IGIHE

Imbere ya Tshisekedi, Bitakwira Justin yavuze ko umuyobozi w’Inteko arutwa na Covid-19

0 18-05-2024 - saa 20:57, Jean de Dieu Tuyizere

Justin Bitakwira wabaye Minisitiri ushinzwe iterambere ry’icyaro muri Repubulika Iharanira Demokarasi ya Congo (RDC), imbere ya Perezida Félix Tshisekedi, yavuze ko aho kugira ngo Christophe Mbosso agaruke ku buyobozi bw’umutwe w’abadepite, byarutwa n’uko icyorezo Covid-19 cyagaruka.

Iri gereranya Bitakwira umenyereweho amagambo y’ivangura rishingiye ku moko yarikoreye mu nama idasanzwe y’abanyamuryango b’ihuriro Union Sacrée rigizwe n’amashyaka ashyigikiye ubutegetsi bwa Tshisekedi, yabaye kuri uyu wa 17 Gicurasi 2024.

Mu ngingo zaganiriweho muri iyi nama harimo umwuka mubi watutumbye mu ihuriro, watewe ahanini no kutemeranya ku bakwiye kujya muri guverinoma n’abayobora imitwe yombi y’Inteko Ishinga Amategeko.

Mboso uherutse gutorerwa kuyobora akanama k’inararibonye yari mu bashakaga kuyobora umutwe w’abadepite, ariko Vital Kamerhe wo mu ishyaka UNC akaba na Minisitiri ushinzwe ubukungu ni we washyigikiwe n’abanyamuryango benshi.

Tshisekedi yamenyesheje abanyamuryango b’iri huriro, ko uyu mwiryane nukomeza, ashobora no kuzafata icyemezo cyo gusesa Inteko Ishinga Amategeko.

Bitakwira na we yafashe ijambo, agaragaza ko bikwiye ko Mboso atongera kuyobora umutwe w’abadepite, kuko ingaruka mbi ubuyobozi bwe bwagira zaba ziremereye kurusha izo icyorezo cya Covid-19 cyateza kibaye cyongeye kugaragara muri RDC.

Yagize ati “Abantu bacu biteguye kugaruka kwa Covid-19, mu mwanya wo kugaruka kwa Bwana Mboso mu buyobozi bw’Inteko Ishinga Amategeko.”

Amatora y’abadepite yabaye mu Ukuboza 2023, ibyavuyemo bitangazwa muri Mutarama 2024. Muri guverinoma, Tshisekedi yagize Judith Suminwa ku mwanya wa Minisitiri w’Intebe tariki ya 1 Mata 2024. Ntabwo igihe izi nzego zizuzurizwa kiramenyekana.

Bitakwira ni umwe mu banyapolitiki b'abahezanguni muri RDC
Christophe Mboso asanzwe ayobora umutwe w'abadepite mu Nteko yo muri RDC
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza