IGIHE

U Burusiya buri hafi gufata Luhansk: Ibigezweho mu ntambara ya Ukraine

0 20-05-2022 - saa 20:55, IGIHE

  • - U Burusiya bwenda gufata Luhansk
  • - NATO yatumye u Burusiya bufungura ibigo bya gisirikare bishya
  • - U Burusiya bugiye gufungira gaz Finlande
  • - Abasirikare bose ba Ukraine muri Mariupol bashyize intwaro hasi

Minisitiri w’Ingabo w’u Burusiya, Sergei Shoigu, yatangaje ko Ingabo z’u Burusiya ziri hafi gufata igice cy’Iburasirazuba cya Luhansk, nka kamwe mu duce tugize igice cyagutse kizwi nka Donbas.

Ni agace kanini kuko gafite ubuso bwa kilometero kare zigera mu 26,684.

Mbere y’uko urugamba rwo muri Ukraine rutangira, u Burusiya bwabanje kwemera Luhansk na Donetsk nka repubulika zigenga.

Minisitiri Shoigu yavugiye kuri televiziyo ati "Ibohorwa rya Repubulika ya rubanda ya Lugansk riri hafi kurangira."

U Burusiya buvuga ko buri hafi gufata Luhansk

U Burusiya bugiye gufungura ibigo bishya bya gisirikare

Minisitiri Shoigu yanavuze ko u Burusiya bugiye gufungura ibigo bishya bya gisirikare, muri gahunda yo kwitegura guhangana n’igitutu cy’ihuriro rya gisirikare ry’u Burayi na Amerika (NATO), mu burengerazuba bw’igihugu.

Ni icyemezo cyatangaje mu gihe ibihugu bya Suède na Finlande biri mu rugendo rwo kwinjira muri NATO.

Finlande isangiye Umupaka n’u Burusiya ku ntera ya kilometero 1,340.

Shoigu yagize ati "Ibigo 12 bya gisirikare binini n’ibito bizashingwa mu Karere ka gisirikare k’Iburengerazuba, bitarenze impera z’uyu mwaka."

Ibyo ngo bizajyana no koherezayo intwaro zikomeye kandi zigezweho.

Yakomeje ati "Muri uyu mwaka, turateganya kubona bene ibyo bikoresho bigera ku 2,000."

Shoigu yanavuze ko urwego rw’imyitozo ya gisirikare rumaze kuzamurwa cyane mu Burengerazuba, nibura kuri 25%.

Yavuze ko hamaze gukorwa imyitozo isaga 300 y’imirwanire, naho imyitozo ikoreshwa mu kuzamura imikorere y’ingabo zikoresha ubwato yazamutseho 42%.

Ni mu gihe mu bijyanye n’indege, byo byazamutseho 4% mu Burengerazuba bw’igihugu.

Minisitiri Sergei Shoigu yavuze ko barimo gufungura ibigo bya gisirikare bishya mu burengerazuba bw'u Burusiya

U Burusiya bwiyemeje kongera ibinyampeke ku isoko

Intumwa y’u Burusiya mu Muryango w’Abibumbye, Vasily Nebenzya, yatangaje ko u Burusiya bushobora gutanga umusanzu ukomeye mu gukemura ikibazo cy’ibiribwa ku Isi.

Yabitangaje kuri uyu wa Kane, mu Nama y’Akanama k’Umuryango w’Abibumbye gashinzwe Umutekano, yagarukaga ku kwihaza mu biribwa.

Nebenzya yavuze ko u Burusiya ari igihugu gishobora gukomeza gutanga ibiribwa n’ingufu hirya no hino ku Isi.

Yagize ati "Muri uyu mwaka, turateganya umusaruro w’ingano mwinshi kurusha ikindi gihe. Muri urwo rwego, dushobora gutanga toni miliyoni 25 z’impeke zizanyura ku cyambu cya Novorossiysk guhera ku wa 1 Kanama kugeza mu mpera z’uyu mwaka."

Yanavuze ko hagati ya Kamena n’Ukuboza, inyongeramusaruro zizoherezwa mu mahanga zishobora kugera kuri toni miliyoni 22.

Nebenzya yavuze ko kuba umusaruro wa Ukraine utarimo kuboneka ku isoko ari ikibazo cyayo, aho kuba icy’u Burusiya.

Yavuze ko Ukraine yafungiye ubwato 75 bwo muri leta 17 mu byambu bitandukanye muri Mykolaiv, Kherson, Chernomorsk, Mariupol, Ochakov, Odessa na Yuzhny.

Yongeyeho ko n’ibindi biribwa bisohotse muri Ukraine bitabasha kugera mu bihugu byoherejwemo, ahubwo bipakururirwa i Burayi.

U Burusiya bushaka kongera ibinyampeke bushyira ku isoko

Ntawe tuzahera gaz yacu ubuntu

Umuvugizi w’Ibiro bya Perezida w’u Burusiya (Kremlin), Dmitry Peskov, yavuze ko ntawe iki gihugu kizahera gaz ubuntu, nyuma y’uko ikigo gishinzwe ingufu cyo muri Finlande (Gasum) gitangaje ko kitazayishyura muri Rubble, ifaranga rikoreshwa mu Burusiya.

U Burusiya buheruka kwemeza ko ibihugu bitari inshuti bitazongera kwishyura iyi gaz na peteroli mu mayero cyangwa amadolari, nyuma y’uko ubwizigame bw’u Burusiya bwari mu mafaranga y’amahanga bwafatiriwe, ubwo intambara yabwo na Ukraine yatangiraga.

Peskov yavuze ko biteguye ko umuntu utazubahiriza ibyo basaba, atazongera kohererezwa gaz.

Yakomeje ati "Nta makuru dufite ku bigo byose bifitanye amasezerano na Gazprom, kuko ntabwo tubifiteho ububasha. Gazprom ni yo yabisobanura neza. Ariko twiteze ko ntawe uzagira icyo ahabwa ku buntu."

Gasum iheruka gutangaza ko itigeze yemera ibyasabwe na Gazprom Export byo gutangira kwishyura muri Ruble.

Gazprom yaje kumenyesha Finlande ko izahagarika kuyohereza gaz kuri uyu wa Gatandatu, nk’uko Gasum yabyemeje.

Mu itangazo yasohoye, Umuyobozi Mukuru wa Gasum, Mika Wiljanen, yagize ati "Birababaje cyane kuba ikwirakwizwa rya gaz mu gihugu binyuze ku masezerano dufitanye rigiye guhagarikwa."

G7 igiye guha Ukraine miliyari 19.8$

Ba minisitiri b’imari na ba Guverineri ba banki nkuru b’ibihugu birindwi bifite ubukungu bunini (G7), batangaje ko ibyo bihugu birimo gukusanya miliyari 19.8$ zigenewe Ukraine, ndetse bizeza gutanga amafaranga menshi mu gihe byaba ngombwa.

Abo bayobozi bo mu bihugu bya Leta zunze ubumwe za Amerika, Canada, u Buyapani, u Budage, u Bufaransa, u Butaliyani, n’u Bwongereza bagiranye ibiganiro mu Budage, ku buryo bwo gufasha Leta ya Kyiv ihanganye n’u Burusiya, amafaranga akaba agenda ayishirana.

Itangazo rya G7 rikomeza riti "Mu 2022, twabashije kwegeranya miliyari 19.8$ nk’ingengo y’imari y’ingoboka, harimo miliyari $9.5 ziheruka kwemerwa zo gufasha Ukraine kuziba icyuho mu bijyanye n’imari, no kubona serivisi z’ibanze ku Banya-Ukraine."

Ukraine yategetse abasirikare muri Mariupol gushyira intwaro hasi

Kuri uyu wa Gatanu, Guverinoma ya Ukraine yasabye abasirikare bari bacyihishe munsi y’uruganda rw’ibyuma rwa Azovstal muri Mariupol, gushyira intwaro hasi.

Ni nyuma y’amezi atatu barwana n’ingabo z’u Burusiya ariko bakananirwa.

Umuyobozi w’abo basirikare bagize batayo ya Azov, yasohoye amashusho kuri Telegram ati "Ubuyobozi bukuru bwa gisirikare bwatanze itegeko ryo kurokora ubuzima bw’abasirikare bacu maze tugahagarika kurwana kuri uyu Mujyi."

Yavuze ko harimo gukorwa ibishoboka byose kugira ngo abasirikare bishwe bavanwe mu ruganda.

Yakomeje ati "Ndizera ko noneho imiryango na Ukraine yose izabasha gushyingura indwanyi zayo mu cyubahiro."

Aba basirikare bahita bajyanwa mu bice bigenzurwa n’u Burusiya nk’imbohe z’intambara. Ukraine ivuga ko yizeye kubisubiza binyuze mu kugurana imbohe.

U Burusiya buheruka gutangaza ko muri ubwo buvumo hamaze kuvamo abasirikare 1.700, bose bafashwe.

Umujyi wa Mariupol umaze kwigarurirwa n'u Burusiya hafi ya wose
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza