U Bwongereza bwashyizeho Minisitiri ushinzwe kurwanya ubwiyongere bw’abiyahura

1 10-10-2018 - saa 19:30, IGIHE

Minisitiri w’Intebe w’u Bwongereza, Theresa May, yashyizeho Jackie Doyle-Price ku mwanya wa Minisitiri ushinzwe kurwanya Ubwiyahuzi nk’ingamba izacubya ubwiyongere bw’abiyahura.

Uyu mwanya watangajwe ku wa 10 Ukwakira 2018, mu Nama Mpuzamahanga yiga ku buzima bwo mu mutwe iteraniye i Londres ahahuriye abahagarariye ibihugu 50.

Inama yabaye yayobowe na Minisitiri w’Ubuzima, Matt Hancock, yahuriranye no kwizihiza Umunsi Mpuzamahanga w’Ubuzima bwo mu Mutwe.

Yavuze ko “Hari urugendo rwo gukora ngo intego igerweho. Ntabwo ari ikintu cyahita gikorwa mu ijoro rimwe.”

Minisitiri w’Intebe May yavuze ko ishyirwaho ry’uyu mwanya rizagabanya ikibazo cy’abiyahura. Mu Bwongereza nibura abantu 4,500 bapfa biyahura buri mwaka.

Guverinoma yijeje kongera imbaraga mu mashuri aho izatanga ubufasha bw’abazasuzuma ubuzima bwo mu mutwe bw’abanyeshuri n’imibereho yabo.

May yagize ati “Dushobora gushyira iherezo ku mpamvu zituma benshi bahura n’ibibazo bagaceceka no kwirinda icyago cyo kwiyahura gihitana ubuzima bwa benshi.”

Minisitiri w’Intebe, May yanatanze miliyoni £1.8 ku muryango w’abagiraneza mu kuwufasha gutanga serivisi zawo zinyuzwa ku murongo wa telefoni mu myaka ine iri imbere.

Doyle-Price yabaye Depite kuva mu 2010. Yagizwe Minisitiri w’Ubuzima bwo mu Mutwe, Uburinganire no kurwanya Ubwiyahuzi.

BBC yanditse ko mu nshingano ze azaharanira ko buri gace mu Bwongereza kagira imishinga yihariye yo guhagarika ibikorwa byo kwiyahura no gushaka uko hakwifashishwa ikoranabuhanga mu kureba abashobora kuba bafite uyu mugambi.

Yavuze ko yumva ingaruka zikomeye kwiyahura bigira ku miryango ndetse ashimangira ko “Aba bantu aribo bagomba kuba ku isonga y’ibyo dukora.”

Jackie Doyle-Price ni we Minisitiri ushinzwe kurwanya Ubwiyahuzi mu Bwongereza
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kayijamahe 2018-10-11 04:26:28

Ku isi yose,hiyahura abantu barenga 1 million buri mwaka.Akenshi bakoresha umugozi cyangwa imbunda.Gusa ntabwo bible isobanura neza niba kwiyahura ari icyaha.Kubera iyo mpamvu,ntabwo tuzi niba ku Munsi w’Imperuka Imana izazura n’abantu biyahuye.

Kwamamaza