IGIHE

U Bwongereza: Hagiye kuba inama yiga ku kwivana mu nshingano z’ibwami kwa Harry na Meghan

0 13-01-2020 - saa 07:28, Iradukunda Serge

Kuri uyu wa 13 Mutarama abagize Umuryango w’ibwami mu Bwongereza baraterana kugira ngo bige ku hazaza h’igikomangoma Harry n’umugore we Meghan Markle baherutse gutangaza ko bagiye kuva mu myanya yabo mu bwami bw’u Bwongereza.

Iyi nama izahuza Umwamikazi Elizabeth II, Igikomangoma Charles, Igikomangoma William na Harry biteganyijwe ko izabera mu rugo rw’Umwamikazi ruzwi nka Sandringham ruherereye mu gace ka Norfolk.

Meghan Markle we uri muri Canada azayikurikirana hifashishijwe ikoranabuhanga.

Iyi nama ije nyuma y’uko mu minsi ishize Harry n’umugore we Meghan batangaje ko bagiye kubaho mu buzima bwabo, bakava mu myanya bari bafite nk’abanyamuryango bakomeye b’ubwami bw’u Bwongereza.

Kuva uyu mwanzuro wajya hanze, BBC ivuga ko wababaje abandi bantu bo mu muryango w’ibwami cyane ko ubwo Harry na Meghan bawufataga batabanje kubamenyesha.

Iyi nama byitezwe ko izasuzumirwamo byimbitse impamvu zatanzwe na Harry hamwe n’umugore we Meghan, cyane ko impinduka zibaye mu mikorere n’imibereho y’umwe mu bagize umuryango w’ibwami zibanza kuganirwaho mbere yo kuzubahiriza.

Abakurikiranira hafi umuryango w’ibwami bavuga ko mu gihe Harry na Meghan bazaba bemeje kwitarura ibikorwa by’ibwami batazagorwa no kubaho, kuko Meghan mbere yo gushaka yari afite miliyoni 5 z’amadorali mu gihe Harry we afite imitungo ibarirwa muri za miliyoni yasigiwe na nyina Diana.

Ikinyamakuru The Times cyatangaje ko se wa Harry, Charles ashobora guhagarika amafaranga yageneraga uyu muryango mu gihe waba uhisemo kwikura mu bikorwa by’ibwami.

Mu 2017 nibwo Meghan Markle yemeye ko ari mu rukundo na Prince Harry maze ku wa 19 Gicurasi mu 2018 basezerana kubana nk’umugore n’umugabo.

Igikomangoma Harry na Meghan baherutse gutangaza ko bagiye kuva mu nshingano zikomeye z'ibwami
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza