Ukuboza 2017, ni igikorwa kizajya kiba buri wa Gatandatu wa mbere w’ukwezi. Wahawe izina rya ‘Samedi Citoyen’.

Muri iki gikorwa Ambasaderi Dr. Habyalimana Jean Baptiste afatanyije n’Umuyobozi wa Komini ya Bacongo, Simone Loubienga ndetse n’abandi baturage, bateye ibiti mu busitani bw’ivuriro rikuru ry’iyi Komini mu rwego rwo kubungabunga ibidukikije.

Loubienga washimye Abanyarwanda baje kwifatanya na bo, yagaragaje ko Samedi Citoyen ari igikorwa cyiza cyatangijwe na leta bityo gikwiye kwitabirwa, kikagera mu bice byose bigize komini ayoboye.

Yanifashishije kandi u Rwanda mu kugaragaza uburyo umuganda ari ingirakamaro, aho yavuze ko kuri ubu ari igihugu kirangwa n’isuku.

Mu ijambo rye Ambasaderi Habyalimana yashimye ubuyobozi bwa Komini Bacongo ku gitekerezo cyiza bwagize cyo kugarura ibikorwa by’umuganda ndetse avuga ko bari barabitekerejeho kuva kera.

Yakomeje asobanura ko umuganda ari ngombwa kuko ugira uruhare mu guteza imbere igihugu, aho abaturage bakora ibikorwa bibyara inyungu rusange kandi nta gihembo bategereje ndetse bakagira n’umwanya wo gusabana no kungurana ibitekerezo ku cyakorwa ngo iterambere rikomeze kwihuta.

Amb. Habyalimana na Loubienga bafatanya n'abaturage mu gutema ibyatsi
Ambasaderi Habyalimana atera igiti
Bamwe mu bitabiriye umuganda
Umuyobozi wa Komini ya Bacongo, Simone Loubienga atera igiti


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved