Tariki ya 16 Mata 1994: Abatutsi barenga 2000 basenyeweho Kiliziya ya Nyange

4 16-04-2018 - saa 07:29, Ndayishimye Jean Claude

Ku wa 16 Mata 1994, Abatutsi barenga 2000 basenyeweho Kiliziya ya Nyange, baricwa. Interahamwe n’abapolisi bagose Abatutsi bari bahungiye muri iyi kiliziya, abangavu b’abatutsikazi bafatwa ku ngufu n’abajendarume n’abapadiri.

Uwo munsi i Nyange hageze amakamyo yuzuye amabuye yo gukwirakwiza mu Nterahamwe n’abaturage b’Abahutu kugira ngo bayakoreshe bica Abatutsi mu kiliziya.

Padiri Seromba Athanase yatumije imashini ya Tingatinga, ategeka ko isenya kiliziya yari yuzuyemo Abatutsi. Uko tingatinga yasenyaga kiliziya ni ko abajendarume n’abapolisi bateraga za gerenade mu kiliziya, naho abashatse guhunga Interahamwe zikabatera amabuye cyangwa abajandarume bakabarasa. Icyo gitero cyishe abatutsi bagera 1500.

Ku munsi ukurikiyeho, Interahamwe zagarutse gushaka abarokotse igitero cy’umunsi wari wabanje, zirabica, zisenya uduce twa kiliziya twari twasigaye. Icyo gihe abana bavuka kuri ba Nyina b’abahutukazi na ba Se b’abatutsi barishwe.

Kuri uwo munsi kandi Abatutsi bagera ku 5000 bari bahungiye muri Kiliziya ya Ntarama mu Bugesera bishwe n’Interahamwe n’abasirikare bo mu kigo cya Gako n’abandi baturutse i Kigali.

Icyo gitero cyayobowe n’uwitwa Karera François. Izo Nterahamwe zakoreye ubwicanyi ndengakamere abatutsi bari bahungiye mu Kiliziya ya Ntarama, bafomoza abagore b’abatutsikazi batwite ngo barebe uko uruhinja rw’umututsi utaravuka ruba rusa, bacurikaga amaguru y’abana b’ibitambambuga, bakabakubita ku nkuta z’inzu ngo kuko badashaka gupfusha amasasu ubusa, n’ibindi bikorwa bya kinyamaswa byinshi.

Kuri iyo tariki, Abatutsi bari bahungiye kuri Komini Gishali kimwe n’abari bahungiye ku musozi wa Ruhunda (ubu ni mu Karere ka Rwamagana) bishwe n’abajandarume n’Interahamwe, abandi batabwa mu mazi ku mwaro wa Kavumu.

Ibindi mu byaranze uyu munsi
-  Abatutsi bari bahungiye mu ishuri rya Mutagatifu Aloys (Rwamagana) barishwe.

-  Abatutsi bari bahungiye i Ruramira (mu Karere ka Kayonza) barishwe bajugunywa muri Barrage.

-  Abatutsi bari bahungiye ku gasozi ka Rutonde (mu Karere ka Rwamagana) barishwe bose.

-  Hishwe Abatutsi bo mu Muganza muri Perefegitura ya Cyangugu, ubu ni mu Karere ka Rusizi, biciwe mu ruganda rwa CIMERWA.

-  Hishwe Abatutsi muri Nzahaha (Murya) muri Perefegitura ya Cyangugu, ubu ni mu Karere ka Rusizi.

-  Hishwe Abatutsi muri Gashonga (Karemereye, Kabahinda) muri Perefegitura ya Cyangugu, ubu ni mu Karere ka Rusizi.

Kwamamaza
Kwamamaza

Izindi nkuru wasoma

166 0 20-10-2018
256 0 19-10-2018
158 2 18-10-2018
240 0 17-10-2018
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Albert 2018-04-17 07:44:59

Wowe wiyita "Manawe" ngo Ntarama ntiyajyamo 15000 ngo na stade abantu bangana batyo ntibakwirwamo? ukwiye guceceka kuko birumvikana ko ibyo uvuga utabizi cg. ubyirengagiza. muri kiriya gihe na toilete yagenewe umuntu 1 twayijyagamo turi 10 tugakwirwamo. nkanswe kiriziya yari yuzuye abantu bagerekeranye na ziriya mbuga zose zo hanze abantu buzuye. jya wicecekera mugenzi ribara uwariraye

2
kajiwabo 2018-04-16 07:14:38

Burya biba byiza iyo ubanje gusoma neza mbere yo gutanga comment, iyo mibare wanditse niyanditse munkuru urabona bihura, banditse 1500 wowe wandika 15000.

3
cadette 2018-04-16 07:00:52

Nubwo ari hato ariko bahahungira da! (Ntarama) .Gusa umunyamakuru yavuze 5000 Nta mwaga abatutsi bari bafite kdi twari tuziko mu nzu y’Imana ntawahicira umuntu nubwo bariya bagome babirenzeho.
Ndibuka kuri iyi taliki Mama wanjye n’abavandimwe banjye bishwe kuri iyi tariki nkasigara njyenyine baziko napfuye.
Ntimukazime nararokotse ubu nariyubatse ndetse narashibutse.
Nzahora mbibuka

4
Manawe 2018-04-16 01:00:59

Kwibuka abacu bazize jenoside no kwibutsa urupfu rubi bishwe tuzakomeza kubikora. Ariko mujye mwitondera imibare mutangaho ubuhamya mwa bantu mwe! Ngo abantu 15,000 MURI Kiliziya ya Ntarama!! Usibye nayo, mu Rwanda nta Kiliziya ishobora kujyamo abantu 15,000. Nta na stade iri mu Rwanda bakwirwamo itari Stade Amahoro. Centrale ya Ntarama yari ifite imyanya yo kwicara itarenze 500 yagiyemo gute abantu 15,000, benda kungana n’abuzura Basilique Saint Pierre y’i Roma? Iyaba mwavugaga ko biciwe hafi y’iyo Kiliziya byagira inzira, ariko uko mpazi n’ikibanza cyose cy’iyo centrale ntabwo abantu 15,000 bakwirwamo.

Kwamamaza