Guverinoma y’u Rwanda yatangaje ko iri gukora ibishoboka ngo ikureho impamvu zatumaga ibigo byinshi biciriritse bivuka bipfa bitamaze kabiri.

Ibigo biciriritse byihariye hejuru ya 90 % by’urwego rw’Abikorera mu Rwanda. Mu kazi kangana na 94 % gatangwa n’urwego rw’abikorera, ibigo biciriritse byihariye 41 %.

Nyuma yo gufungura ku mugaragaro inama y’iminsi itatu yiga ku guhuza ibigo by’imari biciriritse n’amabanki muri Afurika (SME Banking Africa Forum 2017) Minisitiri w’ubucuruzi n’inganda Vincent Munyeshyaka yavuze ko u Rwanda ruri gukora ibishoboka ngo imbogamizi ibigo biciriritse byahuraga na zo zikurweho.

Munyeshyaka yavuze ko iyi nama igiye kwiga uburyo ibyo bigo byakubakirwa ubushobozi, bigafashwa guhuzwa n’amabanki kugira ngo bibashe gutera imbere kandi ababiyobora n’ababikoramo bahabwe ubumenyi buhagije.

Yavuze ko kuba hari ibigo biciriritse byapfaga bitamaze kabiri byaterwaga n’impamvu zitandukanye, cyane cyane zijyanye no kutamenya kugendana n’ikoranabuhanga rigezweho.

Yagize ati “Kuba muri ibi bigo ari ho bigaragara ko ibyinshi bipfa bitaragera kure, bijyanye n’uko ubucuruzi buba buteye ariko twe icyo dushaka ni ukuzamura umubare w’ibigo bibasha kurenza imyaka itanu bikora bikagenda biba byinshi aho kugira ngo wenda ibitageza imyaka itanu abe ari byo biba byinshi.”

Munyeshyaka yavuze ko hari ibigo biciriritse cyane cyane inganda zakoraga ibicuruzwa byagera ku isoko bagasanga nta buziranenge bifite bigafungwa, icyakora ngo ubu bashyizeho gahunda yo gufasha ba nyir’ibyo bigo kugendana n’ikoranabuhanga rigezweho kuva bagitangira, ku buryo igicuruzwa basohoye kiza nta busembwa gifite.

Ati “Ikindi kibakura ku isoko cyane harimo ikintu cy’ikoranabuhanga ku buryo Ikigo cyacu gishinzwe ubuziranenge twagisabye gushyiraho gahunda yitwa ‘Zamukana ubuziranenge’ , niba umuntu atangiye kugira ibitekerezo byo gushinga uruganda bamufashe hakiri kare, barebe niba ikoranabuhanga agiye gukoresha ariryo, aho kugirango bazategereze ko ashyira ikintu ku isoko ngo bagifunge.”

Umuyobozi w’Ikigo Mpuzamahanga cy’ubukungu (IFC) Ishami ry’u Rwanda n’u Burundi, Ignace Rusenga Mihigo Bacyaha yavuze ko ikibazo ibigo biciriritse bikunze kugaragaza ari ukudahabwa inguzanyo n’izo bahawe ntizibe iz’igihe kirekire.

Yagize ati “Mu myaka itanu ishize, ibigo biciriritse byavugaga ko amabanki atabifasha, twarabafashije ngo bitabweho, tunabaha ubumenyi kuko umuntu uguha amafaranga aba afite ingorane, kugira ngo izo ngorane zigabanuke ugomba kuba ufite ubumenyi bw’ibyo ushaka gukora.Ikindi cyica ibigo biciriritse ni uko babona inguzanyo y’umwaka umwe, ibiri baba batarabona uko bayikoresha bakaba batangiye kuyishyura”.

Bacyaha yavuze ko bafatanyije na Banki Nkuru y’Igihugu (BNR) bahaye amabanki amafaranga y’inguzanyo z’igihe kirekire kugira ngo nayo abashe guha ibigo biciriritse inguzanyo bizishyura mu myaka myinshi.

Ibigo biciriritse bigize 90 % by’ibigo byigenga muri Afurika.Intego ni uko uru rwego ruhabwa ingufu rukaba moteri y’ubukungu bw’ibihugu bya Afurika ndetse ibyo bigo bikaba byanakura bikavamo ibigo mpuzamahanga nkuko ibigo by’ikoranabuhanga nka LG na Sumsung byatangiye.

Bamwe mu btabiriye iyi nama
Minisitiri w'Ubucuruzi n'inganda, Vincent Munyeshyaka
Umuyobozi w’Ikigo Mpuzamahanga cy’ubukungu (IFC) Ishami ry’u Rwanda n’u Burundi, Ignace Rusenga Mihigo Bacyaha


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved