IGIHE

Ingabo za Ukraine zategetswe kuva mu mujyi wa Severodonetsk: Agezweho mu ntambara n’u Burusiya

0 24-06-2022 - saa 14:25, IGIHE

Abasirikare ba Ukraine bahawe itegeko ryo kuva mu mujyi wa Severodonetsk, bamaze iminsi bahanganiyemo n’Ingabo z’u Burusiya.

Ni umujyi warashwe ku rwego rukomeye, mu gihe Ingabo za Ukraine zangaga kuwusohokamo.

Guverineri w’agace ka Luhansk, Serhiy Haidai, yavugiye kuri televiziyo kuri uyu wa Gatanu ko "Ingabo za Ukraine zigiye kuva muri Severodonetsk", ndetse ko "zahawe itegeko ryo kubikora."

Yakomeje ati "Kuguma mu birindiro byarashweho cyane mu mezi menshi kubera gusa kuba muhari, nta shingiro bifite."

Ntabwo yavuze niba ingabo za Ukraine zigomba guhita zihava ako kanya cyangwa niba hari ubundi buryo biri bukorwemo.

Mu rugamba rukomeje, Inzego z’ubutasi z’u Bwongereza kuri uyu wa Kane zatangaje ko abasirikare ba Ukraine batangiye no kuva mu mujyi wa TLysychansk, zitinya ko zaza kuzengurukwa n’Ingabo z’u Burusiya.

Gufata imijyi ya Severodonetsk na Lysychansk byashimangira neza ko u Burusiya bufite agace ka Luhansk, kamwe muri tubiri tunini tugize igice cy’iburasirazuba bwa Ukraine, kizwi nka Donbas.

Muri Severodonetsk ariko havugwa ko hari abantu basaga 300 baheze mu buvumo buri munsi y’uruganda rwa Azot.

Ingabo za Ukraine zategetswe kuva muri Severodonetsk kubera ibitero by'u Burusiya

Umuyobozi mu gace ka Kherson gafitwe n’u Burusiya yishwe

Umuyobozi ukomeye mu gace ka Kherson kagenzurwa n’u Burusiya muri Ukraine yishwe, mu mugambi bikekwa ko wari ugamije kumuhitana.

Dmitry Savluchenko wari umuyobozi ushinzwe imiryango, urubyiruko na siporo mu kanama gahuriweho n’abasivili n’igisirikare karimo kuyobora Kherson muri iki gihe, yishwe n’igisasu cyamuturikanye nk’uko Reuters yabitangaje.

Ibiro ntaramakuru byo mu Burusiya, Tass, byatangaje ko hari inyubako ebyiri zatwitswe, n’ibirahuri by’inyubako y’amagorofa ane iri hafi aho byamenetse.

Kherson iri hafi y’u Burusiya ndetse yafashwe mu cyumweru cya mbere cy’ibitero by’u Burusiya muri Ukraine, muri Gashyantare.

Uyu muyobozi yishwe mu gihe muri uyu mujyi harimo gukorwa imyiteguro iganisha kuri kamarampaka, ishobora kwemeza ko Kherson iba agace kamwe k’u Burusiya, aho gukomeza kubarizwa kuri Ukraine.

Umuyobozi ukomeye muri Kherson yishwe

U Budage mu bibazo kubera gaz iva mu Burusiya

Minisitiri w’Inganda wo mu Budage, Robert Habec, yavuze ko inganda zo muri iki gihugu zishobora guhura n’ibibazo by’imikorere, kubera igabanuka rya gaz ituruka mu Burusiya.

Yavuze ko gaz igiye kuba nkeya cyane mu gihugu, mu gihe gaz ituruka mu Burusiya yakomeza kuba nkeya nk’uko bimeze ubu.

Mu gihe igihugu kirimo gusatira ibihe by’ubukonje, ngo birashoboka ko inganda zimwe zanafunga imiryango nk’uko Minisitiri Robert Habeck yabitangarije ikinyamakuru Der Spiegel.

Yagize ati "Inganda zishobora guhagarika ibikorwa, guhagarika abakozi bazo, uruhererekane rw’ibicuruzwa rushobora kwangirika, abantu bashobora kujya mu madeni kugira ngo bishyure serivisi zo gushyushya ingo zabo, abantu bazarushaho kujya mu bukene."

Minisitiri Habeck yavuze ko ibirimo kuba byose ari amayeri ya Perezida Vladimir Putin w’u Burusiya, yo gucamo igihugu kabiri.

Icyakora, Ikigo gishinzwe ingufu mu Budage kivuga ko kiramutse cyujuje gaz ububiko bwose bufite, bushobora kumara amezi abiri n’igice nta kibazo cya gaz bufite.

Gusa ngo nk’igihugu gifite ubukungu bwa mbere mu Burayi, u Budage bukeneye indi soko ifatika ya gaz.

U Burusiya buheruka kugabanya gaz bwohereza mu Budage, nyuma y’uko ikigo Siemens cy’Abadage cyatinze gutanga ibikoresho cyahawe ngo kibisane - ku ishami ryacyo ryo muri Canada - byifashishwa mu gusunika gaz.

Ibyo bibazo ngo byatewe n’ibihano u Burayi na Amerika byafatiye u Burusiya, kubera intambara burimo kurwana na Ukraine kuva muri Gashyantare.

Amerika ikomeje kohereza intwaro muri Ukraine

Ubuyobozi bwa Leta zunze ubumwe za Amerika bwemeje ko bugiye koherereza Ukraine indi nkunga ya gisirikare ya miliyoni $450, irimo imbunda zirasa za rokete (rockettes) mu ntera iringaniye, hagamije gufasha icyo gihugu guhangana n’ingabo z’u Burusiya.

Iyi nkunga irimo intwaro enye zigezweho zirasa rokete, zizwi nka High Mobility Artillery Rocket Systems cyangwa HIMARS.

Izo ntwaro zabaga mu Burayi, Ingabo za Ukraine zikaba zatangiye kwitoza uburyo bwo kuzikoresha nk’uko umuvugizi wa Minisiteri y’Ingabo ya Amerika, Lieutenant Colonel Anton Semelroth, yabyemeje.

Amerika iheruka kohereza muri Ukraine izindi HIMARS enye.

Muri iyo nkunga kandi harimo imodoka 18 zifasha mu kwimura imbunda nini cyane za howitzers, ku buryo zibasha gukoreshwa ahantu hatandukanye ku rugamba.

Ukraine ku muryango winjira muri EU

Ukraine na Moldova byemejwe nk’abakandida mu Ubumwe bw’u Burayi, ku buryo mu gihe kiri imbere bishobora kuba abanyamuryango buzuye.

Mu ijambo yavuze nyuma yaho, Perezida wa Ukraine Volodymyr Zelensky yatangaje ko adashobora gutuza igihugu cye kitaratsinda intambara n’u Burusiya, ndetse kikaba umunyamuryango wuzuye w’Ubumwe bw’u Burayi.

Yavuze ko uyu ari umwanya Ukraine yategereke mu myaka isaga 30.

Yakomeje ati "Dushobora gutsinda umwanzi, kongera kubaka Ukraine, tukinjira muri EU, ubundi tukaruhuka."

Umuyobozi w’Ibiro bya Perezida Zelensky, Andriy Yermak, yavuze ko bagiye gukora ibishoboka byose mu buryo bwihuse, kugira ngo kwakirwa mu Ubumwe bw’u Burayi byihute.

Ikindi gihugu cyashakaga kujya muri EU ni Georgia ariko cyo ntabwo kiremezwa nk’umukandida, ahubwo ngo hari ibintu bikeneye kubanza gushyirwa ku murongo.

EU yemeje Ukraine nk'umukandida wenda kwakirwa mu muryango
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza