AU, Amerika n’u Bufaransa byakirije yombi icyemezo cya Kabila cyo kutiyamamaza

0 9-08-2018 - saa 19:41, Mukaneza M.Ange

Umuryango wa Afurika yunze Ubumwe, AU, watangaje ko wishimiye kuba Joseph Kabila, usanzwe ayobora Repubulika Iharanira Demokarasi ya Congo (RDC), yafashe icyemezo cyo kutongera kwiyamamariza kuyobora iki gihugu mu matora ateganyijwe mu mpera z’uyu mwaka.

Ku wa Gatatu nibwo Kabila yatangaje ko atazayimamariza gukomeza kuyobora RDC, kuko manda ebyiri yemererwa n’Itegeko Nshinga ry’iki gihugu zarangiye mu mpera za 2016, ariko ntahite ava ku butegetsi kuko atari yakabonye umusimbura.

Ihuriro ry’amashyaka ari ku butegetsi ari naho Kabila abarizwa, yemeje ko muri aya matora azahagararirwa na Emmanuel Ramazani Shadary, wigeze kuba Minisiteri w’umutekano.

Mu itangazo ryashyizwe ahagaragara kuri uyu wa 9 Kanama, Umuyobozi wa Komisiyo ya AU, Moussa Faki Mahamat yagarutse ku ntambwe ikomeye yatewe, ashima Kabila kuba yarubahirije ibyo yiyemeje birebana n’Itegeko Nshinga ndetse n’amasezerano yashyizweho umukono ku wa 31 Ukuboza 2017, amubuza kongera kwiyamamaza.

Mahamat kandi yanagarutse ku birebana n’imigendekere myiza y’amatora, asaba abanyapolitiki n’inzego zishinzwe kuyategura gukorana no kwizerana kugira ngo azabe mu mucyo no mu bwisanzure, ndetse asezeranya ko AU izakomeza gukorana na RDC bya hafi kugira ngo bigerweho.

Ibihugu by’ibihangange nabyo byacyeje Kabila

Ibihugu by’ibihangange birimo Leta Zunze Ubumwe za Amerika n’u Bufaransa nabyo byakiriye neza inkuru y’uko Kabila atazongera kwiyamamaza, ndetse bisaba inzego zose bireba gushyira imbaraga mu migendekere myiza y’amatora.

Mu itangazo yashyize ahagaragara, Umuvugizi wa Minisiteri y’Ububanyi n’Amahanga ya Amerika, Heather Nauert yagize ati “Kuba ishyaka riri ku butegetsi ryatangaje undi mukandida utari Kabila, bigaragaza intambwe ifatika muri demokarasi ya Congo. Leta, abatavuga rumwe na leta, abayobozi ba sosiyete sivili n’abayobora inzego z’umutekano basangiye na Kabila inshingano yo guharanira ko amahame ya demokarasi yubahirizwa.”

Umwe mu bayobozi mu nzego zo hejuru mu Bufaransa nawe yashimangiye ko nubwo icyemezo cya Kabila kidakemura ibibazo byose RDC ifite, yakoze amateka akomeye muri Afurika yo hagati.

Radio Mpuzamahanga y’Abafaransa, RFI, itangaza ko nubwo u Bufaransa bwasaga n’ubwacecetse ku birebana no kuba Kabila yakomeza kwiyamamaza, leta y’iki gihugu ngo yifashishije abandi bantu biganjemo abo mu karere kugira ngo bamwotse igitutu.

Nyuma gato y’itorwa rya Emmanuel Macron, abayobozi barimo umujyanama wa Perezida mu birebana na Afurika, Franck Paris na mugenzi we Rémy Maréchaux berekeje mu RDC, aho babonanye na Kabila mu buryo bw’ibanga.

Kabila yagiye ku butegetsi mu 2001 nyuma y’urupfu rwa Se, Laurent-Desire Kabila wayoboraga icyo gihugu. Yaje gutorwa binyuze mu matora ya demokarasi mu 2006, ari nayo matora ya mbere yari abaye muri RDC kuva yabona ubwigenge mu 1960.

Yaje gutorerwa manda ya kabiri mu 2011 ari nayo ya nyuma mu kuko itegeko nshinga rya RDC rigena ko Perezida wa Repubulika ayobora manda ebyiri gusa, irangira mu 2016, ariko amatora ntiyahita aba ku buryo bamwe bamushinjaga gushaka kwiyongeza izindi manda.

Perezida Kabila ntiyongeye kwiyamamariza manda ya gatatu

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza