Ikigo cy’Igihugu cy’Ubumenyi bw’Ikirere, kirateganya kuzana inzobere zizaturuka muri Leta Zunze Ubumwe za Amerika zije guhugura abakozi 15 muri icyo kigo gukoresha no gusana ibyuma bya RADAR bikoreshwa n’icyo kigo, kuva muri Nzeri kugeza mu Ugushyingo 2017.

Iki kigo gitangaza ko ayo mahugurwa azibanda ku kongera ubumenyi ku kumenya gukoresha no gusana ibyuma bikoreshwa mu iteganyagihe, RADAR n’ibindi, akazamara amezi abiri akazarangira atwaye amafaranga asaga miliyoni 125.

Ibyo ni kimwe mu bikubiye mu mushinga w’imyaka itatu watangiye mu 2015, ugamije kuzamura serivisi zita ku mihindagurikire y’ikirere n’iteganyagihe.

KTPress yatangaje ko umuhuzabikorwa w’uwo mushinga, Livingstone Byandaga, yavuze ko u Rwanda ruzaba rwungutse cyane nyuma y’uko rwishyuraga menshi rujya kuzana inzobere muri Leta Zunze Ubumwe za Amerika no mu Bushinwa.

Yagize ati “ Umwaka ushize wonyine gusana ibikoresho byatwaye miliyoni 200 z’amafaranga y’u Rwanda. Icyo twacungiragaho ni uko twari tukiri mu gihe cy’agateganyo, ubu cyararangiye. Icyatubera cyiza ni ugushaka igisubizo kirambye tukareka gushingira ku baza kugira ibyo bahindura ku mikorere yacu.”

Uwo mushinga watewe inkunga n’Ikigega cy’Igihugu gitera inkunga imishinga ijyanye no kurengera ibidukikije amafaranga asaga miliyari 1.6, hagamijwe kuzamura serivisi zitangwa no gutanga amakuru ku bumenyi bw’ikirere.

Ikigo cy’Igihugu cy’Iteganyagihe cyashyizeho ahantu 300 hirya no hino mu gihugu, ahakorerwa serivisi zo gukusanya amakuru ku iteganyagihe.

Muri uwo mushinga uteganyijwe kurangira muri Werurwe umwaka utaha, u Rwanda rurateganya gushyiraho uburyo bw’ikoranabuhanga bwa Barcode ku masitasiyo yose y’ahakorerwa iteganyagihe kugira ngo bizoroshye uburyo bwo kubona amakuru.

Kugeza ubu hari no gukorwa porogaramu izashyirwa muri telefoni ngendanwa ikazafasha abantu kubona amakuru y’iteganyagihe aho bari hose n’igihe cyose mbere y’uko bagira icyo bateganya.

Umuhuzabikorwa w’umushinga wo guhugura abakozi ba Meteo Rwanda, Livingstone Byandaga,


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved